ម្ចាស់មេដាយមាសពិភពលោកវិញ្ញាសាវាយយកពិន្ទុ ប្រកួតកីឡាប៉េតង់ កីឡាការិនី អ៊ុក ស្រីមុំ ទទួលបានថវិការលើកទឹកចិត្តពីសម្តេចតេជោ ហ៊ុន សែន នាយករដ្ឋមន្ត្រីកម្ពុជា នៅព្រឹកថ្ងៃពុធ ទី០៥ ខែមករា ឆ្នាំ២០២២នេះ នៅវិមានសន្តិភាព។
កីឡាការិនី អ៊ុក ស្រីមុំ ដណ្តើមបានមេដាយមាសពិភពលោកកាលពីខែវិច្ឆិកា ឆ្នាំ២០២១ ហើយនេះទទួលបានមេដាយមាសកម្រិតពិភពលោក៥សម័យកាលជាប់គ្នា សម្រាប់កីឡាការិនីកម្ពុជា លើការប្រកួតកីឡាប៉េតង់លើវិញ្ញាសាវាយពិន្ទុ ខណៈវីរកីឡាការិនី កែ ឡេង ធ្លាប់ឈ្នះ ៤សម័យកាលរួមមាន៖ ឆ្នាំ២០១៣ នៅបារាំង, ឆ្នាំ២០១៥ នៅថៃ, ឆ្នាំ២០១៧ នៅចិន និងឆ្នាំ២០១៩ នៅប្រទេសកម្ពុជា។
លទ្ធផលប្រកួតកីឡាប៉េតង់លើវិញ្ញាសាវាយពិន្ទុនៅប្រទេសអេស្បាញ បានដំណើរការប្រកួតពីថ្ងៃទី១២ ដល់ថ្ងៃទី១៤ ខែវិច្ឆិកា ហើយកីឡាការិនី អ៊ុក ស្រីមុំ បានប្រកួតជម្រុះបឋមឈរចំណាត់ថ្នាក់លេខ៣ ក្នុងចំណោមកីឡាការិនីខ្លាំងៗលើពិភពលោក ៣៦រូប។ ចូលដល់វគ្គ៨នាក់ចុងក្រោយកីឡាការិនីរបស់កម្ពុជា រូបនេះបានយកឈ្នះលើកីឡាការិនីកាណាដា ដោយពិន្ទុ ២៩-២ និងបន្តទម្លាក់កីឡាការិនីន័រវេស ដោយពិន្ទុ ២៥-១៨ ហើយចុងក្រោយបានយកឈ្នះលើកីឡាការិនីថៃ ដោយពិន្ទុ ៣៧-២៩ ក្លាយជាម្ចាស់មេដាយមាសតែម្ដង។ រីឯវិញ្ញសាក្រុមនារី ៣ ទល់ ៣ ក្រុមប៉េតង់កម្ពុជា បានធ្លាក់ត្រឹមវគ្គ៨ក្រុមចុងក្រោយ។
នេះជាលើកទី២ហើយសម្រាប់កីឡាការិនី អ៊ុក ស្រីមុំ ដែលដណ្តើមបានមេដាយមាសកម្រិតពិភពលោកនេះ ខណៈឈ្នះពីលើកដំបូងកាលពីឆ្នាំ២០១៧ផងដែរ តែលើវិញ្ញាសាឯកត្តជន។ កីឡាប៉េតង់នេះកីឡាករ សុខ ចាន់មាន ក៏ធ្លាប់ដណ្តើមបានមេដាយមាសកម្រិតពិភពលោកនេះផងដែរលើវិញ្ញាសាឯកត្តជន។
រាជរដ្ឋាភិបាលបានកំណត់លើកទឹកចិត្តដល់កីឡាករ និងកីឡាការិនី តាមរយៈអនុក្រឹត្យដោយកំណត់ផ្តល់ប្រាក់រង្វាន់ប្រមាណ ៤០លានរៀល សម្រាប់កីឡាករ កីឡាការិនី ដែលដណ្តើមបានមេដាយកម្រិតពិភពលោក។
សូមបញ្ជាក់ថាសហព័ន្ធកីឡាប៊ូល និងប៉េតង់កម្ពុជា ជាប្រភេទសហព័ន្ធកីឡាដែលមានសក្តានុពលក្នុងការដណ្តើមយកមេដាយ លើឆាកអន្តរជាតិ ដោយចាប់តាំងពីការបង្កើតសហព័ន្ធរហូតមកដល់ឆ្នាំ២០២០ កម្ពុជាទទួលបានមេដាយកម្រិតអន្តរជាតិសរុបប្រមាណ ៣៧០គ្រឿង (មាស១០៨ ប្រាក់ ១៣១ និងសំរឹទ្ធិ ១៣១)៕