ក្រុមបាល់ទាត់ភ្នំពេញក្រោន បានក្លាយជាម្ចាស់ជើងឯកពានរង្វាន់បាល់ទាត់ Cambodian Super Cup 2022 ដែលរៀបចំឡើងដោយក្រុមហ៊ុន Cambodian Premier League ក្រោយយកឈ្នះលើក្រុមវិសាខា ដោយលទ្ធផល ២ទល់១ លើទីលានកីឡដ្ឋានកងយោធពលខេមរភូមិន្ទ នៅរាត្រីថ្ងៃអង្គារ ទី១ ខែមីនា ឆ្នាំ២០២២ នេះ។
ការប្រកួតដែលកាត់សេចក្ដីដោយលោកអាជ្ញាកណ្ដាល ឃិន ឧសីហា ក្រោមក្រសែភ្នែកទស្សនិកជនប្រមាណជាង១ពាន់នាក់លើទីលាន ក្រុមភ្នំពេញក្រោន រកគ្រាប់បាល់បានដោយកីឡាករជម្រើសជាតិអាហ្វហ្គានីស្ថាន Fareed Sadat ២គ្រាប់ម្នាក់ឯង ខណៈកីឡាករ កែវ សុខផេង រកគ្រាប់បាល់វាយបកឱ្យវិសាខា បាន១គ្រាប់វិញ។
ពានរង្វាន់បើករដូវកាលថ្មី Cambodia Super Cup 2022 មានក្រុមចូលរួមតែ២ប៉ុណ្ណោះ គឺភ្នំពេញក្រោន ជាក្រុមជើងឯកពានរង្វាន់លីគកំពូលកម្ពុជាឆ្នាំ២០២១ និងក្រុមវិសាខា ជាម្ចាស់ជើងឯកពានរង្វាន់សម្តេចតេជោ ហ៊ុន សែន ឆ្នាំ២០២១៕
រូបភាព៖ CambodianPremierLeague
