មុននេះបន្តិចគេបានឃើញវីដេអូដែលបង្ហោះឡើងដោយកញ្ញា ប៉ូ គីមថេងសុតធីតា ដែលស្ដែងឱ្យឃើញថា ឆ្នាំនេះកញ្ញាក៏បានចូលរួមតុបតែងកាយ ទ្រង់គ្រឿង ជាទេវតាឆ្នាំថ្មី ព្រះនាងកិរិណីទេវី បុត្រីទី៥នៃកបិលមហាព្រហ្ម ដើម្បីត្រៀមអបអរពិធីបុណ្យចូលឆ្នាំខ្មែរប្រពៃណីជាតិ។ ពិតណាស់ នេះគឺជាឆ្នាំទី២ ហើយដែល Miss Grand Cambodia 2021 រូបនេះ បានតុបតែងជាទេវតាឆ្នាំថ្មី។
ដោយឡែកឆ្នាំនេះ គឹផ្ទុយពីឆ្នាំមុន ចំពោះឈុតដែលកញ្ញា ប៉ូ គីមថេងសុតធីតា គ្រងគឺស្អាតប្លែកៗ មើលទៅដូចជាទេពធីតាក្នុងគំនូរបុរាណខ្មែរអីចឹង។ ឈុតនេះដែលត្រូវបានគេដឹងថា ជាឈុតដែលរចនាដោយ អ្នកជំនាញច្នៃម៉ូដ ឈ្មោះ ស្ករគ្រាប់។ មហាជនអ្នកគាំទ្រ សុតធីតា លាន់មាត់សរសើរចេញពីចិត្ត ពីសម្រស់ដ៏ស្រស់ដ៏បវររបស់កញ្ញានៅពេលគ្រងឈុតទេវតាឆ្នាំថ្មី។
សូមជម្រាបថា ពិធីបុណ្យចូលឆ្នាំថ្មីប្រពៃណីខ្មែរ នឹងចូលនៅថ្ងៃព្រហស្បតិ៍ទី១៣ កើតខែចេត្រ វេលាម៉ោង១០ព្រឹក ត្រូវនឹងថ្ងៃ១៤ ខែមេសា គ.ស២០២២ ១០:០០នាទីព្រឹក នឹងគន់គូរមហាសង្ក្រាន្តឆ្នាំថ្មី ដល់ទីចុងជួបរវាងមីនរាសី និងមេសរាសី ក្នុងកាលវេលាព្រឹក។ ទើបមានទេពធីតាមួយព្រះអង្គព្រះនាម កិរិណីទេវី ជាបាទបរិចាកា គង់នៅចាតុម្មហារាជិកា ឆកាមាសួគ៌ជាន់ទី១ អម្ពរពស្ត្រាពណ៌ស្លឹកចេកស្រស់ (បៃតង) ស៊កសៀតលម្អព្រះកាណ៌ដោយ បុប្ផាមន្ទារវបុស្ប គ្រឿងប្រដាប់ដោយ កែវមរកត ចិញ្ចាចរស្មី រីភក្សាហារទ្រង់សោយ ធញ្ញហារ មានសណ្តែកល្ងជាចំណី មានសាស្ត្រាវុធជា កង្វេរ (ក្ងក់ទាក់កាវដំរី) កាន់នៅនាព្រះហស្ថស្តាំ និងកាំភ្លើង (អសនី) ទ្រនាប់កាន់នៅព្រះហស្ថឆ្វេងធីតានាងគង់ឈរគន់រំពៃលើខ្នងពាហន: គជសារ (ដំរី) ជាយាន ចុះចាកសួគ៌ាមកកាន់ជម្ពូទ្វីបា។
