យោងតាមសារព័ត៌មាន Donga.com បានចេញផ្សាយកាលពីថ្ងៃទី១៤ ខែធ្នូ ឆ្នាំ២០២១ ម្សិលមិញនេះបានឱ្យដឹងថាតារាសម្ដែង Ahn Bo-Hyun នឹងចូលរួមសម្ដែងក្នុងភាពយន្ត «2’Oclock Date» ចាប់គូជាមួយនឹងស្រីស្អាត Yoona ក្នុងឋានៈជាតួឯកប្រុសជំនួសលោក Kim Seon Ho ដែលសុំដកខ្លួនចេញពីការសម្ដែងដោយសារតែរឿងអាស្រូវជាមួយនឹងអតីតគូស្នេហ៍។ តារាប្រុសរូបនេះមានប្រវត្តិកម្សត់ខ្លាំងណាស់ ទម្រាំអាចសាងកេរ្តិ៍ឈ្មោះ និងមានឱកាសបានសម្ដែងជាតួអង្គឯក តើ Ahn Bo Hyun មានប្រវត្តិយ៉ាងណាខ្លះ?
នៅ ក្នុងកម្មវិធី “Home Alone” (“I Live Alone”) របស់ថ្ថានីយទូរទស្សន៍ MBC ដែលផ្សាយកាលពីថ្ងៃទី១៥ ខែឧសភា ឆ្នាំ២០២១ បានបង្ហាញឱ្យឃើញពីជីវិតពិតខ្លះៗរបស់តារារូបនេះ ដោយនៅ ក្នុងវីដេអូនោះលោកបានរៀបចំម្ហូបអាហារនិងអញ្ជើញម្ដាយរបស់លោកមកលេងទីកន្លែងស្នាក់នៅ របស់លោកជាលើកដំបូង តាំងពីលោកបានចាកចេញពីស្រុកកំណើតមកាន់ទីក្រុងស៊េអូលដើម្បីតាមចាប់ក្ដីសុបិនធ្វើជាតារាសម្ដែងរបស់ខ្លួន។
តួឯកប្រុសរឿង «My Name» ដែលទើបតែបញ្ចាំងចប់នៅ លើទូរទស្សន៍ TVN រូបនេះបានឱ្យដឹងថាខ្លួនមិនដែលអញ្ជើញម្ដាយឱ្យលេងនៅកន្លែងដែលលោករស់នៅ នោះទេ ជារួមគឺអស់រយៈពេល១៧ឆ្នាំហើយ ដោយមូលហេតុថាបន្ទប់ដែលលោកស្នាក់នៅ តូចចង្អៀត ដូច្នេះលោកមិនចង់ឱ្យម្ដាយឪពុកលោកបានដឹងពីសុខទុក្ខពិតនិងការលំបាកដែលលោកជួបប្រទះនៅ ក្នុងការរស់នៅ ទីក្រុងសេអ៊ូលដើម្បីដើរតាមក្ដីស្រមៃខ្លួន ម្យ៉ាងទៀតលោកក៏មានការខ្មាសអៀន ដែលលោករស់នៅ បន្ទប់តូចចង្អៀត និងមិនអាចរស់នៅ ក្នុងជីវិតសុខសប្បាយ ទៅ តាមគ្រួសារលោកចង់បាន។
បុរសខ្ពស់ស្រឡះរូបនេះត្រូវផ្លាស់ប្ដូរកន្លែងរស់នៅ ជាញឹកញាប់ ដើម្បីរកកន្លែងរស់នៅ ដែលមានតម្លៃទាប ក្រៅ ពីនោះតារារូបនេះក៏បានរំលឹកដល់កាលទើបមករស់នៅ ទីក្រុងថ្មីៗ ហើយធ្វើការជាអ្នកដឹកជញ្ជូន (Delivery Man) លោកមិនអាចទៅ លេងស្រុកកំណើតបានឡើយនៅពេលមានបុណ្យទានម្ដងៗ លោកបានពោលថាជីវិតលោកកាលណោះគឺពិតជាក្រលំបាកខ្លាំង ដោយមានម្ដងនោះលោកមកផ្ទះវិញស្រាប់តែលិចទឹកពេញក្នុងបន្ទប់។
