តារាសម្ដែងដែលធ្លាប់តែជាប់រហស្សនាម រាជិនីគ្មានរឿងអាស្រូវ Taew បានបើកចិត្តទាំងទឹកភ្នែកក្នុងកម្មវិធីសម្ភាសន៍មួយថាជីវិតរបស់ខ្លួនប្រែជាក្រឡាប់ចាក់ ពីបាតដៃទៅខ្នងដៃ ធ្វើអ្វីក៏ខុស ធ្វើអ្វីក៏ក្លាយជាដំណឹងមានតែមនុស្សជេរប្រមាថនិងរិះគន់។
សម្រាប់តារាសម្ដែងស្រីប្រចាំប៉ុស្តិ៍លេខ៣រូបនេះ មួយរយៈចុងក្រោយឃើញថាមិនថាកញ្ញាធ្វើអ្វីនោះទេ គឺមានតែសំឡេងរិះគន់និងប្រមាថរហូត។
ឆ្លៀតក្នុងឱកាសចូលរួមជាភ្ញៀវកិត្តិយសក្នុងកម្មវិធីជជែកកម្សាន្ត Woody FM ស្រីស្រស់រូបនេះបានបើកចិត្តនិយាយពីរហស្សនាមរាជិនីគ្មានរឿងអាស្រូវរបស់ខ្លួនប៉ុន្តែស្រាប់តែសុខៗគ្រប់យ៉ាងប្រែប្រួលអស់ មិនថាកញ្ញាធ្វើអ្វីក៏ទទួលរងនូវសម្ដីប្រមាថនិងរិះគន់ជានិច្ចមិនថាកញ្ញាបង្ហោះអ្វីនោះទេកញ្ញាត្រូវតែចេញមុខទទួលខុសត្រូវជានិច្ច ប៉ុន្តែមានពេលខ្លះមនុស្សដែលមិនស្គាល់កញ្ញាមិនដឹងរឿងអ្វីសោះបែរជាចូលមក Comment ជេរឬប្រមាថដល់កញ្ញា។
ចំពោះករណីខាងលើនេះកញ្ញាបានអះអាងថាកញ្ញាមិនអីទេបើអ្នកដទៃមិនយល់ក៏ថ្វីដែរ សំខាន់មនុស្សនៅជុំវិញខ្លួនកញ្ញាយល់ទៅគឺបានហើយ ចំណែករឿងដែលកញ្ញាបង្ហោះរូបឬវីដេអូនៅលើ Social Media មិនថាជាវីដេអូរាំឬឈុតហែលទឹកនោះគឺប្រៀបដូចជាកំណត់ហេតុប្រចាំថ្ងៃដែលមនុស្សគ្នាអាចត្រលប់មកមើលវិញបានថាថ្ងៃនោះយើងធ្វើអី ហើយបានទៅណាខ្លះ។
កញ្ញា Taew បាននិយាយដល់រឿងរ៉ាវស្នេហារបស់ខ្លួនជាមួយនឹងសង្សារបច្ចុប្បន្នដែលជាបុរសអ្នកមានថា ការពិតកញ្ញាគឺជាមនុស្សម្នាក់ដែលរឹងមាំមិនទន់ជ្រាយនោះទេនៅចំពោះមុខគ្រួសារនិងបងប្អូនមិត្តភក្ដិ តែពេលនៅក្បែរសង្សារកញ្ញាបែរជាមានអារម្មណ៍ថាខ្លួនទន់ជ្រាយ ដោយសារតែសង្សារជាបុរសម្នាក់មានចិត្តស្មោះត្រង់។ សម្រាប់ស្នេហាលើកនេះកញ្ញាមានចិត្តរីករាយខ្លាំងណាស់ ដូច្នេះទើបកញ្ញាចង់រក្សាអនុស្សាវរីយ៍ល្អៗទុក មិនថាជារឿងប៉ារបស់កញ្ញាក៏ចង់រក្សាទុកដែរ ដូច្នេះទើបសម្រេចចិត្តសរសេរកំណត់ហេតុតាំងពីថ្ងៃជួបគ្នាដំបូងដែលបានជួបគ្នា។
តួឯកស្រីព្រះម៉ែនាគីរូបនេះបានលើកឡើងចំពោះរឿងដែលខ្លួនកើត «ជំងឺភ័យស្លន់ស្លោ» ថាកញ្ញាកើតជំងឺនេះប្រហែលជា៤ទៅ៥ឆ្នាំហើយ ចង់បំបាត់អាការៈដែលបង្កដោយជំងឹនេះត្រូវទទួលទានថ្នាំ ប៉ុន្តែកញ្ញាព្យាយាមមិនប្រាស់ថ្នាំ ដោយបង្វឹកដង្ហើម និងរៀនចេះទម្លាក់ចោលអ្វីដែលជាសម្ពាធ៕
ប្រភព៖ Khaosod