សិល្បករដ៏ឆ្នើមមួយរូបរបស់កម្ពុជា គឺលោក ប៉ែន រ៉ូប៊ីត បានរៀបចំការតាំងពិព័រណ៌រូបគំនូរ ដែលលោកបានផ្ដោតសំខាន់លើទស្សនៈ «សេរីភាពនៃថ្ងៃស្អែក» នៅវិចិត្រសាល«សិល្បៈត្រជាក់ភ្នែក» ដែលបានប្រព្រឹត្តតាំងពីថ្ងៃទី១០ ខែមករា ឆ្នាំ២០២២ កន្លងមកម្លេះ។ ត្រឹមរយៈពេលតែ២ថ្ងៃប៉ុណ្ណោះ រូបគំនូរជាច្រើនផ្ទាំងរបស់លោក បានធ្វើឱ្យមហាជនចាប់អារម្មណ៍យ៉ាងខ្លាំង និងចង់ស្វែងយល់ពីគំនិតបង្កប់យ៉ាងស៊ីជម្រៅតាមរយៈគំនូរនោះ។
តាមការពណ៌នារបស់សិល្បករ ប៉ែន រ៉ូប៊ីត បានរៀបរាប់ថា «កម្រងស្នាដៃនេះ សេរីភាពនៃថ្ងៃស្អែក.. មានកំណើតចេញមកពីចំណាប់អារម្មណ៍របស់ខ្ញុំដ៏យូរយារ ណាស់មកហើយទៅលើគតិផ្សេងៗទាក់ទិនទៅនឹង អំណាច យោធា ភាពជារដ្ឋាភិបាល និងប្រធានវិស័យភាព ព្រមទាំងសហសម្ពន្ធរវាងគតិទាំងនេះ ពោពេញទៅដោយការស្រមើស្រមៃនិងការសង្កេត។ កម្រងស្នាដៃនេះគោចរនិងពង្រីកវិសាលភាពលើអ្វីដែលហៅថា «សណ្តាប់ធ្នាប់.» ដែលនេះអាចជាអង្គការ/ការរៀបចំ និង ការទុកដាក់, ភាពសុខដុម និង ការត្រួតត្រា, ការបង្គាប់បញ្ហា, និង វណ្ណៈ»។
លោកបន្ដថា« នៅក្នុងធម្មជាតិរបស់វា «សណ្ដាប់ធ្នាប់» ត្រូវបានចាក់ស្រេះឬបង្កប់ទៅដោយកម្លាំងប្រឆាំងគ្នាពីរ( នេះប្រសិនបើមិនមែនជា«កង»ដែលមានមុខងារពីរ ឬ ប្រព័ន្ធទ្វេភាគីទេនោះ) នៃភាពវិជ្ជភាព និង ភាពអវិជ្ជមាននៃជីវិត និង ការស្លាប់, នៃភាពល្អ(ស្អាត) និង ភាពអាក្រក់, នៃអំណាច និង ភាពទន់ខ្សោយ, នៃការពិត និង ការស្រមើស្រមៃ, ហើយនៃមហាសុគតិភព (កន្លែងដែលល្អឥតខ្វះកើតនៅក្នុងការស្រមើស្រមៃ) និង មហាអគពិភព (កន្លែងដែលអាក្រក់ជួជាតិកើតនៅក្នុងការស្រមើស្រមៃ)»។
លោកបញ្ជាក់ទៀតថា «ការបង្កើតទេសភាពសេរីភាពនៃថ្ងៃស្អែកទាំងអស់មានគំនូរម្ភៃបួនផ្ទាំង មានដំណើរចេញពីរូបចំនួនពីរផ្ទាំង ស្បែកជើងទាហាន និងជំនូរអជីវចល ដែលស្នាដៃទាំងពីរនេះមានរចនាបថ បែបផែនជា«គំនូរជីវចល (Sol | LleNature: Morte)-ដូចគ្នា, ឬ យ៉ាងហោចណាស់ជា«គំនូរអជីវចល» ព្រោះតែសញ្ញាណនិម្មាបនកម្មរបស់រូបទាំងនេះផ្ទាល់»។
រូបភាពពី សិល្បៈត្រជាក់ភ្នែក រូបភាពពី សិល្បៈត្រជាក់ភ្នែក
សិល្បករ ប៉ែន រ៉ូប៊ីត ជាងគំនូរសហសម័យ មួយរូបដែលធ្លាប់បានដាក់បង្ហាញស្នាដៃគំនូររបស់ខ្លួននៅលើឆាកអន្តរជាតិក្នុងប្រទេសកាណាដា ក្នុងកម្មវិធីតាំងពិព័រណ៍គំនូរអន្តរជាតិក្នុងឆ្នាំ ២០១៤ ។ លោកមានស្រុកកំណើតនៅក្នុងខេត្ត បាត់ដំបង និងបានបញ្ចប់ការសិក្សានៅអង្គការហ្វាពន្លឺសិល្បៈផ្នែកសិល្បៈសូនរូបក្នុងឆ្នាំ ២០១០ ។ លោកមានចំណូលចិត្តគូរគំនូរតាំងតែពីលោកនៅវ័យកុមារ ហើយដោយសារតែជីវភាពមិនធូរធារ និងមិនមានសមត្ថភាពក្នុងការសិក្សា អង្គការហ្វាពន្លឺសិល្បៈក៏បានផ្តល់ឱកាសឲ្យលោកបានសិក្សាផ្នែកជំនាញខាងលើក្នុងឆ្នាំ ២០០៥ ៕
រូបភាពពី សិល្បៈត្រជាក់ភ្នែក រូបភាពពី សិល្បៈត្រជាក់ភ្នែក រូបភាពពី សិល្បៈត្រជាក់ភ្នែក
រូបភាពពី សិល្បៈត្រជាក់ភ្នែក រូបភាពពី សិល្បៈត្រជាក់ភ្នែក រូបភាពពី សិល្បៈត្រជាក់ភ្នែក រូបភាពពី សិល្បៈត្រជាក់ភ្នែក