គណៈកម្មការរៀបចំការប្រកួតបាល់ទះ Ganzberg Special Volleyball League 2022 បានប្រកាសជ្រើសរើសក្រុមដណ្តើមយកជើងឯកប្រចាំឆ្នាំ ខណៈការប្រកួតគ្រោងដំណើការរយៈពេល៤ខែ ដោយចាប់ពីខែមីនា ដល់ខែកក្កដា ឆ្នាំ២០២២ ឯណោះ។
លោក ប៉េង សុវណ្ណណូ ប្រធានប្រតិបត្តិគណៈកម្មការ Ganzberg Special Volleyball League 2022 បានលើកឡើងនៅក្នុងសន្និសីទសារព៌តមានរសៀលថ្ងៃពុធ ទី២៣ ខែកុម្ភៈ ឆ្នាំ២០២២ នេះថាពានរង្វាន់នេះជាការប្រកួតលក្ខណៈលីគបាល់ទះដំបូងគេបង្អស់នៅកម្ពុជា ដែលទទួលបានគាំទ្រពីសហព័ន្ធកីឡាបាល់ទះកម្ពុជា។ គោលបំណងនៃការរៀបចំកម្មវិធីប្រកួតនេះគឺចង់ចូលរួមលើកស្ទួយវិស័យកីឡាបាល់ទះឱ្យកាន់តែរីកចម្រើនបន្ថែមទៀត ក៏ដូចជាពង្រឹងសមត្ថភាពរបស់កីឡាករនិងដកស្រង់បច្ចេកទេសពីបណ្តាក្រុមកីឡាបាល់ទះតាមខេត្តនិងក្រុម ដើម្បីត្រៀមលក្ខណៈសម្បត្តិក្នុងការប្រកួតដណ្តើមពានរង្វាន់ថ្នាក់អន្តរជាតិនាពេលខាងមុខ។
កម្មវិធីប្រកួតប្រជែងដណ្តើមពានរង្វាន់ Ganzberg Special Volleyball League 2022 នេះរៀបចំនៅទីលានបាល់ទះវិសាខា ដោយកំណត់យកក្រុមចូលរួមចំនួន១២ក្រុម ព្រមទាំងចាប់ទទួលពាក្យពីថ្ងៃជូនដំណឹងនេះរហូតដល់ថ្ងៃទី១៤ ខែមីនា ឆ្នាំ២០២២ ខណៈកាលបរិច្ឆេទនៃការប្រកួតចាប់ពីថ្ងៃទី២៥ ខែមីនា ដល់ថ្ងៃទី១៦ ខែកក្កដា ឆ្នាំ២០២២។ ការប្រកួតនេះមានលក្ខណៈ ៤ទល៤។
បើតាមលោក ទែន ឡន ប្រធានអនុគណៈកម្មការបច្ចេកទេសបានបញ្ជាក់ថាការប្រកួតនេះកំណត់ឱ្យក្រុមទាំង១២ប្រកួតវិលជុំ ហើយក្រុមដែលមានចំណាត់ថ្នាក់ល្អជាងគេចំនួន៤ ក្រុមនឹងត្រូវប្រកួតខ្វែងនៅវគ្គពាក់កណ្ដាលផ្ដាច់ព្រ័ត្រ និងបន្តដល់វគ្គផ្ដាច់ព្រ័ត្រយកជើងឯក ប្រចាំឆ្នាំតែម្តង។
លោក Franz Josef Brune Brew ជាតំណាងរបស់ក្រុមហ៊ុន Ganzberg Beer បានថ្លែងអំណរគុណដល់គណៈកម្មការរៀបចំការប្រកួត ដែលបានអនុញ្ញាតឱ្យក្រុមហ៊ុនរបស់លោក ចូលរួមក្នុងព្រឹត្តិការណ៍ Ganzberg Special Volleyball League 2022 ដែលជាផ្នែកមួយជួយជំរុញវិស័យកីឡាបាល់ទះកម្ពុជា ឱ្យកាន់តែកក្រើកថែមទៀត មុនកម្ពុជា ទទួលធ្វើជាម្ចាស់ផ្ទះព្រឹត្តិការណ៍កីឡាស៊ីហ្គេមឆ្នាំ២០២២ ខាងមុខ។
លោកបណ្ឌិត អាំង សេរីពិសិដ្ឋ អគ្គលេខាធិការសហព័ន្ធកីឡាបាល់ទះកម្ពុជា ចាត់ទុកថានេះជាការចូលរួមអភិវឌ្ឍន៍និងលើកស្ទួយវិស័យកីឡាបាល់ទះឱ្យកាន់តែរីកចម្រើនបន្ថែមទៀត។ លោកសង្ឃឹមថាវិស័យកីឡាបាល់ទះនៅកម្ពុជា នឹងកាន់តែទទួលការចាប់អារម្មណ៍ពីមហាជនជាពិសេសនឹងមានការប្រកួតប្រជែងខ្ពស់ថ្នាក់ជាតិនិងអន្តរជាតិ។
សម្រាប់ក្រុមដែលឈ្នះជើងឯក Ganzberg Special Volleyball League 2022 នឹងទទួលបានទឹកប្រាក់ ២០លានរៀល លេខ២ ទទួលបាន៨លានរៀល លេខ៣ទទួលបាន៤លានរៀល។ ក្នុងនោះដែរក៏មានការផ្ដល់រង្វាន់សម្រាប់កីឡាករជាឯកត្តជនដែល រួមមានកីឡាករធ្វើរនាំល្អ វាយប្រយុទ្ធល្អជាងគេ វាយសេវាល្អជាងគេ កីឡាករ Fair Play ម្នាក់៨០ម៉ឺនរៀលផងដែរ។ ជាមួយគ្នានោះដែរសម្រាប់ក្រុមដែលបានដាក់ពាក្យចួលរួមនឹងទទូលបានប្រាក់រង្វាន់លើកទឹកចិត្តចំនួន៤លានរៀលក្នុង១ក្រុមផងដែរ។
សម្រាប់ក្រុមដែលមានចំណាប់អារម្មណ៍ដាក់ពាក្យចូលរួមប្រកួតប្រជែង សូមទាក់ទងព័ត៌មានបន្ថែមតាមលេខទូរស័ព្ទ ០៩៨ ២២៩ ២៩២/ ០៩២ ៥៨០ ២០១/ ០៦១ ៨៩៦ ២៨៨ ឬ អាចធ្វើការស្កេនដើម្បីទទួលបានពាក្យស្នើសុំប្រកួត៕
