អ្នកម្ដាយពាក្យពីរមាត់ដ៏ខ្លីនេះស្ដាប់ទៅធម្មតា ប៉ុន្តែស្ត្រីម្នាក់នេះលោកមានក្ដីស្រលាញ់ ក្ដីបារម្ភនិងការយកចិត្តទុកដាក់ចំពោះកូនៗគ្រប់រូបមុនខ្លួនឯងជានិច្ច។ នៅថ្ងៃស្អែកនេះគឺថ្ងៃទី៩ ខែឧសភា ជាទិវាអ្នកម្ដាយអន្តរជាតិ ផ្អែកតាមគេហទំព័រ Buzzfeed ទិវាអ្នកម្ដាយឆ្នាំនេះត្រយងសូមណែនាំភាពយន្តចំនួន៥រឿងដែលនឹងនាំឱ្យអ្នកទស្សនារំភើបរហូតស្រក់ទឹកភ្នែកហើយក៏មានរឿងដែលនឹងនាំឱ្យអ្នកសើចសប្បាយផងដែរ។ សូមតាមដានដូចខាងក្រោមនេះ៖
១. The Blind Side (២០០៩)
យោងតាម Rottentomatoes ភាពយន្តនេះនិយាយអំពី Michael Oher (Quinton Aaron) ក្មេងអនាថាស្បែកខ្មៅម្នាក់ដែលមិនបានចូលសិក្សាជាច្រើនឆ្នាំ។ The Leigh Anne Tuohy (Sandra Bullock) និងស្វាមី Sean (Tim McGraw) បានរស់គេទៅនៅជាមួយហើយបន្ទាប់មកអ្នកទាំងពីរបានក្លាយជាអាណាព្យាបាលស្របច្បាប់របស់ Michael ដែលនាំឱ្យជីវិតរបស់អ្នកទាំងបីមានការប្រែប្រួលជាខ្លាំង។ ជាមួយនឹងរូបរាងធំដូចយក្សនិងប្រតិកម្មរហ័សលើការការពារខ្លួនរបស់គេធ្វើឱ្យគេមានរឿងជាប្រចាំ ប៉ុន្តែជាមួយនឹងការជួយពីគ្រួសារថ្មីនិងគ្រូបង្វឹកធ្វើឱ្យ Michael ចាប់ផ្ដើមរកឃើញពីចំណុចពិសេសរបស់ខ្លួនឯងឃើញទីបំផុតគេបានខ្លាចជាកីឡាករបាល់ឱបដ៏ល្បីល្បាញរបស់អាមេរិក។ ប្រយោគដែលទាក់ទាញទឹកភ្នែកក្នុងរឿងនេះគឺនៅពេលដែលកូនចិញ្ចឹម Michael ត្រូវបានគេរើសអើងហើយ Leigh ពោលប្រយោគបែបនេះថា៖ «បើអ្នកឯងគំរាមកំហែងកូនខ្ញុំ ដូចជាអ្នកឯងគំរាមកំហែងខ្ញុំដែរ»។
២. Bad Moms (២០១៦)
យោងតាម Filmjabber រឿង Bad Moms និយាយអំពី Amy (Mila Kunis) ស្ត្រីម្នាក់ដែលមានជីវិតអស្ចារ្យ នាងជាស្រីស្អាត មានស្វាមីដ៏ល្អមានកូនស្ដាប់បង្គាប់មានផ្ទះស្អាត និងមានការងារមួយដ៏រឹងមាំ។ ប៉ុន្តែដោយសារតែសម្ពាធការងារ នាងប្រឹងប្រែងពេករហូតធ្វើឱ្យនាងហត់ខ្លាំងរហូតដល់ចំណុចមួយដែលចង់សំរាក។ ទីបំផុតនាងបានចូលរួមជាមួយអ្នកម្ដាយពីរនាក់ផ្សេងទៀតដែលមានសម្ពាធដូចគ្នា។ អ្នកម្ដាយទាំងបីនាក់ចាប់ផ្ដើមគេចពីទំនួលខុសត្រូវហើយធ្វើឱ្យខ្លួនឯងក្លាយជាមនុស្សមានសេរីភាព។ ភាពយន្តនេះនឹងធ្វើឱ្យអ្នកទស្សនាកំប្លែង សើច សប្បាយពីដើមដល់ចប់។
