បន្ទាប់ពីលោក ឌួង ឆាយ ចំណាយពេលរាប់ម៉ោង Live រៀបរាប់បកស្រាយពីបញ្ហាគ្រួសារ និងឆ្លៀតលើកពីអតីតភរិយាមកបរិយាយដែរនោះ ស្រាប់តែនៅថ្ងៃទី១៨ ខែកុម្ភៈនេះ អ្នកនាង ដេត ម៉ាលីណា បានចេញមកតបតចំពោះការចោទប្រកាន់លោក ឌួង ឆាយ ដោយអ្នកមេម៉ាយរូបនេះបានលើកយកចរិតអាក្រក់របស់លោកនៅចំពោះកូនៗមកទម្លាយជាសាធារណៈ។
ភ្ជាប់ជាមួយនឹងសំណេរដ៏វែងអន្លាយ អតីតភរិយាលោក ឌួង ឆាយ បានសរសេររៀបរាប់ថាខ្លួននិងកូនសុខចិត្តបៀមលាក់ទុក្ខព្រោះមិនចង់ឱ្យផ្ទុះរឿងអាស្រូវម្ដងហើយម្ដងទៀត ប៉ុន្តែអតីតស្វាមីមិនព្រមខ្លួននិងកូនរស់បានសុខឡើយ គឺមានតែបង្កការភ័យខ្លាច ប្រើប្រាស់អំណាច និងទង្វើដ៏សាហាវគ្មានខ្លាចញញើតចំពោះច្បាប់បន្តិចណាសោះឡើយ។
អ្នកនាងក៏បញ្ជាក់យ៉ាងច្បាស់ដែរថាអ្នកនាងចង់គេចផុតពីការគំរាមកំហែងពីមនុស្សប្រុសអន់ចរិត(សំដៅដល់ ឌួង ឆាយ)។ ស្ត្រីដែលជាអ្នកជំនួញអនឡាញរូបនេះក៏បានបន្ថែមទៀតផងដែរថាអ្នកនាងខំប្រឹងរកប្រាក់ចិញ្ចឹមកូនយ៉ាងលំបាក ដោយមិនមានជំនួយពីលោក ឌួង ឆាយសោះឡើយ។ អ្នកនាង ដេត ម៉ាលីណា បានលើកឡើងបន្តទៀតថាលោក ឌួង ឆាយគឺប្រៀបដូចជាសត្វពស់ដែលចឹកគេតែបែរជាដើរប្រាប់គេថាខ្លួនត្រូវពស់ចឹក។
អ្វីដែលគួរឱ្យកត់សម្គាល់នោះ អ្នកនាង ដេត ម៉ាលីណា បានលើកយករឿងទំនាស់ទ្រព្យសម្បត្តិ មកទម្លាយសារជាថ្មី ដោយលើកនេះអ្នកនាងបានពន្យល់ថា ខណៈនេះលោក ឌួង ឆាយ ក្រៅពីប្ដឹងដណ្ដើមកូនហើយនោះ កំពុងតែប្ដឹងទាមទារទ្រព្យសម្បត្តិពីកូនៗគឺផ្ទះដែលជាជំរកកូនៗកំពុងរស់នៅថែមទៀត ដែលទង្វើនេះត្រូវអ្នកនាងហៅថាមិនចង់ឱ្យកូនឬចៅៗទៅនៅផ្ទះជួលឬយ៉ាងណា?
នៅក្នុងសំនេរដ៏វែងអន្លាយនោះ អ្នកនាងបានព្រលយដែរថាខ្លួនជិតមានបញ្ហាផ្លូវចិត្តហើយ ប៉ុន្តែទោះជារងសម្ពាធប៉ុណ្ណាអ្នកនាងត្រូវតែរឹងមាំ ខំប្រឹងរកស៊ីដើម្បីចិញ្ចឹមកូនៗទាំង៣។
ចុងក្រោយអ្នកនាង ដេត ម៉ាលីណា ឆ្លៀតស៊កសម្ដីថា លោក ឌួង ឆាយ មិនខ្លាចសំណាញ់ច្បាប់អាចមកពីលោកអាងថាមានសញ្ជាតិឌូប៉ៃ ប៉ុន្តែអ្នកនាងក៏លើកឡើងវិញដែរថាអ្នកនាងជឿជាក់លើច្បាប់ស្រុកខ្មែរ ច្បាប់ប្រាកដជាមិនឱ្យអ្នកនាង និងកូនរស់នៅដោយភាពភ័យខ្លាចនោះឡើយ៕
សូមអានខ្លឹមសារនិងទស្សនាវីដេអូរូបភាពទាំងស្រុងដោយ ចុចនៅត្រង់នេះ
ប្រភព៖ Deth Malina ដេត ម៉ាលីណា