យោងតាមការចុះផ្សាយរបស់គេហទំព័រផ្លូវការរបស់សហព័ន្ធកីឡាបាល់ទាត់អាស៊ី (AFC) នៅព្រឹកថ្ងៃអង្គារ ទី១ ខែមីនា ឆ្នាំ២០២២ នេះ ស្ដីពីការលុបចោលវគ្គជម្រុះក្នុងពានរង្វាន់ AFC Cup 2022 ក្នុងតំបន់អាស៊ាន បន្ទាប់ពីក្លិបចំនួន២ មកពីប្រទេសមីយ៉ាន់ម៉ា គឺ Hantharwady United FC និង Shan United FC បានប្រកាសដកខ្លួនចេញពីការប្រកួតពានរង្វាន់កម្រិតទ្វីបទាំង២ AFC Champions League និង AFC Cup 2022។
ដូច្នេះក្លិបបាល់ទាត់ វិសាខា និង Young Elephants FC របស់ប្រទេសឡាវ ឡើងដោយស្វ័យប្រវត្តិទៅបំពេញកៅអីចំនួន២ដែលនៅសល់។ ដោយវិសាខា របស់កម្ពុជា អាចនឹងចូលពូល G ជាមួយ Bali United របស់ឥណ្ឌូណេស៊ី, Kaya FC របស់ហ្វីលីពីន និង Kedah Darul FC របស់ម៉ាឡេស៊ី ខណ: Young Elephants អាចនឹងចូលពូល I ជាមួយភ្នំពេញក្រោន របស់កម្ពុជា , Viettel របស់វៀតណាមនិង Hougang United របស់សិង្ហបុរី។
មូលហេតុដោយសារតែច្បាប់របស់ AFC Cup និង AFC Champions League មិនអនុញ្ញាតឲ្យក្លិបដែលមកពីប្រទេសដូចគ្នា ស្ថិតនៅក្នុងពូលតែមួយឡើយ (ឧ. វិសាខា និងភ្នំពេញក្រោន មិនអាចស្ថិតក្នុងពូលតែមួយ ដោយសារតែមកពីប្រទេសកម្ពុជាដូចគ្នា)៕