នៅពេលថ្មីៗនេះ កំពូលតារាចម្រៀង មាស សុខសោភា បានបញ្ចេញ MV បទចម្រៀងថ្មីរបស់ខ្លួនដែលមានចំណងជើងថា «សត្វស្លាប» ។ មហាជនអ្នកប្រើប្រាស់បណ្ដាញសង្គមហ្វេសប៊ុក ក៏ដូចជាអ្នកគាំទ្រកំពូលតារាចម្រៀងរូបនេះ បានផ្ដោតការចាប់អារម្មណ៍យ៉ាងខ្លាំងចំពោះឈុតសត្វស្លាបដែលមានពណ៌សចាំង ដែលតារាស្រីរូបនេះគ្រងបង្ហាញក្នុងបទចម្រៀងថ្មីរបស់ខ្លួន។ យ៉ាងណាមិញ បទចម្រៀងនេះ ត្រូវបានផលិតកម្មរាម យកចិត្តទុកដាក់ក្នុងការផលិត MVយ៉ាងខ្លាំង ពីមួយប្លង់ទៅមួយប្លង់គឺមានបង្កប់អត្ថន័យស៊ីជម្រៅ។
គ្រប់រូបភាពនៃការសម្ដែងនៅក្នុង MV បទ «សត្វស្លាប» មួយនេះ កំពូលតារាចម្រៀងស្រី មាស សុខសោភា ដូចបង្ហើបអត្ថន័យចង់ផ្ញើសារទៅកាន់អ្នកគាំទ្រឱ្យដឹងថា ពេលខ្លះគឺយើងបានជួបបញ្ហាជីវិតដែលហ៊ុំព័ទ្ធដោយរូបភាពខ្មៅងងឹតមើលមិនឃើញ អ្វីល្អ អ្វីអាក្រក់ អ្វីខុស ឬអ្វីត្រូវ។ ក៏ប៉ុន្ដែនៅពេលមួយដែលយើងបានរកឃើញពន្លឺនៃការចាកចេញពីបញ្ហានោះហើយ ពេលនោះប្រៀបបីដូចជាយើងមានស្លាប ដែលអាចហោះទៅរកសេរីភាពឱ្យខ្លួនឯង។
ជាមួយគ្នានេះដែរ អ្នកនាង មាស សុខសោភា ក៏បានបង្ហោះសារលើកទឹកចិត្តអ្នកគាំទ្រនៅលើហ្វេសប៊ុករបស់ខ្លួនថា «វិថីជីវិតបានបង្រៀនឱ្យខ្ញុំឆ្លងកាត់រយលានហេតុផលទាំងរឿងល្អ និងអាក្រក់ តែខ្ញុំមិនបោះបង់ក្នុងការរៀនអំពីជីវិតមួយនេះឡើយ។ ខ្ញុំនិងស្វែងរកសេចក្តីសុខដែលនៅរាយប៉ាយនៅក្នុងលោកនេះ មកផ្គុំដើម្បីរក្សាទុកក្នុងប្រអប់បេះដូងនៅថ្ងៃណាមួយ។ សូមកុំបោះចោលជិវិតមួយនេះត្រូវស៊ូ អត់ធន់ កុំចុះចាញ់សូមប្រើជិវិតមួយនេះឱ្យដល់ទីបំផុតស៊ូ ស៊ូ…»។
សូមជម្រាបបន្ថែមថា បន្ទាប់ពីបានចេញMV បទ «សត្វស្លាប» នេះហើយ កំពូលតារាចម្រៀង មាស សុខសោភា ក៏បានបង្ហោះដំណឹងល្អមួយទៀតប្រាប់អ្នកគាំទ្រថា អ្នកនាងទើបតែទទួលបានការបំពាក់គ្រឿងឥស្សរយស មុនីសារាភ័ណ្ឌ ថ្នាក់មហាសេរីវឌ្ឍន៍ ពីព្រះករុណា ព្រះបាទសម្តេចព្រះបរមនាថ នរោត្តម សីហមុនី ជាអម្ចាស់ជីវិតលើត្បូង ព្រះមហាក្សត្រនៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ដែលត្រូវបានព្រះប្រថាប់ព្រះរាជលញ្ឆករនៅថ្ងៃទី ១២ ខែ ធ្នូ ឆ្នាំ២០១៧៕
តោះមកទស្សនា MV «សត្វស្លាប» របស់កំពូលតារាចម្រៀង មាស សុខសោភា ពីផលិតកម្មរាម៖