លោកចែករំលែកនៅ ក្នុងកម្មវិធីនោះទៀតថាកាលណោះជីវិតលោកពិតជាលំបាកណាស់ កាលណោះលោកធ្លាប់គិតដែរថាតើលោកគួរតែបោះបង់ចោលដែរទេ? ជាមួយនឹងចម្លើយរបស់តារារូបនេះម្ដាយរបស់លោកបានសម្រក់ទឹកភ្នែកនិងនិយាយទៅ កាន់ក្រុមផលិតថា លោកស្រីពិតជាឈឺចាប់ណាស់ ព្រោះពេលខ្លះលោកស្រីមិនដឹងថាកូនប្រុសធ្លាប់ឆ្លងកាត់រឿងរ៉ាវលំបាកវេទនាបែបណាខ្លះ? ពេលដែលលោកឈឺនៅ តែម្នាក់ឯងគ្មានអ្នកណាមើលថែក៏លោកស្រីមិនដឹងពីសុខទុក្ខរបស់កូន លោកស្រីលើកឡើងទៀតថាលោកស្រីដឹងថាកូនលំបាក តែមិនស្មានដល់ថាកូនលំបាកដល់ថ្នាក់នេះនោះទេ។
យ៉ាងណាមិញ Ahn Bo Hyun បានសរសេរសំបុត្រជូនថវិកាខ្លះដល់ម្ដាយរបស់លោកដោយក្នុងអត្ថន័យសំបុត្រនោះ ម្ដាយរបស់លោកបង្កើតលោកតាំងពីអាយុ២០ឆ្នាំ ដូច្នេះលោកមិនដឹងទេថាតើម្ដាយរបស់លោកធ្លាប់មានសុបិនបែបណា តើម្ដាយរបស់លោកធ្លាប់បានប្រើប្រាស់ជីវិតជាយុវវ័យបានកម្រិតណា ដែលរឿងនេះបានធ្វើលោកពិបាកចិត្តយ៉ាងខ្លាំង ម្យ៉ាងវិញទៀតលោកធ្លាប់លើកឡើងថាកាលពីក្មេងលោកធ្លាប់ខ្មាសគេដោយសារតែម្ដាយរបស់លោកមានអាយុក្មេង ប៉ុន្តែនៅ ពេលនេះលោកមានមោទកភាពដែលម្ដាយលោកនៅ រឹងមាំ និងវ័យក្មេង។ ខណៈដែលម្ដាយរបស់លោកបង្ហាញពីក្ដីរំភើបដែលការប្រឹងប្រែងរបស់កូនប្រុសកំពុងតែហុចផលជាផ្លែផ្កា ធ្វើលោកមានឱកាសបានសម្ដែងរឿងភាគធំៗ និងសម្ដែងជាតួអង្គធំៗផងដែរ។
អតីតយុវជនដែលប្រើជីវិតរសាត់អណ្ដែតរូបនេះចាប់ផ្ដើមអាជីពដំបូងជាអ្នកបង្ហាញម៉ូដនៅ ឆ្នាំ២០១៤ ហើយចាប់ផ្ដើមអាជីពជាតារាសម្ដែងនៅ ឆ្នាំ២០១៦ តាមរយៈសម្ដែងភាពយន្តរឿង «Hiya» ក្រៅ ពីនោះរឿងដែលធ្វើឱ្យលោកទទួលបានការចាប់អារម្មណ៍ពីហ្វេនមានដូចជា «Descendants of the Sun» «Dokgo Rewind» «Her Private Life» និង «Itaewon Class» ក្រោយពីឃើញសមត្ថភាពពូកែសម្ដែង និងរូបសម្បត្តិសង្ហា លោកត្រូវបានផលិតករនិងអ្នកដឹកនាំជ្រើសរើសជាតួឯកក្នុងរឿង «My Name» ជាមួយនឹងស្រីស្អាត Han So Hee និងថ្មីៗនេះលោកត្រូវបានជ្រើសរើសឱ្យសម្ដែងជាតួឯកជាមួយនឹងស្រីស្រស់ Im Yoona សមាជិកក្រុមចម្រៀង Girl Generation៕