គិតត្រឹមពេលនេះគណៈកម្មការរៀបចំការប្រកួតបាល់ទាត់តំបន់អាស៊ាន AFF U23 Championship 2022 នៅរាជធានីភ្នំពេញ បានរកឃើញក្រុមខ្លាំងឡើងដល់វគ្គផ្ដាច់ព្រ័ត្រ ហើយ ដោយក្នុងនោះថៃ ត្រូវប៉ះវៀតណាម។
មុនឡើងដល់វគ្គផ្ដាច់ព្រ័ត្រនេះវៀតណាម ជាមួយក្រុមលេខ១មកពីពូល C ហើយបានយកឈ្នះលើក្រុមលេខ១ពូល A ទីម័រខាងកើត នៅវគ្គពាក់កណ្ដាលផ្ដាច់ព្រ័ត្រ ដោយបាល់ប៉េណាំងទីកាត់សេចក្ដី៥ទល់៣ ក្រោយប្រកួតស្មើគ្នា០ទល់០ នៅម៉ោងប្រកួតពេញ ខណៈក្រុមថៃ វិញជាក្រុមលេខ២ពូល C បានយកឈ្នះក្រុមលេខ១ពូល B ឡាវ នៅវគ្គពាក់កណ្ដាលផ្ដាច់ព្រ័ត្រ ២ទល់០។ ការប្រកួតនេះធ្វើឡើងនៅទីលានពហុកីឡដ្ឋានជាតិមរតតេជោ នៅថ្ងៃព្រហស្បត្តិ៍ ទី២៤ ខែកុម្ភៈ ឆ្នាំ២០២២។
ដោយឡែកកម្មវិធីប្រកួតចុងក្រោយត្រូវធ្វើឡើងនៅថ្ងៃសៅរ៍ ទី២៦ ខែកុម្ភៈ ឆ្នាំ២០២២ នឹងធ្វើឡើងនៅទីលានពហុកីឡដ្ឋានជាតិមរតតេជោ ទៀតដោយវគ្គដណ្តើមចំណាត់ថ្នាក់លេខ៣ ឡាវ ជួបជាមួយទីម័រខាងកើត វេលាម៉ោង៤ល្ងាច ហើយក្រុមថៃ ប៉ះ វៀតណាម វគ្គផ្ដាច់ព្រ័ត្រ នៅម៉ោង៧:៣០នាទីយប់។
នេះជាលើកទី៣ហើយដែលពានរង្វាន់នេះបង្កើតឡើង ហើយនេះជាលើកទី៣ហើយសម្រាប់ក្រុមថៃ ដែលឡើងទៅវគ្គផ្ដាច់ព្រ័ត្រ ខណៈលើកដំបូងក្នុងឆ្នាំ២០០៥ ធ្វើឡើងនៅកីឡដ្ឋាន Suphachalasai Stadium ក្នុងរាជធានីបាងកក ក្រុមនេះជាម្ចាស់ជើងឯក ក្រោយយកឈ្នះសិង្ហបុរី វគ្គផ្ដាច់ព្រ័ត្រ។ លើកទី២ធ្វើឡើងនៅពហុកីឡដ្ឋានជាតិ ក្រុមថៃ បានចាញ់ឥណ្ឌូណេស៊ី ២ទល់១ នៅវគ្គផ្តាច់ព្រ័ត្រ ក្នុងឆ្នាំ២០១៩។
ងាកទៅក្រុមវៀតណាម វិញបានព្យាយាមយកកីឡាករមកបង្រ្គប់កៅអីដែរ ប៉ុន្តែនៅតែខ្វះខាតព្រោះថាក្រុមមួយនេះមានកីឡាករវិជ្ជមានកូវីដ-១៩ ច្រើននាក់។ ជាក់ស្តែងប្រកួតជម្រុះតាមពូលជាមួយថៃ ក្រុមនេះមានកីឡាករបម្រុងតែ៥នាក់ប៉ុណ្ណោះ ក្រោយជ្រើសរើសកីឡាករ១១នាក់ចូលប្រកួត ហើយក្នុងវគ្គពាក់កណ្ដាលផ្ដាច់ព្រ័ត្រ ទល់ទីម័រខាងកើត ក្រុមនេះមានកីឡាករបម្រុងតែ២នាក់ប៉ុណ្ណោះ៕
