ក្រោយពីធ្លាយដំណឹងបែកបាក់ស្នេហាមួយប្រ៉ាវ ទើបតែនៅ ថ្ងៃទី ១៥ ខែធ្នូ ឆ្នាំ២០២១នេះ ដែលតារាសម្ដែងឯកប្រុសជួរមុខប្រទេសថៃលោក Weir Sukollawat បានបង្ហាញវត្តមានផ្ដល់បទសម្ភាសន៍ជូនសារព័ត៌មានថៃជាច្រើនស្ថាប័ន បន្ទាប់ពីលោកបានបិទមាត់ស្ងាត់ឈឹងអស់មួយរយៈ។
អ្នកសារព័ត៌មានថៃបានព្យាយាមជីកកាយឱ្យលោក Weir Sukollawat បើកចិត្ត ព្រមបកស្រាយពីរឿងរ៉ាវទំនាក់ទំនងស្នេហាកញ្ញា Bella Ranee ។ បើទោះបីជាឥលូវមិនមានទំនាក់ទំនងសំខាន់អ្វីនឹងគ្នាទៀតក៏ដោយ តែលោក Weir Sukollawat បាននិយាយថា លោកព្រមទទួលស្គាល់ហើយថា ឋានៈគូស្នេហ៍៩ឆ្នាំ បានសល់ត្រឹមតែពាក្យ បងប្អូនល្អ គឺពិតមែន។ នេះក៏ដោយសារតែ លោក និង Bella ចង់បន្ដទំនាក់ទំនងល្អនេះបន្ដទៀត បើទោះបីជាដំណើរផ្លូវទៅថ្ងៃមុខមិនបានរួមសុខរួមទុក្ខជាមួយគ្នាដូចមុនក៏ដោយ។
លោកបន្ដថា រយៈ៩ឆ្នាំមកនេះ គឺយើងរកឃើញពីចំនុចប្រសើររួមដែលអាចបន្ដទំនាក់ទំនងពួកយើងឱ្យល្អនឹងគ្នាបាន។ លោកថាទំនាក់ទំនងរវាងលោកនឹង Bella Ranee គឺ Wonderful ខ្លាំងណាស់ ហើយសូមកុំព្យាយាមចោទប្រកាន់ទៅ អ្នកនេះ ឬអ្នកនោះថាជាជនទី៣ឱ្យសោះ លោកគឺគ្មានពាក់ព័ន្ធនឹងរឿងជនទី៣ទេ។ លោកបញ្ជាក់ទៀតថា នៅពេលនេះគឺលោក Single តែម្ដង ហើយព្រមនឹង Move On បន្ដទៀត។
ជាចុងក្រោយលោក Weir Sukollawat បានបញ្ជាក់ថា បន្ទាប់ពីបញ្ចប់ទំនាក់ទំនងស្នេហាជាមួយ Bella គឺមាននារីផ្សេងៗទៀតព្យាយាមចង់មកស្អំមុខរបួសបេះដូង តែលោកដូចជាមិនចាប់អារម្មណ៍ចំពោះរឿងនេះទេ។ លោកចង់ទុកខ្លួនឱ្យទំនេរប្រសើរជាង ហើយបើទោះបីជាហ្វេនៗលំបាកចិត្តខ្លាំងយ៉ាងក៏ដោយ លោកក៏សុំឱ្យហ្វេនទាំងអស់យល់ដល់ចិត្តរបស់លោក និង Bella ហើយគោរពការសម្រេចចិត្តនេះផងចុះ។
តើមានឱកាសដូចមុនវិញទេ? លោក Weir Sukollawat ថា នោះគឺជារឿងអនាគត ព្រោះលោកមិនអាចស្មានដឹងមុនទេ៕
