ភ្លើងសម្ដីកាន់តែឆេះសន្ធោរសន្ទៅ ហាក់មិនទាន់អាចរកអ្វីមកពន្លត់បាននោះទេ ពាក់ព័ន្ធនឹងករណី VJ តាប៊ុយបង្កហេតុគ្រោះថ្នាក់ចរាចរណ៍បើក Range Rover បុកគូទរថយន្តព្រូសពីក្រោយនៅលើបណ្ដោយផ្លូវព្រះមុនីវង្សត្រង់ចំណុចស្ដុបបេកាសេកែងនឹងផ្លូវសហព័ន្ធរុស្សី ព្រោះមកដល់ពេលនេះភាគីជនរងគ្រោះបានដាក់ពាក្យបណ្ដឹងទៅកាន់តុលាការដើម្បីប្ដឹង VJ តាប៊ុយ ទាមទារសំណងជំងឺចិត្តចំនួន២ម៉ឺនដុល្លារ ដោយអះអាងថាទឹកប្រាក់ដែលទទួលបាននឹងប្រគល់ជូនទៅមន្ទីរពេទ្យគន្ធបុប្ផា។ ប៉ុន្តែក្រោយពីទទួលបានមតិយ៉ាងច្រើនពីសាធារណជននៅលើបណ្ដាញសង្គម ជនរងគ្រោះបានប្ដូរចិត្តហើយប្ដឹងទាមទារសំណងខ្ពស់រហូតដល់ខ្ទង់សែនដុល្លារវិញ។
ដំបូងឡើយម្ចាស់ហ្វេសប៊ុកផេក B&J Salon អះអាងថាខ្លួនជាជនរងគ្រោះ បានបង្ហោះសារនាពេលថ្មីៗនេះថា «ឃើញឡានខ្លួនឯង ដែលជនល្មើសបុកអាណិតឡានណាស់! កាត់ទ្ទេចអស់ហើយ ខ្ញុំសូមប្រកាសជាសាធារណៈថា ប្តឹងទៅតុលាការក្រុងភ្នំពេញ ហើយទារសំណងជំងឺចិត្ត 20000$ ដោយយកប្រាក់នោះទៅជូនមន្ទីពេទ្យគន្ឋបុប្ផា សូមជួយគាំទ្រ និងផ្តល់កំលាំងចិត្តផងបងប្អូន»។
ប៉ុន្តែក្រោយមកម្ចាស់ផេកដដែលនេះហាក់មិនទាន់អស់ចិត្ត បានចេញមកបង្ហោះបន្ដទៀតថាខ្លួនផ្លាស់ប្ដូរចិត្តមិនប្ដឹងទាមទារត្រឹមតែ២ម៉ឺនដុល្លារនោះទេ តែនឹងទាមទារសំណងចំនួន១០ម៉ឺនដុល្លារឬ១សែនដុល្លារវិញ ដោយម្ចាស់ផេកនោះបានលើកឡើងយ៉ាំងដូច្នេះថា៖ «មហាជនបានសំណូមពរថា សំណងជំងឺចិត្ត បើយកទៅ ជូនមន្ទីពេទ្យដ៏ដែលនោះ គួរតែយកអោយច្រើនបន្តិចទៅ. ខ្ញុំសូមប្រកាសជាសាធារណៈថា ខ្ញុំបានប្ដូរការទារសំណងជំងឺចិត្តពី២០០០០$ ទៅ ជា១០០០០០$វិញ ! សូមបងប្អូនសារធារណៈជន កុំបារម្ភ ខ្ញុំឈប់ចរចាហើយ ទុកអោយច្បាប់គេធ្វើការងារនេះចុះ។ ខ្ញុំសូមត្រឹមកំលាំងចិត្តពីបងប្អូនផង»។ ការលើកឡើងជាដដែរៗនេះ ត្រូវបានគេមើលឃើញថា ភាគីជនរងគ្រោះ គឺមានការមិនសុខចិត្តជាមួយការសុំចចាររបស់ VJ តាប៊ុយ ឡើយ។
គួររំលឹកសម្ដីរបស់ VJ តាប៊ុយ ធ្លាប់បានលើកឡើងនៅ Live ក្នុងហ្វេសប៊ុករបស់ខ្លួនថា ភាគីជនរងគ្រោះជាម្ចាស់រថយន្ដព្រូស គឺហាក់ដូចជាហួសហេតុពេក ព្រោះបានយកវិក័យប័ត្រសរសេរដៃផ្ញើតាមតេឡេក្រាមឱ្យលោកមើល ហើយតម្លៃ២២៥០ ដុល្លារ ក៏ថ្លៃពេកដែរ ព្រោះរថយន្ដលោកស៊េរីទំនើប Rang Rover ធ្វើអស់តម្លៃតែ ២០០០ ប៉ុណ្ណោះ ចុះហេតុអ្វីរថយន្ដ Prius ធ្វើអស់ថ្លៃម្លេះ។ លោកថា ម្ចាស់រយន្ដ Prius អាងអីបន្ដិចប្ដឺងឡើងតុលាការ និងគំរាមចុះផ្សាយព័ត៌មានរហូត។ ប៉ុន្តែវីដេអូ Live នោះក្រោយមកត្រូវបានលុបចេញវិញ តែទោះជាលុបចេញពី Newsfeed ខ្លួនក៏មានអ្នកលេងបណ្ដាញសង្គមមួយចំនួនបានកាត់តឃ្លីបវីដេអូនោះយកទៅបង្ហោះនៅលើបណ្ដាញ social media ផ្សេងៗដែរ។
រហូតមកទល់ពេលនេះ នៅ មិនទាន់ឃើញមានការបកស្រាយរបស់ VJ តាប៊ុយ ទៅ កាន់មហាជនឱ្យបានចំពោះចំណាត់ការដាក់បណ្ដឹងរបស់ជនរងគ្រោះនៅ ឡើយទេ ខណៈដែលសារព័ត៌មានត្រយងកំពុងព្យាយាមសុំការទាក់ទងការបំភ្លឺបន្ថែមពី VJ តាប៊ុយ ទាក់ទងនឹងបញ្ហានេះ៕