កាលពីពេលថ្មីៗនេះផេកមួយមានឈ្មោះថា OppAcademy ដែលជាផេកគាំទ្ររឿងភាគកូរ៉េរបស់ហ្វ៊ីលីពីនបានចែករំលែកដំណឹងល្អសម្រាប់អ្នកគាំទ្រដោយបានឱ្យដឹងថាភាពយន្តភាគកូរ៉េដ៏ល្បីល្បាញ «Start-Up» កំពុងត្រូវបានក្រុមការងារត្រៀមយកមកផលិតជា Version ហ្វ៊ីលីពីន ថែមទាំងបង្ហាញតួអង្គសំខាន់ទាំង៤រូបរបស់ហ្វ៊ីលីពីនដែលនឹងត្រូវសម្ដែងផងដែរ។
យ៉ាងណាមិញអ្នកគាំទ្រហ្វ៊ីលីពីនក្រោយបានឃើញដំណឹងនេះដូចជាមិនសូវគាំទ្រនិងសប្បាយចិត្តប៉ុន្មាននោះឡើយ ដែលហ្វ៊ីលីពីនយករឿងភាគដ៏ល្អរបស់កូរ៉េមកផលិតជាភាពយន្តភាគហ្វ៊ីលីពីន។ សម្រាប់ហ្វេនៗមួយចំនួនយល់ថាតួអង្គដែលក្រុមផលិតហ្វ៊ីលីពីនយកមកសម្ដែងនោះហាក់ដូចជាមិនទាន់សក្ដិសមប៉ុន្មាននោះឡើយ ខណៈដែលមតិខ្លះយល់ឃើញថាតួអង្គហ្វ៊ីលីពីនមើលទៅមានវ័យរាងជ្រេបន្តិចបើប្រៀបទៅនឹងតួអង្គដើមរបស់កូរ៉េ។
«មើលទៅតួសម្ដែងដូចជាមិនសូវសមនោះទេ?», «បើយកតួអង្គក្មេងៗជាងនេះប្រហែលជាល្អ», «គ្មានអ្នកណាគេមើលនោះទេ», «តើអ្នកនិពន្ធល្អនៅហ្វ៊ីលីពីនអត់មានទេ? មើលទៅដូចជាថតតាមរឿងកូរ៉េច្រើនពេកហើយ ហាសៗ សុំទោសផង ប៉ុន្តែបើមើលពីគុណភាពរបស់រឿងវិញដូចជាអន់ថយទៅហើយ ហាសៗ បញ្ចូលសំឡេងរឿងដើមគេទៅ ប៉ុន្តែមិនបាច់ថតតាមគេទេ ហាសៗ», «ចប់ហើយ! តួឯកស្រីមិនសមជាមនុស្សស្រីចាស់នោះទេ», «ឧស្សាហកម្មភាពយន្តហ្វ៊ីលីពីនល្មមជួលអ្នកនិពន្ធក្មេងៗដែលមានគំនិតច្នៃប្រឌិតបានហើយ»។
រាល់មតិលើកឡើងខាងលើនេះគ្រាន់តែជាមតិមួយចំនួនតូចដែលសារព័ត៌មានត្រយងបានដកស្រង់ចេញពីផេក OppAcademy ប៉ុន្តែនៅមានមតិមួយចំនួនធំទៀតដែលបង្ហាញទស្សនៈមិនគាំទ្រ រិះគន់ និងមិនពេញចិត្តចំពោះការផលិតភាពយន្តនេះជារឿងភាគរបស់ហ្វ៊ីលីពីន។
រឿងភាគ «Start-Up» គឺជារឿងភាគរបស់ TVN ដែលបានបញ្ចាំងនៅលើ Platform Netflix ហើយទទួលបានការគាំទ្រនិងសរសើរយ៉ាងច្រើន រហូតក្លាយជាភាពយន្តល្អនិងមានការពេញនិយមខ្លាំងបំផុតមួយរបស់កូរ៉េខាងត្បូងនៅលើ Netflix ផងដែរ៕
ប្រភព៖ OppAcademy
