ក្រោយពីទទួលបានជោគជ័យគួរឱ្យកត់សម្គាល់នោះ បទចម្រៀង Version ប្រុស «ផ្លូវណាទៅផ្ទះម៉ែក្មេក» ក៏ត្រូវបានបង្ហោះចែករំលែកឱ្យអ្នកគាំទ្របានស្ដាប់និងទស្សនាកម្សាន្ត រហូតផ្ទុះការសរសើរម្ចាស់បទ ព្រមទាំងប្រៀបធៀបសំឡេងថាស្រដៀងនឹងតារាចម្រៀងល្បីទើបបានងារជាឧកញ៉ាថ្មីៗ ខេមរៈ សិរីមន្ត ទៀតផង។
បច្ចុប្បន្នបើនិយាយពីបទចម្រៀងប្រហែលជាគ្មានបទចម្រៀងណាអាចស៊ីដាច់បទ «ផ្លូវណាទៅផ្ទះម៉ែក្មេក» ដែលជាសំនៀងដើមរបស់កញ្ញា ថាន់ នឿថង នៃផលិតកម្ម HB Production នោះឡើយ ព្រោះទៅដល់ទីណាក៏ឮតែបទនេះចាក់ប្រគំរងំជានិច្ច។
ដោយមើលឃើញពីប្រជាប្រិយភាពនិងពេញនិយមច្រើនពីសំណាក់អ្នកគាំទ្រផលិតកម្ម HB បានបញ្ចេញ MV ផ្លូវការបទចម្រៀង «ផ្លូវណាទៅផ្ទះម៉ែក្មេក» នាថ្ងៃសៅរ៍ទី៥ ខែមីនា ឆ្នាំ២០២២ នេះតែម្ដង។ ត្រឹមតែ៧ម៉ោង គិតត្រឹមម៉ោង៥ ល្ងាច ក្នុងថ្ងៃដដែល បទចម្រៀងនេះមានចំនួនចូលទស្សនាជាង ៣ម៉ឺន ៥ពាន់ដង លើ Youtube មិនតែប៉ុណ្ណោះ ហ្វេនៗថែមទាំងចូលមក Comment សរសើរថាតារាចម្រៀងរូបសង្ហា ដែលជាអាយដល់របស់ពួកគេរូបនេះមានសំឡេងពីរោះស្ទើតែគ្រប់គ្នា។
នៅក្នុងចំណោមនោះក៏មានហ្វេនមួយចំនួនបានបានលើកជាការយល់ឃើញផ្ទាល់ខ្លួនដែរថា តារាចម្រៀងវ័យក្មេងរូបនេះមានទឹកដមសំឡេងពីរោះ ស្រដៀងនឹងកំពូលតារាចម្រៀងលំដាប់ប្រទេស លោក ខេមរៈ សិរីមន្តថែមទៀតផង។
ពេជ្រ ជេត្រា ដែលជាអតីតបេក្ខជនប្រឡងកម្មវិធី X-Factor Cambodia មានបទចម្រៀងល្បីនិងចំនួនទស្សនារាប់លានដងជាច្រើនបទនៅលើ Platform ផ្ទុកវីដេអូដ៏ធំដូចជា Youtube ដោយបទចម្រៀងទាំងនោះមានដូចជាបទ៖ «យកជីវិតចងដៃការអូន», «ក្បែរបងជិះកង់ក្បែរគេជិះឡាន», «ទឹកភ្នែកកម្មករ» និង «១ឆ្នាំចុងក្រោយ»៕