តាមរយៈសារព័ត៌មាន Insider បានចេញផ្សាយនៅពេលថ្មីៗនេះ បានឱ្យដឹងថា តារា Youtuber ជនជាតិកូរ៉េខាងត្បូងម្នាក់ ដែលជាអតីតយោធាជើងទឹកគឺ លោក Ken Rhee បានកំពុងធ្វើដំណើរទៅដល់ប្រទេសអ៊ុយក្រែន ដើម្បីស្ម័គ្រចិត្តចូលសមរភូមិជួយប្រយុទ្ធធ្វើសង្គ្រាមប្រឆាំងនឹងរុស្សី។
តែយ៉ាងណាមិញ គេមិនបានដឹងថាលោកធ្វើដំណើរចេញពីប្រទេសណានោះទេ ខណៈរដ្ឋាភិបាលកូរ៉េខាងត្បូង កំពុងមានវិធានការរឹតបន្តឹងចំពោះការឆ្លងដែនទៅកាន់អ៊ុយក្រែន និងហាមឃាត់មិនឱ្យប្រជាជនកូរ៉េឱ្យធ្វើដំណើរទៅកាន់ប្រទេសអ៊ុយក្រែន។ តាមសេចក្ដីថ្លែងការណ៍មួយ ក្រសួងការបរទេសកូរ៉េខាងត្បូងបានលើកឡើងថា «អ្នកណាម្នាក់ដែលឆ្លងដែនទៅអ៊ុយក្រែនដោយគ្មានការអនុញ្ញាត អាចនឹងត្រូវជាប់ពន្ធនាគារ១ឆ្នាំ ឬពិន័យជាប្រាក់រហូតដល់ 10 លានវ៉ុន (ប្រហែល 8,150 ដុល្លារ)។ ហើយពួកគេក៏នឹងត្រូវដកហូតលិខិតឆ្លងដែនរបស់ពួកគេ និងអាចប្រឈមមុខជាមួយនឹងបញ្ហាក្នុងការស្នើរសុំយកលិខិតឆ្លងដែនវិញ»។
យ៉ាងណាក្ដី លោក Ken Rhee ជាតារា Youtuber ដែលមានរូបរាងសង្ហា និងមានវ័យ ៣៧ ឆ្នាំ រហូតមកទល់សព្វថ្ងៃនេះមានអ្នក Subscribe ឆាណែលយូធូបរបស់លោកចំនួនជាង ៧ សែននាក់ ដោយរាល់វីដេអូនីមួយៗរបស់លោកមានអ្នកចូលទៅទស្សនាច្រើនជាង ១០០លានដង។ លោកបានបង្ហោះនៅលើបណ្ដាញសង្គមអ៊ីនស្ដាក្រាមរបស់លោកថា «ក្រុមរបស់ខ្ញុំបានមកដល់អ៊ុយក្រែនដោយសុវត្ថិភាព។ ជាជាងខ្ជះខ្ជាយពេលវេលាក្នុងការស្វែងរកលិខិតឆ្លងដែនរបស់យើងមិនត្រឹមត្រូវ។ សូមគិតពីអ្វីដែលអ្នកអាចជួយបានប្រសើរជាង» ។ មួយទៀត លោកក៏បានបង្ហោះពីគោលជំហររបស់លោកដែលថា «ក្នុងអំឡុងសង្គ្រាមកូរ៉េ ពិភពលោកបានជួយកូរ៉េ។ ឥឡូវនេះ យើងនឹងជួយអ៊ុយក្រែន។ យើងមិនអាចគ្រាន់តែឈរក្បែរ និងមើលមនុស្សស្លូតត្រង់ត្រូវរបួស និងស្លាប់នោះទេ»។
ស្របពេលនោះដែរ Ken Rhee ត្រូវបានសារព័ត៌មានកូរ៉េ The Korea Herald ទម្លាយសាវតារថា លោកក៏ធ្លាប់បានបង្ហាញមុខក្នុងស៊េរី YouTube «Fake Men» ជាមួយសកម្មភាពហ្វឹកហាត់យោធាជើងទឹក ហើយនៅអំឡុងឆ្នាំ ២០០០ លោកត្រូវបានចោទប្រកាន់និងកាត់ទោសពីបទរំលោភផ្លូវភេទលើនារីផងដែរ៕
ប្រភព៖ Insider
ទស្សនាវីដេអូ Big News៖