ថ្មីនេះ ខណៈតារាសម្ដែងប្រុសភូមាលោក Paing Takhon បានគ្រងតំណែងបុរសសង្ហាលំដាប់ទី១ នៅលើពិភពលោក ខាងអ្នកគ្រប់គ្រងនិងរៀបចំ TC Candler កំពុងអំពាវនាវនិងទាមទារទៅកាន់រដ្ឋាភិបាលភូមាឱ្យមានការដោះលែងតារាប្រុសសង្ហារូបនេះ ឱ្យមានសេរីវិញ។ បើតាមគេដឹង ស្ថាប័ន TC Candler គឺបានចាប់ផ្ដើមចាត់ចំណាត់ថ្នាក់តារាប្រុសស្រីទូទាំងពិភពលោក តាំងពីឆ្នាំ១៩៩០ មកម្លេះ ហើយស្ថានប័ននេះក៏មានឥទ្ធិពលខ្លាំងក្នុងសង្គមមហាជនអ្នកគាំទ្រទូទាំងពិភពលោកផងដែរ។
ស្ថាប័ន TC Candler បានប្រគល់តំណែងឱ្យតារាប្រុសសង្ហា Paing Takhon គ្រងលំដាប់ទី ១ នៃ «The 100 Most Handsome Faces of 2021» ឬតារាប្រុសមុខសង្ហាដាច់គេ២០២១ តែជារឿងអកុសល ដំណឹងល្អកើតឡើងស្របពេលដែលខាងរដ្ឋាភិបាលភូមា សម្រេចកាត់ទោសតារាប្រុសរូបនេះឱ្យជាប់ពន្ធនាគារចំនួន៣ឆ្នាំ និងរងទារុណកម្មដោយប្រើកម្លាំងពលកម្មធ្ងន់ធ្ងរ។ បើតាមសម្ដីរបស់អ្នកតំណាងឱ្យតារាប្រុស Paing Takhon បានអះអាងថា ការពិតទៅសាក្សីដែលអះអាងថា តារាប្រុស Paing Takhon មិនបានចូលរួមក្នុងបាតកម្មប្រឆាំងនឹងយោធារដ្ឋាភិបាលភូមានោះ មានសុខភាពមិនល្អ មិនអាចឡើងបញ្ជាក់នៅសាលតុលាការបាន ទើបបណ្ដាលឱ្យអយ្យកា និងក្រុមព្រឹក្សា សម្រេចបើកការស៊ើបអង្កេតដោយខ្លួនឯង និងបង្ហាញរូបរបស់តារាប្រុស Paing Takhon ក្នុងហ្វូងក្រុមអ្នកបាតុកម្មធ្វើជាភ័ស្តុតាងតែម្ដង។
ចុចអានព័ត៌មាន៖ ប្រុសស្អាត Paing Takhon តារាសម្ដែងល្បីប្រចាំមីយ៉ាន់ម៉ា ជាប់ពន្ធនាគារចំនួន៣ឆ្នាំ…
ស្របពេលដែលតុលាការក៏បានសួរសំណួរទៅកាន់តារាប្រុស Paing Takhon ថា« លោកបានចូលរួមក្នុងក្រុមបាតុកម្មនោះឬទេ?» ពេលនេះលោកក៏បានព្រមទទួលការចោទប្រកាន់ ទើបធ្វើឱ្យតុលាការសម្រេចកាត់ទោសតាមចម្លើយសារភាពរបស់លោកតែម្ដង។ ចំណែកមេធាវីរបស់លោក Paing Takhon មិនត្រូវបានអនុញ្ញាតិឱ្យនិយាយអ្វីទាំងអស់នៅក្នុងតុលាការ។ បើទោះបីមានការសម្រេចរបស់តុលាការ ប្រកាសកាត់ទោសលោក Paing Takhon ឱ្យជាប់ពន្ធនាគារចំនួន៣ឆ្នាំ និងរងទារុណកម្មដោយប្រើកម្លាំងពលកម្មយ៉ាងធ្ងន់ធ្ងរក៏ដោយ ក៏ប៉ុន្ដែមេធាវីរបស់តារាប្រុសរូបនេះបានអះអាងថា «គណៈក្រុមព្រឹក្សាមិនមានបទពិសោធន៍ក្នុងការកាត់ក្ដីឡើយ»។
យ៉ាងណាមិញ ខាងស្ថាប័ន TC Candler ក៏បានបំផុសឱ្យមហាជនអ្នកគាំទ្រលោក Paing Takhon បង្ហោះសារជាសកលថា «Free This Man » និង «Free Paing Takhon Political PRisoner in Myanmar» ដើម្បីទាមទារឱ្យមានការដោះលែងតារាប្រុសសង្ហារូបនេះឱ្យមានសេរីភាពពេញលេញឡើងវិញ៕
ទស្សនាវីដេអូនេះ៖