វេទិកាប្រកួតសម្រស់លំដាប់ពិភពលោក Miss Charm International 2021 គ្រោងនឹងធ្វើឡើងនៅ ថ្ងៃទី ១០ ដល់ថ្ងៃទី១៤ ខែ មេសា ឆ្នាំ២០២២នេះហើយ។ យ៉ាងណាមិញ កម្មវិធីមួយនេះធ្លាប់បានផ្លាស់ប្ដូរកាលវិភាគប្រកួតម្ដងរួចមកហើយ ដោយសារតែមានការរីករាលដាលនៃជំងឺកូវីដ១៩ នៅ ក្នុងប្រទេសវៀតណាម។
យោងតាមការបង្ហោះប្រកាសជាផ្លូវការនៅលើទំព័រហ្វេសប៊ុកផេក Miss Charm International នៅពេលថ្មីៗនេះបានឱ្យដឹងថា កម្មវិធីប្រកួតនាឆ្នាំ២០២២ខាងមុខនេះ ត្រូវបានរៀបចំនៅ លើកោះ PHU QUOC ។
កម្មវិធីនៅក្នុងឆ្នាំថ្មីនេះ មានគោលបំណងលើសពីការប្រកួតសម្រស់បវរកញ្ញា នោះគឺផ្ដោតលើចំនុចសំខាន់ក្នុងការលើកកម្ពស់វិស័យទេសចរណ៍ វប្បធម៌ និងការអប់រំ។ បន្ទាប់ពីមានការបិទប្រទេសអស់មួយរយៈធំ ស្ថានប័ន Miss Charm បានតាំងជំហរគោលដៅជំរុញឱ្យវិស័យទេសចរណ៍ប្រទេសវៀតណាមងើបឡើងវិញ តាមរយៈកម្មវិធីប្រកួតដ៏កក្រើកនិងអស្ចារ្យមួយនេះ។
សូមជម្រាបថា ចំពោះបេក្ខភាពបវរកញ្ញាតំណាងប្រទេសកម្ពុជា គឺកញ្ញា ប៊ី សុធារី បានត្រៀមខ្លួនជាស្រេចចេញទៅប្រកួតនៅឆាតអន្តរជាតិមួយនេះ នៅពេលខាងមុខ។ អ្នកគាំទ្ររំពឹងទុកថា កញ្ញា ប៊ី សុធារី នឹងធ្វើបានល្អក្នុងការដណ្ដើមយកមកុដ Miss Charm 2021 ព្រោះកញ្ញាធ្លាប់មានបទពិសោធច្រើនលើកចំពោះវេទិកាប្រកួតប្រជែងបវរកញ្ញា ដោយសារកញ្ញាក៏ជាអតីតបវរកញ្ញាចក្រវាឡឆ្នាំ២០១៧ ផងដែរ។
យ៉ាងណាមិញ ហ្វេនអ្នកគាំទ្រវិស័យបរវកញ្ញាទាំងអស់ កំពុងទន្ទឹងរង់ចាំទស្សនា និងលើកទឹកចិត្ត កញ្ញា ប៊ី សុធារី ដើម្បីឈានទៅរកជ័យជម្នះនិងក្លាយជាម្ចាស់មកុដ Miss Charm នាពេលអនាគតដ៏ខ្លីខាងមុខនេះ៕