«Four Barang In A Tuktuk» បទចម្រៀងចង្វាក់ Remix សប្បាយៗបកស្រាយដោយ Astronomy Class Ft. RuthKo & Vin Vitou បូកផ្សំនឹងសំឡេងច្រៀងដ៏ពីរោះរណ្ដំរបស់អ្នកនាង កាក់ ចន្ធី បានធ្វើឱ្យបទនេះទទួលបានការសរសើរយ៉ាងក្រាស់ក្រែលពីសំណាក់អ្នកស្ដាប់និងទស្សនា បើទោះជាម្ចាស់សំឡេងបានលាចាកលោកនេះទៅបន្សល់ទុកតែក្ដីអាលោះអាល័យក៏ដោយ។
អ្នកនាង កាក់ ចន្ធី តារាចម្រៀងរ៉ក់ខេនរ៉ូល ម្ចាស់បទ «យប់នេះខ្ញុំចង់ញ៉ាំស្រា» ដែលមានដើមកំណើតនៅខេត្តព្រៃវែងស្លា.ប់ដោយសារតែគ្រោះថ្នាក់ចរាចរ នៅវេលារំលងអាធ្រាត្រ ចូលថ្ងៃអង្គារ ទី២០ មីនា ឆ្នាំ២០១៨ ខណៈកំពុងធ្វើដំណើរតាមរ៉ឺម៉កកង់បី ជាមួយមិត្តភក្តិ ត្រឡប់ទៅផ្ទះវិញ។
ថ្វីបើរូបកាយអ្នកនាងបានរលាយបាត់ពីផែនដីនេះអស់រយៈពេល៤ឆ្នាំហើយក្ដី មែនប៉ុន្តែទេពកោសល្យសំឡេងដ៏ល្អអ្នកនាងត្រូវបានក្រុម KlapYaHandz យកមកផលិតជាថ្មីឡើងវិញតាមរយៈការ Mix បញ្ចូលសំឡេងដើមអ្នកនាងជាលក្ខណៈ Featuring បូកបញ្ចូលនឹងបារ៉ូលរ៉ែបថ្មីរបស់តារាចម្រៀងរ៉ែប RuthKo & Vin Vitou និង Astronomy Class ធ្វើឱ្យបទចម្រៀងនេះកាន់តែរស់រវើកគួរឱ្យចង់ស្ដាប់ថែមមួយកម្រិតទៀត។
យោងតាមការលើកឡើងពីឆាណែលយូធូបរបស់ KlapYaHandz បទចម្រៀងខាងលើនេះផលិតឡើងជាពិសេសដើម្បីរំលឹកដល់អ្នកនាង កាក់ ចន្ធី តារាចម្រៀងរ៉ក់ខេនរ៉ូល។
អ្នកគាំទ្របានផ្ដល់នូវតម្លៃនិងលើកសរសើរយ៉ាងច្រើនចំពោះបទចម្រៀងខាងលើនេះមិនថាទាំងចង្វាក់ភ្លេង ការថត ការសម្ដែង ទេសភាពគឺល្អទាំងអស់ ថែមទាំងមានជនបរទេសជាច្រើនចង់មកលេងកម្សាន្តនៅប្រទេសកម្ពុជាបន្ទាប់ពីបានទស្សនាបទចម្រៀងនេះរួចថែមទៀតផង។
សម្រាប់បទចម្រៀងនេះក៏ស័ក្ដិសមផងដែរសម្រាប់ចាក់រាំនិងច្រៀងកម្សាន្តក្នុងរដូវបុណ្យចូលឆ្នាំប្រពៃណីខ្មែរ ព្រោះតែចង្វាក់និងទំនុកច្រៀងដែលបង្កប់ទៅដោយភាពរីករាយគឺស៊ីទៅនឹងបរិយាកាសឈប់សម្រាកលម្ហែជួបជុំក្រុមបងប្អូនមហាគ្រួសារខ្មែរនាឱកាសចូលឆ្នាំខាងមុខនេះ។
ចង់ដឹងថាបទចម្រៀង «Four Barang In A Tuktuk» ពីរោះនិងគួរឱ្យទាក់ទាញប៉ុណ្ណានោះសូមតាមដានខាងក្រោម៖