អាមេរិក – គ្រួសារនិងមិត្តភក្ដិបានផ្ដល់ដំបូន្មានដល់ Will Smith ឱ្យស្វែងរកការព្យាបាលផ្លូវចិត្តក្រោយបុរសល្បីរូបនេះបានទះកំផ្លៀង Chris Rock នៅឆាកប្រកាសពានរង្វាន់អូស្ការឆ្នាំ២០២២។
កាលពីថ្ងៃទី៥ ខែមេសាម្សិលមិញប្រភពជិតស្និទ្ធនឹងគ្រួសារ Will Smith បានប្រាប់ Fox News ថាមិត្តភក្ដិជាច្រើននាក់បានផ្ញើសារទៅតារារូបនេះយ៉ាងស្ងៀមស្ងាត់ដើម្បីសាកសួរពីបញ្ហានេះ ដោយអ្នកខ្លះនិយាយថាសកម្មភាពហិង្សារបស់ Smith គឺបានបង្ហាញពីកំហឹងនៅខ្លួនរបស់លោក។ អ្នកទាំងអស់នោះបានផ្ដល់ដំបូន្មានដល់លោកឱ្យផ្អាកការសម្ដែងមួយរយៈហើយទៅជួបពេទ្យដើម្បីព្យាបាលផ្លវូចិត្ត និងដោះស្រាយបញ្ហាផ្ទាល់ខ្លួនរបស់លោកសិន។
បុគ្គលម្នាក់ទៀតបានប្រាប់សារព័ត៌មាន ET ថាសាច់ញាតិរបស់ Will Smith បានចំណាយពេលជាច្រើនកំដរលោកខណៈដែលលោកកំពុងជួបប្រទះបញ្ហាលំបាក។ ខណៈដែលភរិយារបស់ Smith លោកស្រី Jada Pinkett បាននិយាយថាលោកស្រីសង្ឃឹមថាស្វាមីមិនបានវាយមនុស្សណាម្នាក់ឡើយ។ លោកស្រីនិយាយថាលោកស្រីមិនបន្ទោសលោក Will Smith ឡើយ។ លោកស្រីនិយាយទៀតថា «នេះគឺជាពេលវេលាសម្រាប់ព្យាបាលរបួស ហើយខ្ញុំនៅទីនេះដើម្បីជួយ) កូនស្រីរបស់ពួកគេ Willow និងកូនប្រុស Jaden សុទ្ធតែបង្ហាញគោលជំហរគាំទ្រចំពោះឪពុកពួកគេ។
ក្រោយកើតមានហេតុការណ៍ហិង្សានៅលើឆាកអូស្ការ អាជីពរបស់ Will Smith អាចនឹងប៉ះពាល់ឬអាចនិយាយបានថាបាត់បង់ផងក៏មិនដឹង។ លោកអាចនឹងត្រូវបានដកហូតពានរង្វាន់អូស្ការទីមួយដែលលោកទើបនឹងឈ្នះយកទៅវិញ ខណៈដែលក្រុមហ៊ុនផលិត Content សិល្បៈធំៗប្រកាសផ្ដាច់កុងត្រាជាមួយនឹងលោក ចំណែកផលិតករល្បីៗមួយចំនួនបានប្រកាសថាពួកគេនឹងឈប់ធ្វើជាមួយនឹង Smith ឬហៅលោកថតភាពយន្តទៀតហើយ៕
ប្រភព៖ VNExpress