Thursday, December 8 Login

ខ្សែ​ប្រយុទ្ធ​ប្រេស៊ីល Neymar da Silva Santos Júnior ដែល​អ្នក​គាំទ្រ​ស្គាល់​ថា​ជា Neymar បាន​បន្ត​កិច្ចសន្យា​ជាមួយ​ក្លិប​បាល់ទាត់ Paris Saint-Germain (PSG) នៅ​លីគ​ប្រទេស​បារាំង​រហូត​ដល់​ថ្ងៃ​ទី​៣០ ខែ​មិថុនា ឆ្នាំ​២០២៥ ខាង​មុខ ក្រោយ​​ចូលរួម​ដំបូង​កាល​ពី​ឆ្នាំ​២០១៧ ក្នុង​តម្លៃ​ខ្លួន​ប្រមាណ​២០០​លាន​ផោន ឬ ជាង​២៩៧​លាន​ដុល្លារ នៅ​គ្រា​នោះ។

កិច្ចសន្យា​ថ្មី​របស់​កីឡាករ​វ័យ​២៩ឆ្នាំ​ខាងលើ បាន​ព្រមព្រៀង​គ្នា​នៅ​យប់​ថ្ងៃ​សៅរ៍ សប្ដាហ៍​នេះ ខណៈ​​៥ឆ្នាំកន្លងមក ​​រូប​គេ​ទាត់​បាល់​បញ្ជូល​ទី​ឱ្យ​ PSG បាន​៨៥គ្រាប់ និង​បញ្ជូន​បាល់​ឱ្យ​មិត្ត​រួមក្រុម​ទាត់​បញ្ជូល​ទី​បាន​៥១លើក ក្នុង​ចំណោម​១១២ ប្រកួត​មក​នេះ។

បើតាម​សារព័ត៌មាន Eurosport បញ្ជាក់​ថា​ក្រោយ​ Neymar កាន់​ប៊ិច​បន្ត​កិច្ចសន្យា​ជាមួយ PSG លើក​ទី២​នេះ រូប​គេ​​នឹង​ទទួល​បាន​ប្រាក់​​ជាង​២៦​លាន​ផោន ឬ ជាង​៣៦លាន​ដុល្លារ​អាមេរិក ក្នុង​១​រដូវកាល ខណៈ​ Neymar ​នឹង​បាន​​ប្រាក់​​​ពលកម្ម​ប្រមាណ ៥០ម៉ឺន​ផោន ឬ ជិត​៧០ម៉ឺន​ដុល្លារ​អាមេរិក ឬ​​ជាង​២,៨២១ លាន​រៀល ក្នុង​១​សប្ដាហ៍​រហូត​ដល់​ផុត​កុងត្រា​នៅ​ឆ្នាំ​២០២៥ ខាង​មុខ។

វិបសាយ​ផ្លូវការ​របស់​ក្លិប PSG បាន​បង្ហោះ​ឃ្លិប​វីដេអូ ខ្លី​សម្ភាសន៍​ផ្ទាល់​ជាមួយ​កីឡាករ​​សមាជិក​ជម្រើស​ជាតិ​ប្រេស៊ីល រូប​នេះ​ថា៖«ខ្ញុំ​ពិត​ជា​មាន​កិត្តយស​ណាស់​ដែល​បាន​បន្ត​កិច្ចសន្យា​ជាមួយ​ក្លិប PSG។ មោទនភាព​និង​ជា​ផ្នែក​មួយ​នៅ​ក្នុង​ក្រុម​ដើម្បី​ធ្វើការ​រួមគ្នា​ជាមួយ​មិត្តរួម​ក្រុម​ផ្សេងៗ គ្រូ​បង្វឹក​ដ៏​ល្អ និង​ជា​ផ្នែក​មួយ​នៃ​ប្រវត្តិសាស្រ្ត​របស់​ក្លិប។ ទាំង​ជា​រឿង​ដែល​ធ្វើ​ឱ្យ​ខ្ញុំ​ជឿជាក់​ទៅ​លើ​ផែនការ​​ដ៏​អស្ចារ្យ​ក្នុង​ក្លិប។ ខ្ញុំ​បាន​​រីកលូតលាស់​នៅ​ទីនេះ ក្នុង​នាម​ជា​កីឡាករ ដូច្នេះ​ខ្ញុំ​រីករាយ​ក្នុង​ការ​បន្ត​កិច្ចសន្យា​ថ្មី និង​សង្ឃឹម​ថា​នឹង​ឈ្នះ​ពាន ជា​ច្រើន​ជាមួយ​គ្នា»។

​ក្រោយ​ទៅ​ដល់ Paris Saint-Germain កីឡាករ Neymar ធ្លាប់​បាន​ឈ្នះ​ពាន​ជា​ច្រើន​​ជាមួយ​ក្លិប​ដែល​មាន​​ថៅកែ​ជា​ជនជាតិ​​កាតារ ដូចជា៖
១) ជើង​ឯក​ពាន​លីគ​កំពូល​ប្រទេស​បារាំងLigue 1 ចំនួន​​៣​លើក
២) ជើង​ឯក​ពាន Coupe de France ចំនួន​២ លើក
៣) ជើង​ឯក​ពាន Coupe de la Ligue ចំនួន​២លើក
៤) ជើង​ឯក​ពាន Trophée des Champions ចំនួន​២លើក
៥) ជើង​ឯក​រង​ពាន​ទ្វីប​អឺរ៉ុប UEFA Champions League ចំនួន​១លើក

Share.

Leave A Reply