ពានរង្វាន់សម្តេចតេជោ ហ៊ុន សែន លើកទី១៦ ឆ្នាំ២០២២ (Hun Sen Cup) កំពុងដំណើរការប្រកួតជម្រុះជើងឯកថ្នាក់ខេត្តប្រចាំពូល ខណៈគិតត្រឹមពេលនេះដំណើរការប្រកួតបាន១៨គូហើយក្នុងចំណោម៤ពូល។
រហូតមកទល់ពេលនេះប៉ុន្តែមានកីឡាករថ្មីមួយរូបបានបំបែកកំណត់ត្រាអ្នកចាស់ចំនួន២រឿង ក្នុងប្រកួតតែមួយ គឺក្នុងនាមជាអ្នករកគ្រាប់បាល់បានលឿងជាងគេផង និងជាអ្នកទទួលងារជាកីឡាករល្អជាងគេ (Man Of The Match) នៅក្នុងប្រកួតតែមួយនោះផងដែរ។
អ្នកបំបែកកំណត់ត្រាថ្មីនោះគឺខ្សែប្រយុទ្ធ លី ស៊ុបយ៉ានី របស់ក្រុមខេត្តកំពត បានបំបែកកំណត់ត្រាកីឡាករ ជឿន ភារិន របស់ក្រុមខេត្តឧត្តរមានជ័យ។ ស៊ុបយ៉ានី រកគ្រាប់បាល់លឿងជាងគេពោលគឺប្រើពេលត្រឹម៣នាទីប៉ុណ្ណោះ ក្រោយលោកអាជ្ញាកណ្ដាល ពង្ស កែវទុំទឿន ផ្លុំកញ្ចែចាប់ផ្ដើមការប្រកួតទល់នឹងក្រុមភ្ញៀវមន្ទីរឧស្សាហកម្មខេត្តតាកែវ នៅវេលាម៉ោង៣រសៀលថ្ងៃទី២២ ខែកុម្ភៈ ឆ្នាំ២០២២ លើទីលានកីឡដ្ឋានខេត្តកំពតប្រចាំពូលក។
នៅប្រកួតជាមួយគ្នានោះដែរម្ចាស់អាវលេខ៩ កីឡាករ លី ស៊ុបយ៉ានី ជាកីឡាករ១រូបក្នុងចំណោម៧រូប ដែលជាប់ឈ្មោះជាកីឡាករល្អ (Man Of The Match) ផង និងជាអ្នករកគ្រាប់បាល់បញ្ចូលទីឱ្យក្រុមផងនៅក្នុងប្រកួតតែមួយ។
ចំណែកកីឡាករ ជឿន ភារិន របស់ក្រុមឧត្តរមានជ័យ ជាម្ចាស់កំណត់ត្រាចាស់ រកគ្រាប់បាល់បាននៅនាទីទី៤ ក្នុងពេលជួយក្រុមខ្លួនប្រកួតទល់ក្រុមភ្ញៀវខេត្តបាត់ដំបង នៅទីលានវិទ្យាល័យតេជោសែន សំរោង ក្នុងក្រុងសំរោង កាលពីថ្ងៃ១៦ខែកុម្ភៈ ឆ្នាំ២០២២ ប្រចាំពូលគ។ នៅក្នុងការប្រកួតនោះដែរកីឡាករ ខ្សែប្រយុទ្ធស្លាកលេខ១៤រូបនេះក៏ជាប់ជាកីឡាករល្អ ប្រចាំការប្រកួតផងដែរ ខណៈប្រកួតកាលនោះលទ្ធផលនៃក្រុមទាំង២ស្មើគ្នា ២ទល់២។
គិតត្រឹមពេលនេះក្នុងចំណោម១៨ប្រកួត នៃពានរង្វាន់សម្តេចតេជោ ហ៊ុន សែន ឆ្នាំ២០២២ ជើងឯកថ្នាក់ខេត្ត មានទស្សនិជនចូលទស្សនាសរុបបានប្រមាណជាង១ម៉ឺននាក់ហើយ ខណៈដែរគ្រាប់បាល់កើនឡើង៥២គ្រាប់ កាតលឿងចំនួន៦២សន្លឹក កាតក្រហម២សន្លឹក។ ឬទ្ធិសែន ជាក្រុមតែ១ប៉ុណ្ណោះ ដែលមិនទាន់មានការពិន័យកាតលឿង ឬ កាតក្រហម បើធៀបនឹងក្រុម១៦ផ្សេងទៀតសុទ្ធតែមានការពិន័យរូចរាល់ហើយ។
កីឡាករ វ៉ាត ម៉ាត់មូស្លីម របស់ក្រុមភ្នំពេញហ្គាឡាក់ស៊ី និងកីឡាករ អ៊ិន (អ៊ុង) វិសាល របស់ក្រុមស្វាយរៀង ក្នុងពូល ក ស្ថិតក្នុងកំពូលតារាងជាកីឡាកររកគ្រាប់បាល់បានច្រើនជាងគេដោយរកបាន៣គ្រាប់ម្នាក់។
សម្រាប់ប្រកួតបន្ទាប់នៅថ្ងៃទី១ ខែមីនា ឆ្នាំ២០២២ មាន៖
*ពូល A
-កំពតអែហ្វស៊ី ប៉ះ កំពង់ស្ពឺ នៅកីឡដ្ឋានខេត្តកំពត
-ព្រះសីហនុ ប៉ះ ខេត្តកែប នៅទីលានវិទ្យាល័យសម្តេចឪ
*ពូល B
-ភ្នំពេញហ្គាឡាក់ស៊ី ប៉ះ ខេត្តកណ្ដាល នៅវិទ្យាល័យច្បារអំពៅ
-ខេត្តកំពង់ចាម ប៉ះ ខេត្តស្វាយរៀង នៅវិទ្យាល័យព្រះសីហនុ
