កាលពីដើមខែ វិច្ឆិកា គេចាំបានថា តារាចម្រៀងត្រូវចិត្តយុវវ័យ លោក ម៉ុង ម៉ានិត បានបញ្ចេញស្នាដៃប្រលោមលោកបែបអក្សសិល្ប៍បុរាណ ដែលឱ្យចំណងជើងថា «ព្រះនាងមុខមួយពាន់ និងគ្រោះទាំង៧» ជាការលើកស្ទួយដល់អក្សរសិល្ប៍ និងវិឌ្ឍនភាពប្រលោមលោកបុរាណខ្មែរ។ ទន្ទឹមនឹងនោះ លោកក៏បានបញ្ចេញជា Trailer Book ដែលជាប្រភេទគំនូរជីវចលផងដែរ។
យ៉ាងណាមិញ អ្នកនិពន្ធវ័យក្មេងរូបនេះ ក៏បានបញ្ចេញស្នាដៃ Original Song មានភាពច្នៃប្រឌិតខុងប្លែកពីមុនដាច់ស្រលោះតែម្ដង។ ដោយលើកនេះលោក ម៉ានិច មិនបានទាញចំណាប់អារម្មណ៍ហ្វេនតាមរយៈបទR&Bទៀតទេ គឺលោកប្រើគំនិតនិពន្ធបទថ្មីជាប្រភេទបទមនោសញ្ចេតនាបែបបុរាណវិញម្ដង ដោយលយបញ្ចូលឧបករណ៍តន្ត្រីភ្លេងបុរាណខ្មែរ។ បទនោះមានចំណងជើងថា «បងលាមរណា» ជាបទចម្រៀងប្រកបប្រលោម (OST) ក្នុងរឿង «ព្រះនាងមុខមួយពាន់ និងគ្រោះទាំង៧»។
បើតាមការរៀបរាប់នៅលើហ្វេសប៊ុកផេករបស់លោក ម៉ានិត មានឈ្មោះជាភាសាអង់គ្លេស Manith Jupiter ថា៖ «លើកទីមួយចេញចម្រៀងបែបបុរាណ ពិតជាមានន័យសម្រាប់ជីវិតខ្ញុំណាស់»។ លោកក៏បានប្រាប់ទៅកាន់ហ្វេនៗទៀតថា កុំភ្លេចចូលស្តាប់បទនេះ ក្នុង Channel YouTube ទាំងអស់គ្នា។
បើតាមការរៀបរាប់អារម្មណ៍ពិតរបស់ហ្វេនបានឱ្យដឹងថា ក្រោយពេលបានអានប្រលោមលោក«ព្រះនាងមុខមួយពាន់ និងគ្រោះទាំង៧» ហើយងាកមកស្ដាប់បទចម្រៀង«បងលាមរណា» ភាគច្រើនគឺនិយាយដូចៗគ្នាថា ពិតជាពីរោះប្លែកអារម្មណ៍ និងពេលស្តាប់ហើយចេះតែស្រមៃឃើញសាច់រឿងហើយចង់យំនៅពេលឮសំឡេងខ្លុយក្នុងបទចម្រៀង៕
ទស្សនាវីដេអូចម្រៀង បងលាមរណា ខាងក្រោមនេះ៖