កម្មវិធីប្រកួតសម្រស់ Miss Universe 2021 នៅ សល់រយៈពេលតែ២ថ្ងៃទៀតទេនឹងមកដល់ហើយ ដែលកម្មវិធីនេះនឹងប្រព្រឹត្តិឡើងនៅថ្ងៃទី១២ ខែ ធ្នូ ឆ្នាំ២០២១ នៅ ប្រទេសអ៊ីស្រាអែល។ វេទិកាប្រកួតដ៏អស្ចារ្យមួយនេះ ធ្វើឱ្យហ្វេនជាអ្នកគាំទ្រកំពុងអន្ទះសាទន្ទឹងចាំមើលយ៉ាងខ្លាំង ថាតើបវរកញ្ញាណាមួយជាម្ចាស់មកុដពិតប្រាកដ?
ជាការពិតណាស់ សម្រាប់ហ្វេនអ្នកស្រឡាញ់ការប្រកួតបវរកញ្ញាចក្រវាឡ គឺពិតជាបានជ្រើសរើសនិងពេញចិត្តបវរកញ្ញារូបណាមួយក្នុងដួងចិត្តរៀងៗខ្លួនជាមិនខាន ហើយសង្ឃឹមថា បវរកញ្ញាដែលខ្លួនពេញចិត្ត និងបោះជំហ៊ានដល់វគ្គ Top ណាមួយ។ ហើយមានអ្នកខ្លះទៀត ក៏បានបោះឆ្នោតជ្រើសរើសបវរកញ្ញាដែលខ្លួនពេញចិត្តតាមរយៈ App Miss Universe ដែលមាននៅលើទូរស័ព្ទដៃរួចរាល់ហើយ។
ជាមួយគ្នានេះដែរ ថ្មីៗនេះគេក៏បានឃើញអតីតបវរកញ្ញាចក្រវាឡឆ្នាំ២០១៨ គឺកញ្ញា រឿន ណាត បានបង្ហាញការពេញចិត្ត និងតម្រុយក្នុងចិត្តរបស់កញ្ញាថា មានបវរកញ្ញា៥រូបក្នុងចិត្ត នឹងអាចបោះជំហ៊ានទៅកាន់ Top 5។ កញ្ញា រឿន ណាត បានសរសេរសារបង្ហោះថា បវរកញ្ញា ៥ រូបដែលខ្លួនពេញចិត្តនឹងឈានដល់Top 5 ក្នុងនោះមានបវរកញ្ញា Philippines, India, Japan, Belgium នឹងជាពិសេសមួយទៀត កញ្ញា រឿន ណាត បានបង្ហាញការគាំទ្រយ៉ាងពេញទំហឹង ចំពោះ Miss Universe Cambodia 2021 គឺកញ្ញា ងិន ម៉ារ៉ាឌី ។
សូមជម្រាបថា គ្រាន់តែកញ្ញា រឿន ណាត បង្ហោះតម្រុយក្នុងចិត្តបែបនេះភ្លាម ស្រាប់តែមានអ្នកគាំទ្រជាច្រើននាក់ បានចូលទៅ Comment ព្រោងព្រាតថា « Congratulations » និងមានខ្លះទៀតក៏បានបង្ហាញពីការពេញចិត្តបវរកញ្ញា Top 5 រៀងខ្លួនផងដែរ។
ងាកមកចាប់អារម្មណ៍រឿងនេះវិញ ក្រោយពីមានការបង្ហោះរបស់កញ្ញា រឿន ណាត និងផ្ទុះការ Comment របស់ហ្វេនព្រោងព្រាតហើយនោះ គេស្រាប់តែឃើញហ្វេសប៊ុកផេកថៃមានឈ្មោះ «บ้า- น – นางงามจักรวาล» (បានណាងង៉ាមច័កក្រវ៉ាន) បានធ្វើការ Screenshorts ការបង្ហោះរបស់កញ្ញា រឿន ណាត និង Comment របស់ហ្វេន យកទៅបង្ហោះនៅផេករបស់ខ្លួន។ ទង្វើនេះគេមើលឃើញថា មានចេតនាទាក់ទាញរកប្រជាប្រិយភាពរបស់ខ្លួន និងកេញចំណេញពីលើការបញ្ចេញមតិរបស់បវរកញ្ញារបស់កម្ពុជា។ រហូតធ្វើឱ្យអ្នកគាំទ្រថៃមួយចំនួនបាន Comment មិនពេញចិត្តចំពោះការបង្ហាញតម្រុយក្នុងចិត្តរបស់កញ្ញា រឿន ណាត ។ នេះគេបានចាត់ទុកថា ជាសកម្មភាពដុតកំដៅឱ្យមានសង្គ្រាមផ្ទុះសម្ដីរវាងហ្វេននឹងហ្វេន ដែលផេកថៃមួយនេះបានបង្កឡើង។
តែទោះជាយ៉ាងណាក៏ដោយ ហ្វេនអ្នកគាំទ្រខ្មែរនៅតែរំពឹងថា វេទិកាប្រកួត Miss Universe គឺផ្ដោតសំខាន់លើសមត្ថភាពពិតរបស់បវរកញ្ញា ជាជាងជ្រើសរើសតាមការពេញចិត្តដែលផ្អើលតាមគ្នា។ គ្រប់គ្នារំពឹងថា កញ្ញា ងិន ម៉ារ៉ាឌី ជា Miss Universe Cambodia 2021 នឹងធ្វើបានល្អ ហើយឈានដល់វគ្គ Top ណាមួយជាក់ជាមិនខាន។ សូមអ្នកគាំទ្រទាំងអស់ កុំភ្លេចចូលរួមបោះឆ្នោតជូន កញ្ញា ងិន ម៉ារ៉ាឌី តាមរយៈ App Miss Universe ៕
