ក្រោយពីតារាកំប្លែងជើងចាស់ លោក តាចេក ជួបហេុតការណ៍ក្រឡាប់រ៉ឺម៉កកង់បីនៅលើភ្នំគីរីរម្យ ខណៈដឹកបន្លែនិងផ្លែឈើមួយចំនួនទៅលក់នោះ មហាជនអ្នកលេងបណ្ដាញសង្គមហ្វេសប៊ុក ជាពិសេសអ្នកគាំទ្រ និងអ្នកសិល្បៈមួយចំនួនបានបង្ហាញក្ដីអាណិតអាសូរ ចំពោះលោកតាជាពន់ពេក។
ចុចអានព័ត៌មាននេះ៖ តាចេក ក្រឡាប់រ៉ើម៉កកង់បី ខណៈដឹកបន្លែផ្លែឈើទៅលក់នៅលើភ្នំគីរីរម្យ
ជាក់ស្ដែងនៅពេលថ្មីៗនេះ សូម្បីតែថៅកែពេជ្រ ទ្រី ដាណា ក៏សង្វេគចិត្តខ្លាំង និងបានប្រកាសផ្ដល់ដើមទុនខ្លះឱ្យលោក តាចេក ដោយរៀបរាប់ថា «ឱតាចេកអើយ ទើបតែឃើញ មើលទៅសង្វេគចិត្តណាស់😢😢😢 ទើបសួរគេ ថាគាត់ឈប់សម្ដែងយូរហើយ ឃើញទៅលក់ទឹកសុទ្ធ ឥឡូវទៅលក់បន្លែ ប៉ុន្មានថ្ងៃមុនក្រឡាប់កង់បី របួសដោយទាំងកូនទៀត»។
អ្នកនាងបន្ដថា «ជីវិតយើងម្នាក់ៗ ឆ្លងកាត់ការលំបាករាប់មិនអស់ ហឹម!😔😔😔 ខ្ញុំនឹងជួយគាត់ខ្លះ ដើម្បីបានដើមទុន យកទៅរកស៊ីបន្ថែម! សុំសួរតិច ពូចេក នៅណាឥឡូវ ជួយប្រាប់ខ្ញុំផង🙏🙏🙏»។
គួររំលឹកដែរថា តារាកំប្លែងវ័យចំណាស់ លោក តាចេក ជាអតីតកូនក្រុមកំប្លែងនាយកុយ បានបាត់វត្តមានពីកញ្ចក់ទូរទស្សន៍ក្នុងកម្មវិធីកំប្លែងផ្សេងៗមួយរយៈធំហើយ ដោយលោកបានរសាត់អណ្ដែតទៅ ជួលតូបប្រកបមុខរបរលក់ផ្លែឈើ និងគ្រឿងភេសជ្ជៈបន្តិចបន្តួច គ្រាន់ចិញ្ចឹមជីវិត នៅតាមផ្លូវឡើងរមណីយដ្ឋានភ្នំគិរីរម្យ។ លោកតាធ្លាប់ប្រាប់អ្នកសារព័ត៌មានត្រយងថា អំឡុងពេលកូវីដ១៩ លោកបានសម្រេចចិត្តទៅជួលតូបលក់បន្លែឱ្យភរិយានៅផ្សារត្រែងត្រយឹងវិញ ព្រោះនៅលើភ្នំគីរីរម្យហាក់លក់មិនដាច់។ តែថ្មីៗនេះលោកបានវិលទៅលក់នៅលើភ្នំពេញ ស្របពេលដែលទេចរណ៍កំពុងកំរើកឡើងវិញ៕