មហាជនអ្នកគាំទ្របានស្គាល់អ្នកនាង តាំ គីមចាំង ឬមានឈ្មោះក្នុងសិល្បៈថា ប៊ីរីយា ជាតារាសម្ដែងស្រីរូបស្រស់សោភាកំពុងតែលេចធ្លោខ្លាំងក្នុងខ្សែភាពយន្តភាគ និងខ្នាតធំ ហើយអ្នកនាងជាកូនកាត់ខ្មែរឥណ្ឌា ជាប់សាច់ឈាមខាងឪពុក។ តារាសម្តែងស្រីមានរាងខ្ពស់ស្រឡះ ប៊ីរីយា បានរៀបការជាមួយនឹងស្វាមីឈ្មោះ តាំង ហៃឡេង កាលពីថ្ងៃទី ១០ ខែ ធ្នូ ឆ្នាំ ២០១៤ និងមានកូនស្រីម្នាក់គឺជាចំណងស្នេហ៍ ខណៈបច្ចុប្បន្ននេះ វ័យ ៦ ឆ្នាំ ឈ្មោះថា Labina និងក៏កំពុងតែក្លាយជាពន្លកនៃតារាសម្តែងតាមគន្លងម្តាយ។
បន្ទាប់ពីសម្រាលកូនស្រី Labina អ្នកនាង ប៊ីរីយា បានបិទទំព័រសម្ដែងភាពយន្តយ៉ាងស្ងាត់ច្រៀប ហើយងាកមកពង្រឹងមុខរបររកស៊ីក្រៅសិល្បៈវិញម្ដង។ នៅឆ្នាំ២០១៧ តារាសម្ដែងស្រីរូបនេះបានបើកហាងលក់ក្រណាត់ប៉ាក់ ដែលនាំផលិតផលចូលពីប្រទេសបារាំង និងអ៊ីតាលី។ ចំពោះការបើកហាងក្រណាត់ប៉ាក់នោះ បានដំណើរការយ៉ាងរលូនក្រោយអ្នកនាងបានប្រកាសដកខ្លួនចេញសិល្បៈ ហើយបានប្រមូលដើមទុនពីស្វាមី និងគ្រួសារក្នុងការវិនិយោគរកស៊ីដែលលក់ក្រណាត់សុទ្ធតែមានគុណភាពខ្ពស់ប្រណិត។ លុះមកទល់ចុងខែ ធ្នូ ឆ្នាំ២០២១ អ្នកនាង ប៊ីរីយា ក៏បានបង្ហោះជាសាធារណៈនៅលើហ្វេសប៊ុករបស់ខ្លួន ដោយប្រកាសឱ្យដឹងថា អ្នកនាងបានបង់ខាតច្រើនជាមួយរបររកស៊ីហើយ បន្ទាប់ពីឆ្លងកាត់ស្ថានភាពដ៏លំបាកនៃវបត្តិកូវីដ១៩។
អ្នកនាងបានអះអាង ថា «លាហើយកន្លែងចាស់ផ្លាស់មកកន្លែងថ្មី អរគុណរាល់ការឈឺចាប់ការមើលងាយនិងការនិយាយដើម អរគុណរាល់បទពិសោធន៍ជីវិតខាងក្រៅអាក្រក់និងល្អ ហើយអរគុណមនុស្សជាទីស្រលាញ់គ្រប់គ្នាដែលតែងតែនៅឈរក្បែរហូតមកដល់ថ្ងៃនេះ។ ជាពិសេសអរគុណខ្លួនឯងដែលរឹងមាំអាចឈរទៅមុខបានរហូតដល់ខ្លួនឯងនឹកស្មានមិនដល់ថាខ្លួនឯងអាចធ្វើវាបាន។ ធ្វើជាមនុស្សកុំអស់សង្ឃឹម សេដ្ឋីក៏អាចធ្លាក់ខ្លួនក្រអ្នកក្រ អាចមានប្រសិនបើអ្នកនៅតែមានសង្ឃឹមនឹងការខំប្រឹង និងមានភាពស្មោះត្រង់ និយាយឱ្យមានការពិតនឹងកាន់ពាក្យសច្ច:ក្នុងខ្លួន ។
សូមជូនពរឱកាសចូលឆ្នាំសកល២០២២សូមជូនពរឱ្យបងៗអតិថិជន Bina Live នឹងបងប្អូនក្រុមគ្រួសារមិត្តក្នុង Facebook ទាំងអស់ជួបតែសេចក្តីសុខ នឹង ហេងៗឆ្នាំថ្មី»។ ក្រៅពីរើចេញពីទីតាំងរកស៊ីដ៏ធំនោះហើយ អ្នកនាង ប៊ីរីយា នៅមិនទាន់បានបញ្ចេញកន្លែងរកស៊ីថ្មីនេះទេ រហូតធ្វើឱ្យមហាជនសង្ស័យថា អ្នកនាងបានក្ស័យធនហើយ។ តែយ៉ាងណាមិញ គេក៏បានឃើញអ្នកនាងបង្ហោះការរកស៊ីនៅលើហ្វេសប៊ុក ដែលមានលក់ផលិតផលច្រើន តែមិនមែនក្រណាត់ប៉ាក់ដូចមុនទៀតទេ។
ថ្មីៗនេះ អ្នកនាង ប៊ីរីយា ក៏បានងាកមកចាប់អាជីពសិល្បៈវិញដែរ ដោយបង្ហាញខ្លួនថត MV ថ្មីជាមួយតារាស្រីឈានមុនប្រចាំផលិតកម្ម ហង្សមាស គឺអ្នកនាង ឱក សុគន្ធកញ្ញា ។ តាមការបង្ហោះរបស់អ្នកនាង ប៊ីរីយា បានឱ្យដឹងថា បទថ្មីនោះមានចំណងជើងថា «មានក្តីសុខហើយមែនទេ»។ អ្នកនាង ប៊ីរីយា ក៏បានរៀបរាប់នៅលើហ្វេសប៊ុករបស់ខ្លួនថា «ឆ្នាំថ្មី២០២២ ប្រឡូកថត MV ថ្មី ខានថតយូរ ពេលត្រលប់មកថតវិញដូចប្លែកៗ បទចំរៀង #មានក្តីសុខហើយមែនទេ»។
គួរដឹងបន្ថែមថា ក្រោយប្រកាសវិលចូលសិល្បៈជាថ្មីនេះ គេនៅសម្គាល់ឃើញថា អ្នកនាង ប៊ីរីយា តែទីផ្សារនៅតែមានខ្ពស់ដូចដើមទាំងការថតស្ប៉ត ដើរម៉ូដ និងថតភាពយន្តផងដែរ៕