កាន់តែកៀកជិតដល់ថ្ងៃពិធីបុណ្យចូលឆ្នាំថ្មីប្រពៃណីខ្មែរ បណ្ដាផលិតកម្មជាច្រើននៅក្នុងស្រុក កំពុងសម្រុកថតបទចម្រៀងចូលឆ្នាំជាច្រើនបទ ដើម្បីបំពេញតម្រូវការអ្នកគាំទ្រ។ ដោយឡែកផលិតកម្ម កាឡាក់ស៊ីណាវ៉ាត្រា ក៏បានប្រមូលផ្ដុំតារាល្បីៗជាច្រើននាក់ មកចូលរួមសម្ដែងក្នុង MV បទថ្មីៗសម្រាប់ចូលឆ្នាំផងដែរ។
ថ្មីៗនេះគេបានឃើញតារាប្រុសប្រចាំផលិតកម្ម កាឡាក់ស៊ីណាវ៉ាត្រា គឺលោក ខេម បានបង្ហោះពីសកម្មភាពក្រៅឆាកថត MV បទចម្រៀងចូលឆ្នាំ២០២២នេះ ដោយឃើញមានការចូលរួមសម្ដែងពីសំណាក់តារាល្បីៗដូចជា នាយ ក្រឹម អ្នកនាង សារ៉ាយ សក្កណា កញ្ញា ពៅ លីដា និងតារាកិត្តិយសជាច្រើនរូបទៀត។ អ្វីដែលមហាជនអ្នកគាំទ្របានផ្ដោតការចាប់អារម្មណ៍ខ្លាំងនោះគឺវត្តមាន អ្នកនាង សារ៉ាយ ស័ក្កណា ដែលទើបតែបង្ហាញមុខដំបូងក្នុងការថត MV សម្រាប់បទចម្រៀងចូលឆ្នាំឱ្យផលិតកម្ម កាឡាក់ស៊ីណាវ៉ាត្រា បន្ទាប់ពីអ្នកនាងបានវិលមកកម្ពុជា។
បើនិយាយពីហ្វេហ្សិនរបស់ សារ៉ាយ ស័ក្កណា វិញគឺថាញាក់សាច់តែម្ដង ពោលគឺ អាវបំពង់ដៃវែង ខោជើងប៉ាត់ឆែកពីក្រោមរហូតដល់ដើមភ្លៅ មានគ្រប់ពណ៌ដូចជា ក្រហម ទឹកប៊ិច ស្វាយ ជាដើម។ ហ្វេហ្សិនចូលឆ្នាំសម្រាប់តារាស្រីរូបនេះ ត្រូវបានហ្វេនអ្នកគាំទ្រលាន់មាត់ថា «សុំចាញ់ត្រង់ពណ៌ខោតែម្ដង ពូកែរើសពណ៌ណាស់» ហើយអ្នកខ្លះទៀតក៏និយាយថា «ឆ្ងល់ណាស់ចែ រកបានឈុតប្លែកៗរហូត ពណ៌វិញឡើងកប់» ។
យ៉ាងណាមិញ នៅមិនទាន់មានការបញ្ជាក់ពីផលិតកម្មនៅឡើយទេថា អ្នកនាង សារ៉ាយ ស័ក្កណា បានចូលរួមសម្ដែងនៅក្នុងបទអ្វី ប៉ុន្ដែហ្វេនមានការរំពឹងខ្ពស់ថា ប្រាកដជាផ្ទុះសំណើចជាមួយការសម្ដែងរបស់អ្នកនាងជាក់ជាមិនខាន។ ចង់ដឹងថា ហ្វេហ្សិនរបស់អ្នកនាង សារ៉ាយ ស័ក្កណា នៅក្នុងឆ្នាំនេះ ឆើតឆាយយ៉ាងណាខ្លះនោះ សូមទស្សនារូបភាពខាងក្រោមនេះ៖
អត្ថបទពាក់ព័ន្ធ៖
សូមចូលអាន-សារ៉ាយ សក្កណា មកដល់ខ្មែរលើកនេះ ត្រូវប៉ាន់សំរុកថតបង្ហាញម៉ូដឱ្យសំអាងការក្នុងស្រុក!
សូមចូលអាន-ស្ងាត់ៗ អតីតតារាសម្ដែងល្បី សារ៉ាយ សក្កណា នាំកូនក្រមុំដ៏ស្អាតមកលេងស្រុកខ្មែរ!