កុមារីរងគ្រោះម្នាក់ត្រូវបានជនល្មើសចាប់រំលោភសេពសន្ថវៈ និងប៉ុនប៉ងសម្លាប់ដោយអារក រហូតធ្វើឲ្យបាត់បង់បំពង់សំឡេងអស់មួយជីវិត។ ទង្វើនេះ សម្តេច ប៊ុន រ៉ានី ហ៊ុនសែន ទទូចឱ្យសមត្ថកិច្ចអនុវត្តច្បាប់ និងផ្ដន្ទាទោសលើជនល្មើសឱ្យធ្ងន់ធ្ងរសមនឹងក្ដីឈឺចាប់របស់ជនរងគ្រោះ។
កុមារី ស.ធ.ត អាយុ១៤ឆ្នាំ ដែលរងគ្រោះដោយការរំលោភសេពសន្ថវៈ និងប៉ុនប៉ងសម្លាប់ដោយអារក ធ្វើឱ្យបាត់បង់បំពង់សំឡេងអស់មួយជីវិត បច្ចុប្បន្នកំពុងសម្រាកព្យាបាលនៅមន្ទីរពេទ្យបង្អែកខេត្តរតនគិរី។
កុមារីរងគ្រោះក៏ទទួលបាននូវជំនួយមួយចំនួនពីសម្ដេចផងដែរ ដើម្បីជួយសម្រាលការលំបាកក្នុងជីវភាពរស់នៅ ដូចជា អង្ករ៥០គីឡូក្រាម, មី១កេស, ត្រីខ១យួរ, ទឹកដោះគោឆៅ២យួរ, ទឹកពិសា ១កេស, និងថវិកាចំនួន៥លានរៀល។
ករណីរំលោភ និងប៉ុនប៉ងសម្លាប់នេះ បានកើតឡើងកាលពីថ្ងៃទី៦ ខែឧសភា ឆ្នាំ២០២១ នៅក្នុងចំការក្រុមហ៊ុនហ័ងអាញ ត្រង់ចំណុចការដ្ឋានទី០៣ ស្ថិតនៅភូមិមុយ ឃុំញ៉ាង ស្រុកអណ្តូងមាស ខេត្តរតនគិរី៕