សហព័ន្ធកីឡាបាល់ទាត់ប្រ៊ុយណេ (FABD) បានប្រកាសនៅថ្ងៃសៅរ៍ ទី២២ ខែមករា ឆ្នាំ២០២២ នេះថាសហព័ន្ធនិងលោក Datuk Rajagobal ដែលជាគ្រូបង្វឹកក្រុមជម្រើសជាតិប្រ៊ុយណេ បានយល់ព្រមចែកផ្លូវគ្នាក្នុងខែមករា ឆ្នាំ២០២២។
លោក Datuk Rajagobal បានចូលដឹកនាំក្រុមជម្រើសជាតិប្រ៊ុយណេ នៅខែកុម្ភៈ ឆ្នាំ២០២១ ខណៈដែលផលប៉ះពាល់ដោយស្ថានភាពកូវីដ-១៩ ធ្វើឱ្យភាគីទាំង២សម្រេចចែកផ្លូវគ្នា។ ជិត១ឆ្នាំមកនេះក្រុមជម្រើសជាតិប្រ៊ុយណេ ឈុតធំ មិនមានសកម្មភាពប្រកួតលើឆាកអន្តរជាតិទាល់តែសោះ ខណៈដែលសហព័ន្ធត្រៀមបញ្ជូលក្រុមក្នុងការប្រកួតកម្រិតយុវជនចំនួន៥ប៉ុណ្ណោះក្នុងតំបន់អាស៊ាន ក្នុងឆ្នាំ២០២២ នេះ ដោយមិនទាន់មានកាលវិភាគសម្រាប់ក្រុមឈុតធំនោះទេ។
ចំណែកការប្រកួតពានរង្វាន់ AFF Suzuki Cup 2020 កន្លងទៅប្រ៊ុយណេ បានប្រកាសដកខ្លួនចេញពីវគ្គជម្រុះជាមួយទីម័រខាងកើត ផងដែរ។
លោក Datuk Rajagobal មានវ័យ៥១ឆ្នាំធ្លាប់ជាខ្សែប្រយុទ្ធរបស់ក្រុមជម្រើសជាតិម៉ាឡេស៊ី និងប្រកបអាជីពជាមួយក្លិបមួយចំនួននៅស្រុកកំណើត ខណៈលោកធ្លាប់ដឹកនាំក្រុមជម្រើសជាតិម៉ាឡេស៊ី របស់ខ្លួន២០០៤ ដល់២០១៣ ដោយក្នុងនោះមានឈុតយុវជនផង និងឈុតធំផង ហើយជាលទ្ធផលលោកបានដឹកនាំក្រុមដណ្តើមបានជើងឯកពានរង្វាន់ AFF Suzuki Cup 2010 និងឈ្នះមេដាយមាសក្នុងព្រឹត្តិការណ៍កីឡាស៊ីហ្គេមឆ្នាំ២០០៩ ផងដែរ៕