៣. Freaky Friday (២០១៣)
យោងតាមគេហទំព័រ Disney ភាពយន្តនេះនិយាយអំពីម្ដាយ (Jamie Lee Curtis) និងកូនស្រី (Lindsay Lohan) ពីរនាក់ដែលមិនចុះសម្រុងនឹងគ្នា។ នៅថ្ងៃសុក្រដ៏ចម្លែកមួយមានអព្ភូតហេតុធ្វើឱ្យអ្នកទាំងពីរប្ដូរវិញ្ញាណគ្នាទៅវិញទៅមក។ការផ្លាស់ប្ដូរវិញ្ញាណលើកនេះបានធ្វើឱ្យទាំងពីរម្ដាយនិងកូន បានដឹងពីបញ្ហាដែលកូននិងម្ដាយបានជួបប្រទះហើយក៏ធ្វើឱ្យអ្នកទាំងពីរបានស្វែងយល់ពីគ្នាទៅវិញទៅមករហូតក្លាយជាការយល់ចិត្តថ្លើមគ្នានៅទីបំផុត។
៤. Because I Said So (២០០៧)
យោងតាម Amazon ភាពយន្ត Because I Said So និយាយពីម្ដាយដែលជាស្ត្រីម៉េម៉ាយមួយរូបមានកូនស្រីបីនាក់នៅក្នុងបន្ទុកបានព្យាយាមធ្វើយ៉ាងណាស្វែងរកបុរសល្អបីរូបដែលមានបុគ្គលិកលក្ខណៈចុះសម្រុងនឹងអត្តចរិតកូនស្រីនីមួយរបស់ខ្លួន ដើម្បីមករៀបការធ្វើជាកូនប្រសារខ្លួន ធ្វើបែបនេះព្រោះគាត់សង្ឃឹមថាកូនស្រីនឹងមានជីវិតគូដែលល្អប្រសើរមិនដូចជាគាត់។
៥. Cheaper by the Dozen (២០០៣)
យោងតាម IMDb រឿងនេះនិយាយពីគ្រួសារ Bakers ដែលមានសមាជិករហូតដល់១៤នាក់បានផ្លាស់ប្ដូរពីរស់នៅក្នុងទីក្រុងតូច Illonois ទៅរស់នៅទីក្រុងធំក្រោយពេលដែល Tom Baker បានសម្រេចក្ដីសុបិនបានការងារធ្វើជាគ្រូបង្វឹកបាត់ទាត់នៅសកលវិទ្យាល័យ។ ចំណែកភរិយារបស់គាត់ក៏សម្រេចក្ដីសុបិនបានបោះពុម្ពសៀវភៅដំបូងដូចគ្នា។ ខណៈដែលភរិយាលោកត្រូវចេញទៅឆ្ងាយដើម្បីឃោសនានិងផ្សព្វផ្សាយពីសៀវភៅសៀវភៅរបស់គាត់ Tom ជួបការលំបាកជាខ្លាំងក្នុងការរៀបរយសមាជិកក្នុងគ្រួសារនិងដឹកនាំក្រុមបាល់ទាត់របស់គាត់ដែលធ្វើឱ្យគ្រួសារដែលធ្លាប់មានតែសំណើចនិងភាពរីករាយចាប់ផ្ដើមបែកខ្ញែកគ្នា។រឿងនេះផ្ដល់នូវសារអប់រំមួយគឺយើងមិនអាចជ្រើសរើសធ្វើការបានគ្រប់មុខនោះទេតែយើងអាចរើសយកការងារដែលយើងស្រលាញ់។
