យោងតាមការបញ្ជាក់របស់លោកបណ្ឌិត អាំង សិរីពិសិដ្ឋ ប្រធានគណ:កម្មការប្រតិបត្តិរៀបចំនិងគ្រប់គ្រងដំណើរការព្រឹត្តិការណ៍ប្រកួតកីឡាបាល់ទាត់ Prince Beer Pre-Season Cup 2022 បានឲ្យដឹងថា៖«បាទ! អ្នកគាំទ្រអាចចូលទស្សនាបាន ដោយគោរពតាមការកំណត់របស់សហព័ន្ធកីឡាបាល់ទាត់កម្ពុជា»។
នៅចុងរដូវកាលឆ្នាំ២០២១ កន្លងទៅគណៈកម្មាធិការប្រកួតបាល់ទាត់ជាតិកម្ពុជា (CNCC) បានកំណត់លក្ខខណ្ឌមួយចំនួន ដល់អ្នកគាំទ្រ មុនអាចចូលទស្សនាការប្រកួតបាល់ទាត់បានដូចជា៖
– អ្នកទស្សនាត្រូវចុះឈ្មោះជាមុន ដោយកំណត់នូវទីតាំងកៅអីអង្គុយ និងអាសយដ្ឋានច្បាស់លាស់ រួម ទាំងលេខទូរសព្ទ
– អ្នកទស្សនាត្រូវភ្ជាប់មកជាមួយនូវអត្តសញ្ញាណបណ្ណ និងបណ្ណចាក់វ៉ាក់សាំងបង្ការជំងឺកូវីដ-១៩
– ត្រូវធ្វើការវាស់កម្ដៅ និងសម្អាតអនាម័យដៃដោយអាល់កុល រឺដែលដល់ទស្សនិកជនទាំងអស់ មុន អនុញ្ញាតឱ្យចូលបរិវេណកីឡដ្ឋាន
– ត្រូវមានការរក្សាគម្លាតសុវត្ថិភាពប្រវែង១,៥ម៉ែត្រ ពីមនុស្សម្នាក់ទៅមនុស្សម្នាក់ទៀត
– ទស្សនិកជនត្រូវពាក់ម៉ាសជាប់ជាប្រចាំក្នុងកំឡុងពេលទស្សនាការប្រកួត
– មិនអនុញ្ញាតឱ្យទស្សនិកជន ដែលមានអាការៈសង្ស័យ រឺជំងឺផ្ដាសាយចូលទស្សនាការប្រកួតឡើយ
– ក្លិបបាល់ទាត់ដែលមិនបានអនុវត្តតាមវិធានរបស់ក្រសួងសុខាភិបាល និងការណែនាំរបស់គណៈកម្មការ
– ប្រកួតបាល់ទាត់ជាតិកម្ពុជា នឹងមិនអនុញ្ញាតឱ្យមានទស្សនិកជនចូលទស្សនាការប្រកួតផ្ទាល់ជាដាច់ខាត។
– ក្នុងករណីការប្រកួតណាមួយរកឃើញទស្សនិកជនដែលមានវិជ្ជមាន ឬសង្ស័យមានជំងឺកូវីដ-១៩ ហើយនៅតែអនុញ្ញាតឱ្យចូលទស្សនាការប្រកួតទៀតនោះ គណៈកម្មការប្រកួតល់ទាត់ជាតិកម្ពុជា នឹងធ្វើការផ្អាកជាបណ្ដោះអាសន្ន ដោយមិនឱ្យទស្សនិកជនចូលទស្សនាសម្រាប់ការប្រកួតនោះ រហូតដល់មានការសម្រេចជាថ្មី ពីគណៈកម្មការប្រកួតបាល់ទាត់ជាតិកម្ពុជា។
អត្ថបទពាក់ព័ន្ធ៖កម្មវិធីប្រកួតសរុបក្នុងពានរង្វាន់ Prince Beer Pre-Season Cup 2022
ពានរង្វាន់បាល់ទាត់ Prince Beer Pre-Season Cup 2022 បានចាប់ឆ្នោតបែងចែកពូលរួចរាល់ហើយ ខណៈការប្រកួតបែងចែកជា២ពូល ដំណើរការពីថ្ងៃទី២១ ខែមករា ដល់ថ្ងៃទី២ ខែកុម្ភៈ ឆ្នាំ២០២២ លើកីឡដ្ឋានព្រីនស៍ និងកីឡដ្ឋានកងយោធពលខេមរភូមិន្ទ(ស្តាតចាស់)៕