មុននេះបន្ដិច ខាងស្ថាប័ន Miss Universe Cambodia បានបញ្ចេញមកុដបវរញ្ញានៅឆ្នាំ២០២២ខាងមុខនេះ ដែលមានបានរចនាម៉ូដឡើងលំនាំតាម មកុដព្រះនាងឥន្ទ្រទេវី ដែលមានគោលបំណងលើកឡើងពីភាពអង់អាចរបស់ស្ត្រីខ្មែរ និងចំណេះដឹង។ មកុដថ្មីៗនេះ ក៏ត្រូវបានគេដឹងថា ជាមកុដដ៏មានតម្លៃថ្លៃ រចនាដោយត្បូងប្រណិតចែងចាំងជាច្រើនគ្រាប់។
យ៉ាងណាមិញ លោក ម៉ែន និមលរ័ត្ន ជាស្ថាបិកស្ថាប័ន CIM និងជាអ្នកគ្រប់គ្រង Miss Universe Cambodia បានបង្ហោះសារបង្ហើបឱ្យដឹងថា ៖ «អរិយធម៌ខ្មែរដ៏អស្ចារ្យបាននាំមកនូវការអប់រំ សុខភាព ស្មារតី និងចំណេះដឹងដល់មហាជនក្នុងសតវត្សទី១២នៅអាស៊ីអាគ្នេយ៍។ មហាក្សត្រិយានីពីរអង្គ ដែលជាអគ្គមហេសីនៃព្រះបាទជ័យវរ្ម័នទី៧ បានដើរតួយ៉ាងសំខាន់ក្នុងការពង្រីក និងជោគជ័យរបស់មហានគរ។ ព្រះនាងឥន្ទ្រទេវី បានជះឥទ្ធិពលលើកិច្ចការរដ្ឋ តាមរយៈព្រះស្វមីរបស់ព្រះអង្គ ជាពិសេសចំពោះព្រះពុទ្ធសាសនា។ ព្រះនាងក៏ជាកវីនិពន្វដ៏សកម្ម និងជាសាស្ត្រាចារ្យផងដែរ»។
លោកបានបន្ដរៀបរាប់សារថា «សហស្សវត្សរ៍ថ្មី ឥឡូវនេះ ក្នុងសម័យទំនើបនេះ យុវនារីកម្ពុជាត្រូវបានបំផុសគំនិត ផ្តល់អំណាច និងទទួលឥទ្ធិពលពីអរិយធម៌ពីអតីតកាល។ ដើម្បីអបអរសាទរភាពស្រស់ស្អាត ភាពទាក់ទាញ និងឆើតឆាយ បវរកញ្ញាចក្រវាលកម្ពុជាឆ្នាំ២០២២ ត្រូវបានរៀបចំឡើងដោយធ្វើតាមភាពអស្ចារ្យរបស់មកុដរបស់ព្រះនាងឥន្ទ្រទេវី ដែលបង្ហាញពីអំណាច និងកិត្យានុភាពរបស់នារីខ្មែរតាំងពីអតីតកាល និងបច្ចុប្បន្នកាល។ មកុដបវរកញ្ញាចក្រវាលកម្ពុជា២០២២ រចនាដោយ CSN J Samnang Jewelry!»។
ចង់ដឹងថា មកុដ Miss Universe Cambodia 2022 នេះ បង្ហាញពីកិត្យានុភាពស្ត្រីខ្មែរកម្រិតណានោះ ទស្សនារូបភាពខាងក្រោមនេះ៖