ដូចមហាជនអ្នកគាំទ្របានជ្រាបមកហើយថា តារាកំប្លែង នីឡា បានរៀបមង្គលការជាមួយស្វាមីនៅព្រឹកថ្ងៃទី ១៩ ខែមីនា ឆ្នាំ២០២២ ដែលមានតារាសិល្បៈប្រុសស្រី និងអ្នកមុខអ្នកការជាច្រើននាក់បានចូលរួមជាភ្ញៀវកិត្តិយសអបអរអ្នកទាំងពីរ។ យ៉ាងណាមិញ នីឡា បានអះអាងប្រាប់អ្នកសារព័ត៌មានថា ពិធីមង្គលការរបស់នាងបានលើកពេលអស់ ៥ដងមកហើយ បើគិតទៅគឺពន្យារពេលជិត៣ឆ្នាំ។
តារាកំប្លែង នីឡា បានរម្លឹកថា អ្នកនាង និងស្វាមី បានស្គាល់គ្នាដោយចៃដន្យ ហើយបានចំណាយពេលវេលាយល់ចិត្តគ្នាអស់រយៈពេល៥ឆ្នាំមកហើយ។ អ្នកនាង នីឡា ថា ការដែលព្រមទទួលយកលោក ស៊ុត សក្ការៈ ជាស្វាមី នោះក៏ព្រោះតែអ្នកនាង និងស្វាមីបានស្គាល់ចិត្តថ្លើមគ្នាអស់ហើយ ព្រមទទួលយកទាំងចំណុចល្អ និងចំណុចអាក្រក់គ្នាទៅវិញទៅមក។ អ្នកនាងថា នៅពេលរៀបការហើយក៏ដោយ ក៏នាងមិនចង់បែកចេញពីគ្រួសារទៅរស់នៅតែ២នាក់ប្ដីប្រពន្ធនោះទេ បើទោះជាគម្រោងទិញផ្ទះ និងត្រៀមបង្កើតមុខរបរក្រៅសិល្បៈបានគិតគូអស់ហើយក្ដី។
នីឡា បានបញ្ជាក់ប្រាប់ទៀតថា អ្នកនាងមានគ្រោងគិតគូរឿងយកកូនភ្លាមៗ ក្រោយរៀបមង្គលការហើយ ព្រោះអ្នកនាងគិតថា ការយកកូនទាន់នៅវ័យក្មេងគឺល្អ កុំឱ្យចាស់ទៅទើបចង់យកកូនហួសពេលដែលនាំឱ្យស្ដាយក្រោយ។ ដោយឡែក នីឡា បន្តទៀតថា អ្នកនាងនៅតែបន្តអាជីពសិល្បៈដដែល ហើយស្វាមីអ្នកនាងក៏គាំទ្រចំពោះរឿងនេះផងដែរ។ ហេតុនេះហើយនាងនៅតែបន្ដលេងកំប្លែងជាធម្មតាដូចមុនដដែល ខណៈដែលគម្រោងក្រេបទឹកឃ្មុំ នៅទីណានោះមិនទាន់គិតដល់ឡើយ ដោយសារតែរៀបការរួច សម្រាកតែ២ថ្ងៃប៉ុណ្ណោះ នឹងចេញថតកំប្លែងវិញហើយ៕
សូមចូលអាន-ដល់ថ្ងៃការទើបដឹងថា អតីតតារាសម្ដែង ព្រីង ច័ន្ទបុត្រ គឺជាឳពុកក្មេករបស់ នីឡា
