រឿងរ៉ាវកាន់តែរីកធំឡើងជាបន្តបន្ទាប់ពាក់ព័ន្ធនឹងការប្ដឹងផ្ដល់គ្នាទៅវិញទៅមករវាងលោកឧកញ៉ា ហេង សៀអ្នកជំនួញមានមុខមាត់ និង កញ្ញា យូប៊ីពិធីការិនីប្រចាំស្ថានីយទូរទស្សន៍ MYTV រហូតមានបុគ្គលថ្មីៗចូលពាក់ព័ន្ធក្នុងករណីនេះបន្ថែមទៀតជាច្រើននាក់ តួយ៉ាងដូចជាករណីឃាត់ខ្លួនកូនស្រីបង្កើតរបស់លោកឧកញ៉ានិងកូនប្រសារដែលជាអ្នកជំនួញល្បីម្ចាស់អាជីវកម្ម KOI និង TUBE CAFE។
ត្រយងមានឱកាសបានសម្ភាសន៍ជាមួយលោក ចាន់ណា រ៉ូណាន អ្នកដឹកនាំរឿងវ័យក្មេងដែលជាបុគ្គលម្នាក់ស្គាល់ជិតស្និទ្ធជាមួយនឹងគ្រួសារកញ្ញាយូប៊ី បានទម្លាយពីអត្តចរិតរបស់កញ្ញានិងក្រុមគ្រួសាររបស់កញ្ញាប្រាប់មកកាន់សារព័ត៌មានត្រយងថាកញ្ញាយូប៊ីគឺជាស្ត្រីម្នាក់ដែលមានអត្តចរិតថ្លៃថ្នូរបំផុត ហើយក៏ជាមនុស្សស្រលាញ់កិត្តិយសផងដែរ។
« យូប៊ីជាស្ត្រីម្នាក់ដែលស្រលាញ់កិត្តិយសខ្លាំងណាស់ ក្រុមគ្រួសាររបស់កញ្ញាជាអ្នកមានចំណេះដឹងខ្ពស់និងរស់នៅដោយភាពថ្លៃថ្នូរ ម្យ៉ាងទៀតកញ្ញាក៏មានរបស់ប្រើប្រាស់ល្អៗព្រោះស្ថិតក្នុងគ្រួសារមួយមានជីវភាពធូរធារ។ខ្ញុំបានស្គាល់ពូរបស់កញ្ញាយូប៊ីដែលជាម្ចាស់រីសតមួយនៅខេត្តមណ្ឌលគិរី ជាអ្នកណែនាំឱ្យខ្ញុំជួយមើលក្មួយស្រីដែលប្រឡូកក្នុងសិល្បៈផង មួយទៀតខ្ញុំមានឱកាសជជែកការងារជាមួយនឹងយូប៊ីច្រើន ព្រោះភាពយន្ត(កុំងាកក្រោយវគ្គ២) របស់ខ្ញុំគ្រោងនឹងយកកញ្ញាយូប៊ីមកថតដែរ។»
សូមចុចត្រង់នេះ៖ ក្រោយត្រូវបានដោះលែង យូប៊ី បានចេញថ្លែងអំណរគុណបុគ្គលសំខាន់ពីររូប!
អ្នកដឹកនាំរូបនេះបានរំលឹករឿងសំខាន់មួយថា៖ «ខ្ញុំនៅចាំបានពីអត្តចរិតរបស់យូប៊ីថាមានថ្ងៃមួយ កញ្ញាបានដើរបង្ហាញម៉ូដស្រាប់តែមានបុរសជាភ្ញៀវម្នាក់បានចាប់ទាញដៃយកលុយធីបមកឱ្យដាក់ក្នុងដៃកញ្ញា កញ្ញាបានបោះលុយឱ្យទៅភ្ញៀវនោះវិញ កញ្ញាមិនទទួលលុយនោះទេ មើលទៅកញ្ញាគឺជាមនុស្សប្រកាន់អត្តចរិតថ្លៃថ្នូរ ហើយជានារីដ៏ថ្លៃថ្នូរសុភាពរាបសា កញ្ញាខ្លាចភាពសិចស៊ីនិងខ្លាចប៉ះពាល់ដល់កិត្តិយសគ្រួសារខ្លាំងណាស់។» នេះជាអ្វីដែលលោក ចាន់ណា រ៉ូណាន បានប្រាប់មកកាន់អ្នកសារព័ត៌មានត្រយង។
ក្រៅពីលោករ៉ូណាន់ ចាន់ណាអ្នកដឹកនាំរឿងដែលបានស្គាល់ពីអត្តចរិតរបស់កញ្ញាហើយនោះ លោកតារា ឧសភា តារាសម្ដែងវ័យក្មេងមួយរូបដែលជាមិត្តរួមការងាររបស់កញ្ញា ក៏បានបង្ហោះលើបណ្ដាញសង្គមបញ្ជាក់ពីអត្តចរិតរបស់កញ្ញា មាន ពេជ្ររីតាដែរថា ៖ «ខ្ញុំបានរួមការងារជាមួយគាត់មួយរយៈហើយ គាត់ជាមនុស្សល្អ គោរពការងារ និងប្រឹងប្រែងចំពោះការងារណាស់ ខ្ញុំមិនជឿថាគាត់លួចទូរស័ព្ទនោះទេ។»
រឿងរ៉ាវប្ដឹងផ្ដល់រវាងកញ្ញាយូប៊ី ពិធីការិនីទូរទស្សន៍ MYTV និងឧកញ៉ា ហេង សៀនៅតែជាទីចាប់អារម្មណ៍និងតាមដានយ៉ាងយកចិត្តទុកដាក់ពីសំណាក់មហាជន ជាពិសេសក្រុមអ្នកសិល្បៈដែលមានបានចេញមកតវ៉ានិងទាមទារឱ្យស្វែងរកយុត្តិធម៌ជូនយុវតីដ៏ក្មេងខ្ចីរូបនេះ ចំណែកសាធារណជនក៏តាមដានរឿងរ៉ាវនេះយ៉ាងយកចិត្តទុកដាក់ដូចគ្នា៕