សារព័ត៌មាន The Star របស់ម៉ាឡេស៊ី បានបញ្ជាក់ថាក្លិប Pahang FA របស់ម៉ាឡេស៊ី ដែលកីឡាករ ចាន់ វឌ្ឍនាកា ធ្លាប់ប្រកបអាជីពក្នុងរដូវកាល ២០១៨ នៅពេលនេះកំពុងតែចាប់អារម្មណ៍ទៅលើខ្សែប្រយុទ្ធកូនកាត់ឡាវ-បារាំង Billy Ketkeophomphone ដើម្បីបំពេញកូតា កីឡាករអាស៊ាន ក្នុងបញ្ជីកីឡាករប្រទេសរបស់ខ្លួន ក្នុងការត្រៀមរដូវកាលឆ្នាំ២០២២ ខាងមុខ។
លោកគ្រូបង្វឹក Christophe Gamel ជនជាតិបារាំង បានសម្លឹងមើលឃើញខ្សែប្រយុទ្ធវ័យ៣១ឆ្នាំរូបនេះ បន្ទាប់ពីរូបគេបានបង្ហាញខ្លួនជាមួយក្រុមជម្រើសជាតិឡាវ ជាលើកដំបូងក្នុងព្រឹត្តិការណ៍កីឡា AFF Suzuki Cup 2020 ថ្មីៗនេះនៅប្រទេសសិង្ហបុរី។
កីឡាករ Billy ធ្លាប់ប្រកបអាជីពជាមួយក្រុមបាល់ទាត់ជាច្រើននៅប្រទេសបារាំង ពោលគឺធ្លាប់លេងឱ្យក្រុម Strasbourg, Sion, Tours, Angers, Auxerre, Cholet និងចុងក្រោយជាសមាជិកក្លិប Dunkerque។
ក្លិប Pahang FA ក្នុងរដូវកាល២០២១ កន្លងទៅបានចុះបញ្ជីកីឡាករបរទេសចំនួន៥ រូបដោយក្នុងនោះកីឡាករកូតាអាស៊ាន គឺកីឡាករ Aung Kaung Mannរបស់មីយ៉ាន់ម៉ា ហើយកីឡាករកូតាអាស៊ីកីឡាករ Kenny Athiu របស់អូស្រ្តាលី និងកីឡាករ៣រូបចម្រុះជាតិសាសន៍ មាន Hérold Goulonជនជាតិបារាំង Yakubu Abubakar ជនជាតិហ្គាណា និងកីឡាករ Manuel Hidalgo ជនជាតិអាហ្សង់ទីន។
គិតត្រឹមពេលនេះក្លិប៤ ក្នុងចំណោម១២ ជាសមាជិកពានរង្វាន់លីគកំពូលម៉ាឡេស៊ី បានចុះបញ្ជីកីឡាករកូតាអាស៊ាន ក្នុងក្រុមខ្លួនហើយដោយក្លិប Kuala Lumpur City នាំយកកីឡាករហ្វីលីពីន Kevin Mendoza ក្លិប Sabah យកកីឡាករឥណ្ឌូណេស៊ី Saddil Ramdani ក្លិប Selangor នាំយកកីឡាករសិង្ហបុរី Safuwan Baharudin និងក្លិប Terengganu នាំយកកីឡាករហ្វីលីពីន Luke Woodland។
សូមបញ្ជាក់ថាពានរង្វាន់លីគកំពូលម៉ាឡេស៊ី គ្រោងចាប់ផ្ដើមពីថ្ងៃទី៤ ខែមីនា ដល់ថ្ងៃទី១៧ ខែកញ្ញា ឆ្នាំ២០២២ ខណៈលីគទី២ ចាប់ផ្ដើមពីថ្ងៃទី៥ មីនា ដល់៣ កញ្ញា ឆ្នាំ២០២២ ក្រុមជើងឯកលីគកំពូលម៉ាឡេស៊ី មានឈ្មោះឡើងទៅលេងពាន AFC Champion League ហើយក្រុមជើងឯករងចូលរួមលេងពាន AFC Cup 2023 ខាងមុខ៕
