មីយ៉ាន់ម៉ា – នៅថ្ងៃទី២ ខែមីនា ឆ្នាំ២០២២ នេះ សារព័ត៌មាន BBC មីយ៉ាន់ម៉ា និងសារព័ត៌មានធំៗរបស់ថៃបានចេញផ្សាយថាតារាសម្ដែងនិងតារាម៉ូដែលដ៏ល្បីរបស់ប្រទេសមីយ៉ាន់ម៉ា Paing Takhon ត្រូវបានអាជ្ញាធរដោះលែងឱ្យមានសេរីភាពឡើងវិញហើយ។
សូមចុចអាន – ប្រុសស្អាត Paing Takhon តារាសម្ដែងល្បីប្រចាំមីយ៉ាន់ម៉ា ជាប់ពន្ធនាគារចំនួន៣ឆ្នាំ…
យោងតាមការផ្សព្វផ្សាយពី BBC news របស់មីយ៉ាន់ម៉ា និង Gossipstar របស់ថៃបានឱ្យដឹងថាមិនត្រឹមតែបុរសសង្ហាម្នាក់នេះប៉ុណ្ណោះទេដែលត្រូវបានដោះលែងឱ្យមានសេរីភាពវិញ ក្នុងនោះសិល្បករចំនួន៦នាក់ផ្សេងទៀត ក៏ត្រូវបានដោះលែងដូចគ្នាដែរ។
ដំណឹងដ៏រីករាយនេះបានធ្វើឱ្យអ្នកគាំទ្រតារារូបនេះសប្បាយនិងរំភើបគ្រប់ៗគ្នា ជាពិសេសក្រុមអ្នកគាំទ្រទាំងក្នុងប្រទេសនិងក្រៅប្រទេស បានចេញមកផុសអបអរសាទរចំពោះសេរីភាពរបស់តារារូបនេះ។
Paing Takhon គឺជាតារាម៉ូដែលនិងតារាសម្ដែង ដែលសកម្មខ្លាំងក្នុងយុទ្ធនាការប្រឆាំងនឹងរដ្ឋាភិបាលយោធាភូមា លោកបានលះបង់កម្លាំងកាយនិងកម្លាំងចិត្តដើម្បីបុព្វហេតុជាតិ ដោយមើលឃើញពីការខិតខំប្រឹងប្រែងនេះ សាធារណជនទាំងក្នុងនិងក្រៅ បានកោតសរសើរចំពោះវីរភាពស្នេហាជាតិមាតុភូមិ និងជួយបួងសួងឱ្យរូបលោកឆាប់បានចេញពីពន្ធនាគារ។
ទីបំផុតការប៉ងប្រាថ្នារបស់មហាជនបានក្លាយជាការពិតហើយ ខណៈនេះលោកនិងតារាទាំង៦នាក់ផ្សេងទៀតបានវិលទៅកាន់លំនៅដ្ឋានរៀងៗខ្លួនហើយ៕
ប្រភព៖ Gossipstar, BBCBurmese