រឿងរ៉ាវប្ដឹងផ្ដល់គ្នារវាងពិធីការិនីវ័យក្មេង កញ្ញា យូប៊ិ និង លោកឧកញ៉ា ហេង សៀ បានធ្វើឱ្យមានការចាប់អារម្មណ៍ខ្លាំងទាំងមជ្ឈដ្ឋានមហាជនទូទៅក៏ដូចជានៅលើបណ្ដាញសង្គមរហូតមានអ្នកសិល្បៈវ័យក្មេងជាច្រើនរូបបានចេញមុខមកទាមទារឱ្យមានការដោះលែងពិធីការិនីរូបនេះ។ យ៉ាងណាមិញបុគ្គលល្បីមួយរូបនៅក្នុងរង្វង់សិល្បៈលោក ខាំ ភូរិ ជាអ្នកដឹកនាំការសម្ដែង (Director) ក៏បានចេញមកបង្ហាញពីចំណាប់អារម្មណ៍លើបណ្ដាញសង្គមពាក់ព័ន្ធនឹងរឿងរ៉ាវចម្រូងចម្រាសខាងលើនេះផងដែរ។
សូមចុចត្រង់នេះ៖ ពិធីការិនី MYTV មាន ពេជ្ររីតា ប្ដឹងបកឧកញ៉ា ហេង សៀ ពីបទ «ប៉ុនប៉ងរំលោភសេពសន្ថវៈ»
ក្រោយពីរឿងរ៉ាវការចោទប្ដឹងផ្ដល់គ្នាទៅវិញទៅមករវាងពិធីការិនីប្រចាំកម្មវិធី Facebook Active និងលោកឧកញ៉ាមានមុខមាត់ម្នាក់ក្នុងសង្គម ត្រូវបានចែករំលែកគ្នាយ៉ាងគគ្រឹកគគ្រេងនៅលើបណ្ដាញសង្គមលោក ខាំ ភូរិ អ្នកដឹកនាំរឿងល្បី «សិសិររដូវក្នុងបេះដូង» ក្នុងនាមជារៀមច្បងនៅក្នុងរង្វង់សិល្បៈមួយរូបនោះ បានបង្ហាញពីគំនិតរបស់លោកផ្ទាល់ថា៖
«ខ្ញុំមិនដឹងរឿងលម្អិតនៃរឿងរ៉ាវទាំងនេះទេ ខ្ញុំក៏មិនដែលធ្លាប់បានធ្វើការជាមួយប្អូនស្រីដែលត្រូវលោកឧកញ៉ាចោទពីរឿងលួចទូរស័ព្ទដៃនោះទេ។ តែក្នុងនាមជាសិល្បករដូចគ្នា ខ្ញុំសុំបញ្ចេញយោបល់ផ្ទាល់ខ្លួនបន្តិចចុះ។ ខ្ញុំមិនបានមើលពាក្យបណ្តឹងរបស់លោកឧកញ៉ាទេ តែតាមចំណងជើងសារព័ត៌មាន អានរួចវាដូចជាហួសចិត្ត។ ដោយឡែកខ្ញុំបានអានពីរបីដងនៃពាក្យបណ្តឹងប្អូនស្រី ដែលប្តឹងបកទៅវិញ ខ្ញុំអាចសន្និដ្ឋានដោយខ្លីបានថា វាមានរឿងរ៉ាវស៊ីជម្រៅជាងនេះ គឺជាងរឿងលួចទូរស័ព្ទដៃដែលជាអង្គហេតុក្នុងការចោទប្រកាន់។
សម័យនេះហើយ នៅតែប្រើទឹកលុយ បំផ្លាញក្តីស្រឡាញ់ និងបេះដូងអ្នកតូចទាបជាងខ្លួនបានដោយទង្វើស្មោកគ្រោកទៅកើត? យើងមានម្តាយ មានភរិយា ឬអាចមានបងប្អូន និងកូនជានារី យើងគួរស្គាល់ពីតម្លៃ និងសេចក្តីថ្លៃថ្នូររបស់ស្ត្រីទូទៅ។ តើការបំពារបំពានទាំងនេះ វាប្រៀបបានដូចទៅនឹងការបំពានសាច់ញាតិខ្លួនឯងដែរទេ? សង្ឃឹមថាប្អូនស្រីនឹង ត្រូវបានជួយដោយមនុស្សមានគុណធម៌ ក្នុងសង្គមជឿនលឿនមួយនេះក្នុងពេលដ៏ខ្លី។»
សំណេររបស់លោក ខាំ ភូរិ នេះគឺធ្វើឡើងស្របពេលដែលតារាល្បីៗជាច្រើន ក៏ដូចជាសាធារណជនមានការកំពុងតែផុសផុលធ្វើយុទ្ធនាការលើបណ្ដាញសង្គមដើម្បីសុំឱ្យមានការដោះលែងកញ្ញា មាន ពេជ្ររីតាចេញពីការឃុំឃាំង៕
