សហព័ន្ធកីឡាអេឡិចត្រូនិកកម្ពុជា បានរៀបចំការប្រកួតកីឡាអេឡិកត្រូនិក វិញ្ញាសា PUBG Mobile ដើម្បីត្រៀមខ្លួនក្នុងដំណើរឆ្ពោះទៅ កីឡាស៊ីហ្គេម លើកទី៣១ ឆ្នាំ២០២១ នៅវៀតណាម និងការត្រៀមខ្លួនសម្រាប់ស៊ីហ្គេម លើកទី៣២ ឆ្នាំ២០២៣ នៅកម្ពុជា ខាងមុខ។
នៅថ្ងៃទី១៩ ខែកុម្ភៈ ឆ្នាំ២០២២ ព្រឹត្តិការណ៍ប្រកួតជ្រើសរើសជើងឯកកីឡាអេឡិចត្រូនិកលើវិញ្ញាសា PUBG Mobile បានបញ្ចប់ បន្ទាប់ពីធ្វើការប្រកួតវគ្គផ្តាច់ព្រ័ត្រនៅផ្សារទំនើបអ៊ីអនពីរក្រោមវត្តមានលោក លន់ សាមឌី អគ្គលេខាធិការសហព័ន្ធកីឡាអេឡិចត្រូនិកកម្ពុជា។
សហព័ន្ធកីឡាអេឡិចត្រូនិកកម្ពុជា (EFC) សហការជាមួយក្រុមហ៊ុនទូរសព្ទ Cellcard បានរៀបចំព្រឹត្តិការណ៍ប្រកួតស្តីពី«ដំណើរឆ្ពោះទៅកីឡាស៊ីហ្គេម លើកទី៣១ ឆ្នាំ២០២១ នៅវៀតណាម
និងការត្រៀមខ្លួនសម្រាប់ស៊ីហ្គេម លើកទី៣២ ឆ្នាំ២០២៣ នៅកម្ពុជា»ចាប់ពីថ្ងៃទី២៧ ខែមករា ដល់ថ្ងៃទី១៩ ខែកុម្ភៈ ឆ្នាំ២០២២ដែលមានក្រុមចុះឈ្មោះចូលរួមប្រកួតចំនួន១៦០ក្រុម។
បើតាមការបញ្ជាក់ពីគណៈកម្មការរៀបចំការប្រកួត គោលបំណងនៃការប្រកួតគឺជ្រើសរើសក្រុមលេខ១ ដល់លេខ៤ លើវិញ្ញាសា PUBG Mobile ដើម្បីសម្រឹតសម្រឹងចុងក្រោយសម្រាប់ក្លាយជាក្រុមជម្រើសជាតិកម្ពុជាទៅប្រកួតកីឡាស៊ីហ្គេមលើកទី៣១ នៅប្រទេសវៀតណាម។ ដូច្នេះមានន័យថា ជយលាភីទាំង៤នេះនៅមិនទាន់មានឈ្មោះជាក្រុមជម្រើសជាតិផ្លូវការនៅឡើយទេ ប៉ុន្តែនឹងមានការជ្រើសរើសសមាជិកដែលមានជំនាញរៀងៗខ្លួនដើម្បីបង្កើតជាក្រុមជម្រើសជាតិ។
សម្រាប់ក្រុមទទួលបានចំណាត់ថ្នាក់គឺលេខ១ Kill Enemy ទទួលបានទឹកប្រាក់លើកទឹកចិត្ត ៣៥០០ដុល្លារ ក្រុមលេខ២ Angkor PUBGទទួលបាន ២០០០ដុល្លារ ក្រុមលេខ៣ Samurai EES ទទួលបាន ១០០០ដុល្លារ និងលេខ៤ The Quarterទទួលបាន ៥០០ដុល្លារ។ ដោយឡែក ក្រុមចំណាត់ថ្នាក់លេខ៥ដល់១០ ទទួលបាន២០០ដុល្លារដូចគ្នា ហើយក្រុមលេខ១១ដល់១៦ ទទួលបាន១០០ដុល្លារដូចគ្នា។
ព្រមជាមួយគ្នានេះ សហព័ន្ធគ្រោងបង្កើតគណៈកម្មាបច្ចេកទេសដើម្បីជ្រើសរើស គ្រូបង្វឹក និងកីឡាករជម្រើសជាតិ ដែលជាផ្នែកនៃការអភិវឌ្ឍ បង្កើនសមត្ថភាព បំផុសបំផុល និងជំរុញកីឡាអេឡិចត្រូនិកកម្ពុជាដើម្បីឲ្យរីកចម្រើនឈានឡើងលំដាប់អន្តរជាតិសម្រាប់ត្រៀមខ្លួនប្រកួតកីឡាស៊ីហ្គេម លើកទី៣២ ឆ្នាំ២០២៣ដែលកម្ពុជាធ្វើជាម្ចាស់ផ្ទះ។
លោក លន់ សាមឌី អគ្គលេខាធិការសហព័ន្ធកីឡាអេឡិចត្រូនិកកម្ពុជា បានលើកទឹកចិត្តដល់ក្រុមជ័យលាភីឱ្យខិតខំប្រឹងប្រែងហ្វឹកហាត់បន្តទៀតដើម្បីទទួលបានឱកាសចូលរួមក្នុងក្រុមជម្រើសជាតិកម្ពុជា ត្រៀមចេញទៅប្រកួតលើឆាកអន្តរជាតិនានា។
បន្ថែមលើនេះទៀតនោះ សហព័ន្ធកីឡាអេឡិចត្រូនិកកម្ពុជា នឹងបញ្ជូនមន្រ្តី អាជ្ញាកណ្តាល (ITO) និងមន្ត្រីបច្ចេកទេស ទៅចូលរួមរៀបចំការប្រកួតកីឡាស៊ីហ្គេម ឆ្នាំនេះនៅវៀតណាម៕