ពិព័រណ៍ផលិតផលខ្មែរ ដែលរៀបចំដោយ Beyond Retail Business Cambodia (B.R.B Cambodia) ឈានដល់សប្តាហ៍ចុងក្រោយ ដែលធ្វើឡើងនៅផ្សារទំនើប ជីប ម៉ុង សែនសុខ នៅចុងសប្តាហ៍នេះ ថ្ងៃទី ១៩ និងទី២០ ខែកុម្ភៈ ឆ្នាំ២០២២ ។ ពិព័រណ៍ផលិតផលខ្មែរទទួលបានការគាំទ្រពីសំណាក់សាធារណជន ដែល B.R.B Cambodia រៀបចំឡើង ចាប់តាំងពីថ្ងៃទី ២៩ ខែមករាឆ្នាំ២០២២ នៅ ផ្សារទំនើប ជីប ម៉ុង ណូរ៉ូ ម៉ល ២សប្តាហ៍ជាប់គ្នារួចទៅហើយ។
នៅសប្តាហ៍នេះ ពិព័រណ៍ផលិតផលខ្មែរ ប្រមូលផ្ដុំការបង្ហាញផលិតផលជាច្រើនប្រភេទដូចជា ផលិតផលសុខុមាលភាព ផលិតផលម្ហូបអាហារ ផលិតផលតុបតែងផ្ទះ ផលិតផលម៉ូដនិងគ្រឿងតុបតែង ដែលសុទ្ធសឹងជាផលិតផលខ្មែរពិតៗ បង្កើតឡើងដោយសិប្បករក្នុងស្រុក។
បើតាមប្រសាសន៍ លោក ឌែននី សុទ្ធាបញ្ញា ស៊ីម ដែលជា ប្រធានផ្នែកទីផ្សារជាន់ខ្ពស់ នៃក្រុមហ៊ុនជីបម៉ុងរីថែល បានអោយដឹងថា «មានផលិតផលខ្មែរជាច្រើនដែលយើងចង់ណែនាំដល់អតិថិជន ហើយនៅពេលនេះគឺជាពេលវេលាដ៏ល្អដែលពិព័រណ៍ខ្មែរនាំយកផលិតផលជាច្រើនជាជម្រើសសំរាប់អតិថិជន ព្រមទាំងគាំទ្រសិប្បករក្នុងស្រុក។ ផ្សារទំនើប ជីប ម៉ុង គឺជាផ្សារទំនើបរបស់ខ្មែរដែលមានបេសកម្មក្នុងការនាំយកផលិតផលមានគុណភាពនិងសេវាកម្មល្អ ជូនអតិថិជន។ យើងនឹងមានកម្មវិធីល្អៗបែបនេះទៀតនៅក្នុងផ្សារទំនើបរបស់យើងខ្ញុំនាពេលអនាគត។»
ពិព័រណ៍ផលិតផលខ្មែរ ដែលរៀបចំដោយ B.R.B Cambodia ធ្លាប់រៀបចំជាច្រើនដងនៅក្នុងខេត្តសៀមរាប ហើយថ្មីៗក៏រៀបចំនៅរាជធានីភ្នំពេញ ដែលទទួលបានភាពជោគជ័យគួរអោយកត់សម្គាល់ ដោយសារតែសាធារណជនបានមកទស្សនា រួមទាំងទិញទំនិញនៅទីនេះ ចំណែកអ្នកខ្លះទៀតក៏លាន់មាត់សរសើរអំពីផលិតផលល្អៗរបស់ខ្មែរ និងភ្ញាក់ផ្អើលនៅពេលដែលគាត់បានទស្សនាស្តង់ផលិតផលផ្សេងៗទៀត។ ពួកគាត់សង្ឃឹមថានឹងមាន ពិព័រណ៍បែបនេះបន្តទៀត។
បើតាមប្រសាសន៍លោក Pierre-Andre Romano – Co-CEO របស់ B.R.B Cambodia បានអោយដឹងថា «សម្រាប់កម្មវិធីបន្ទាប់ យើងខ្ញុំចង់លើកកម្ពស់ការយល់ដឹងបន្ថែមអំពីផលិតផលក្នុងស្រុក និងវត្ថុសិល្បៈដែលធ្វើដោយអ្នកដែលមានជំនាញនិងទេពកោសល្យ តាមរយៈការបង្កើតយុទ្ធនាការផ្សព្វផ្សាយ និងបង្កើតពិព័រណ៍ជាទៀងទាត់បន្ថែមទៀត។ គោលបំណងចម្បងរបស់យើងនៅពេលនេះ គឺ បង្កើនការដាក់បង្ហាញអោយបានច្រើន និងការនាំចូលទៅកាន់ទីផ្សារតូចៗក្នុងស្រុក។»
សូមបញ្ជាក់ថា កម្មវិធីនេះមានការគាំទ្រខ្លាំងពីអង្គរប៉ាវីស, ក្រុមហ៊ុន ជីប ម៉ុង រីថែល និងធនាគារ ជីប ម៉ុង រួមទាំងសំណាក់ប្រជាពលរដ្ឋកម្ពុជា ដែលគាំទ្រផលិតផលខ្មែរ។ ពិព័រណ៍ផលិតផលខ្មែរ ទទួលបានភាពជោគជ័យក្នុងការរៀបចំនៅខេត្តសៀមរាប និងរាជធានីភ្នំពេញ ហើយនឹងបន្តនាពេលអនាគតនៅតាមបណ្តាខេត្តនិងក្រុងផ្សេងៗ។
សូមសាធារណជន ចូលរួមគាំទ្រអោយបានច្រើន នៅសប្តាហ៍ចុងក្រោយនៃការតាំងពិព័រណ៍នេះ ថ្ងៃទី ១៩ និងទី២០ ខែកុម្ភៈ ឆ្នាំ២០២២ នៅផ្សារទំនើប ជីប ម៉ុង សែនសុខ ដែលស្ថិតនៅ តាមបណ្ដោយផ្លូវឧកញ៉ា ម៉ុង ឫទ្ធី ។
ព័ត៌មានបន្ថែមសូមចូលទៅកាន់៖