ថៃ – កន្លងទៅជិត៨ម៉ោងហើយ ដែលអាជ្ញាធរថៃបានប្រមូលផ្ដុំកម្លាំងគ្នាដើម្បីស្វែងរកតារាសម្ដែងល្បីនាង Tangmo ក្រោយជួបហេតុការណ៍អាក្រក់ ធ្លាក់ពីលើអូប័រកាលពីវេលាម៉ោងប្រមាណជាង១០យប់ ថ្ងៃទី២៤ ខែកុម្ភៈឆ្នាំ ២០២២ ប៉ុន្តែឈានមកដល់ព្រឹកថ្ងៃទី២៥ ខែកុម្ភៈ នេះ នៅតែមិនទាន់រកឃើញថានៅរស់ឬប្រទះសាកសពនៅឡើយ។
បើតាមការរៀបរាប់ពីមិត្តរបស់តារាស្រីរូបនេះបានប្រាប់មកកាន់ក្រុមសង្គ្រោះបានឱ្យដឹងថាក្រុមរបស់ខ្លួនមានគ្នាសរុប ៦នាក់ ប្រុស៣ស្រី៣ ក្នុងនោះរួមទាំង Tangmo ម្នាក់ផងនោះ បាននាំគ្នាមកជិះអូប័រលេងនៅលើទន្លេចៅផាយ៉ា ពេលមកដល់កណ្ដាលទន្លេម្ដុំកំពង់ទូកមួយម៉ោងប្រហែលជា២២និង៤០នាទីដែលអង្គុយនៅកន្ទុយអូប័រស្រាប់តែបាត់ជំហហើយផ្ងាកក្រោយធ្លាក់ពីលើអូប័ររួចលិចចូលទៅក្នុងទឹកបាត់ មិត្តភក្ដិបានបើកទូកវិលចុះឡើងស្វែងរកព្រមទាំងស្រែកហៅតែរកមិនឃើញទើបប្ដឹងទៅកាន់សមត្ថកិច្ចដែលមានក្រុមអ្នកជ្រមុជទឹកមកជួយរកគ្នានៅវេលាម៉ោងប្រមាណ១១យប់។
យោងតាមការផ្សាយពីសារព័ត៌មានថៃ Komchadleuk បានឱ្យដឹងថារយៈពេលជិត៨ម៉ោងហើយ ដែលសមត្ថកិច្ចបានប្រឹងប្រែងស្វែងរកតារាស្រីរូបនេះ ប៉ុន្តែនៅមិនទាន់រកឃើញតម្រុយណាមួយនៅឡើយ។ ងាកមកមិត្តភក្ដិដែលធ្វើដំណើរក្នុងឧប្បត្តិហេតុជាមួយនឹង Tangmo ក៏មិនត្រូវបានទម្លាយឱ្យដឹងពីអត្តសញ្ញាណនៅឡើយដែរ៕
ប្រភព៖ Komchadleuk
