តារាសម្ដែងសញ្ជាតិអូស្ត្រាលីលោក Hugh Jackman បានប្រកាសថាខ្លួនមានជំងឺកូវីដ-១៩ ប៉ុន្តែអាការៈស្រាល ដោយធ្វើទុក្ខត្រឹមតែក្ដោខ្លួនផ្ដាសាយប៉ុណ្ណោះ។
នៅថ្ងៃទី២៩ ខែធ្នូ ឆ្នាំ២០២១ នេះ លោក Hugh Jackman បាននិយាយនៅក្នុងវីដេអូដែលលោក ផុសក្នុងផេកផ្ទាល់ខ្លួនថា «ខ្ញុំបានតេស្តរកឃើញមានវិជ្ជមាន ចំណែកអាការៈពេលនេះគឺផ្ដាសាយ។ ខ្ញុំឈឺកនិងហៀរសំបោ ប៉ុន្តែជារួមគឺមិនអីនោះទេ»។ នៅក្នុងវីដេអូនោះលោកបានជូនពរឱ្យអ្នកគាំទ្រទាំងអស់មានសុខសុវត្ថិភាពនិងមានសុភមង្គលក្នុងឱកាសឆ្នាំថ្មីឆ្នាំសកលដែលនឹងជិតមកដល់នេះ។
តារាសម្ដែងល្បីនិយាយថាលោកត្រូវសំរាកមួយរយៈ ទើបត្រលប់ទៅធ្វើការវិញ ដូច្នេះលោកត្រូវព្យួរការសម្ដែងសិន។ កាលពីសប្ដាហ៍មុន Sutton Foster ដែលជាសម្ដែងជាមួយគ្នាបានធ្វើតេស្ដហើយក៏រកឃើញថាមានកើតជំងឺកូវីដ-១៩ ដូចគ្នា។
Hugh Jackman កើតនៅឆ្នាំ១៩៦៨ ក្នុងប្រទេសអូស្ត្រាលី លោកល្បីល្បាញតាមរយៈការសម្ដែងជាតួអង្គចចកក្នុងភាពយន្តជាស៊េរី X-Men និងអាជីពជាតារាចម្រៀង។ លោកបានរៀបការតារាសម្ដែង Furness ដែលមានអាយុបងលោករហូតដល់ទៅ ១៣ឆ្នាំ ដោយអ្នកទាំងពីររៀបការនៅឆ្នាំ១៩៩៦ នៅក្នុងប្រទេសកំណើតអូស្ត្រាលី។ ថ្វីត្បិតតែរៀបការជាមួយគ្នាជាច្រើនឆ្នាំហើយក្ដីប៉ុន្តែលោក Jackman នៅតែបង្ហាញភាពផ្អែមល្ហែមរបស់លោកចំពោះឧត្តមភរិយាជានិច្ច៕