កាលពីថ្ងៃទី១៣ ខែមករា ឆ្នាំ២០២២ វេលាម៉ោង៣រសៀល កម្លាំងជំនាញគណៈកម្មាធិការប្រយុទ្ធប្រឆាំងផលិតផលក្លែងក្លាយ ក្រសួងមហាផ្ទៃ បានធ្វើប្រតិបត្តិការចុះត្រួតពិនិត្យទីតាំងលក់គ្រឿងសំអាងមួយកន្លែងដែលមានឈ្មោះប្រ៊េនថា DMLN ក្រោយទទួលបានបណ្ដឹងពីជនរងគ្រោះដែលប្រើប្រាស់ផលិតផលហើយរងផលប៉ះពាល់។
សូមចុចអាន មេម៉ាយចាយរាង ដេត ម៉ាលីណា ផុសបង្អួតសំបុត្រស្នេហ៍លើកទីមួយដែលខ្លួនទើបតែបានទទួល!
ទីតាំងបង្ក្រាបផលិតផលប្រ៊េន DMLN ស្ថិតនៅក្បែរវត្តអង្គតាម៉ិញ នៅចំណុចផ្ទះលេខ៤៧២ ផ្លូវលេខដោនថោន៧ ភូមិគោកចំបក់ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។ ផលិតផលគ្រឿងសំអាងម៉ាកនេះត្រូវបានមហាជននិងអតិថិជនស្គាល់ថាជារបស់អ្នកនាង ដេត ម៉ាលីណា អតីតភរិយាលោក ឌួង ឆាយ។
យោងតាមការបញ្ជាក់អះអាងពីកម្លាំងជំនាញបានឱ្យដឹងថាការចុះប្រតិបត្តិការបង្ក្រាបនេះធ្វើឡើងក្រោយពីទទួលបានពាក្យបណ្ដឹងពីជនរងគ្រោះដែលកន្លងមកជាអតិថិជនធ្លាប់បានប្រើប្រាស់ផលិតផលខាងលើ ហើយរងផលប៉ះពាល់ដល់រាងកាយនិងស្បែកជាដើម។
ជុំវិញករណីបង្ក្រាបខាងលើនេះសារព័ត៌មានត្រយងកំពុងព្យាយាមទំនាក់ទំនងទៅកាន់អ្នកនាង ដេត ម៉ាលីណា ដើម្បីស្នើសុំការបំភ្លឺ ប៉ុន្តែនៅមិនអាចទំនាក់ទំនងជាមួយនឹងអ្នកនាងបានឡើយ៕
