នៅព្រឹកថ្ងៃអង្គារ ទី១៨ ខែឧសភា ឆ្នាំ២០២១ នេះក្លិបកីឡាបាល់ទាត់ខេត្តព្រៃវែង សមាជិកក្នុងពានរង្វាន់លីគកំពូលកម្ពុជា Metfone Cambodian League 2021 បានប្រកាសចែកផ្លូវជាមួយគ្រូបង្វឹកអ្នកចាំទីជនជាតិថៃ នៅពាក់កណ្ដាលទី។
បើតាមការបញ្ជាក់នៅលើហ្វេសប៊ុកផ្លូវការរបស់ក្លិបថា៖«ពួកយើងបានសម្រេចចិត្ដចែកផ្លូវក្រោយយល់ព្រមពីភាគីទាំងសងខាងក្នុងការបញ្ចប់កិច្ចសន្យាជាមួយលោកគ្រូ Arthit Thanusorn គ្រូបង្វឹកអ្នកចាំទី ដោយលោកគ្រូមានភារកិច្ចចាំបាច់ផ្ទាល់ខ្លួនត្រូវត្រឡប់ទៅប្រទេសថៃវិញ»។
យ៉ាងណាក្តីក្លិបមានមូលដ្ឋាននៅខេត្តព្រៃវែង មួយនេះនៅមិនទាន់បង្ហាញសមាសភាពគ្រូបង្វឹកថ្មីនៅឡើយទេ ក្រោមការដឹកនាំរបស់លោក Thongchai Rungreangles ជាគ្រូបង្គោល។
ការចាកចេញរបស់គ្រូបង្វឹកអ្នកចាំទីខាងលើក្រោយបានជួយក្រុមរកបានជ័យជម្នះ១លើក ស្មើគ្នា១លើក និងបរាជ័យ១លើក។ ប្រកួតចុងក្រោយ ក្រុមនេះយកឈ្នះលើក្រុម Soltilo Angkor FC ដោយលទ្ធផល៦ទល់០ លើទីលានកីឡដ្ឋានខេត្តរបស់ខ្លួន៕
