កាលពីថ្ងៃទី១១ ខែមេសា ម្សិលមិញនេះមហាជនភ្ញាក់ផ្អើលយ៉ាងខ្លាំងដោយសារតែលេចវត្តមានពិធីកររូបសង្ហារបស់ស្ថានីយទូរទស្សន៍ភីអិនអិន(PNN) លោក យឹម ណារ៉ា គ្រងចីវរនិងកោរសក់សាងផ្នួសបួសជាសាមណេរយ៉ាងស្ងប់ស្ងាត់នៅខេត្តសៀមរាប។
យោងតាមរយៈការចែករំលែកដោយហ្វេសប៊ុកផេករបស់សាមណេរ យឹម ណារ៉ា ពីហ្វេសប៊ុកមួយដែលមានឈ្មោះថា វិជ័យសំណាង ចិត្តអ្នកសង្រ្គោៈ បានឱ្យដឹងថាមូលហេតុនៃការសម្រេចចិត្តកោរសក់បួសជាសាមណេរលើកនេះក៏ដោយសារតែលោកមានសិទ្ធាជ្រះថ្លាក្នុងព្រះពុទ្ធសាសនា បំពេញបុណ្យកុសលនិងកសាងសេចក្ដីស្ងប់សុខ។
នៅក្នុងសំនេរនោះបានរៀបរាប់យ៉ាងខ្លីថា៖ «អាត្មាភាពជាសាមណេ Nara Yim. ជាពិធីករ pnn មានសទ្ធាចូលកាន់បួសក្នុងព្រះពុទ្ធសាសនាមួយរយះដើម្បីបំពេញបុណ្យកុសលនិងសេចក្តីស្ងប់»
ការកោរសក់បួសដើម្បីបំពេញកុសលនិងស្វែងរកសេចក្ដីស្ងប់សុខរបស់លោកនេះត្រូវបានតារាសិល្បៈរៀមច្បងគឺអ្នកនាង ស៊ឹម សូលិកា និងស្វាមីលោក អេង ឬទ្ធី ចូលរួមអនុមោទនា ដោយបានចូលទៅគោរពថ្វាយបង្ខំសាមណេរទើបនឹងសាងផ្នួសថ្មោងថ្មីដល់ទីតាំងវត្តក្នុងខេត្តសៀមរាបនោះផងដែរ។
«ថ្ងៃនេះខ្ញុំព្រះករុណានិងក្រុមគ្រួសារ បានមកក្រាបថ្វាយបង្គំលោកកូន Nara Yim និងធ្វើបុណ្យចែកទាន នៅវត្តប្រាសាទត្រាំនាគ ខេត្តសៀមរាប សូមជូនបុណ្យកុសលដែលយើងខ្ញុំបានកសាង ចែកជូនដល់បងប្អូនញាតិមិត្តជិតឆ្ងាយទាំងអស់គ្នាផងចុះ ។សូមអនុមោទនាបុណ្យដោយសេចក្ដីជ្រៈថ្លា សាធុ សាធុ សាធុ ថ្ងៃអង្គារ ទី១២ ខែមេសា ឆ្នាំ២០២២»
នៅក្រោមការបង្ហោះចែករំលែករបស់អ្នកនាង ស៊ឹម សូលិកា ក៏មានមិត្តសិល្បៈក្នុងរង្វង់សិល្បៈដូចគ្នាជាច្រើនអ្នកបានចូលមកសាធុនិងអនុមោទនាផលបុណ្យ ក្នុងនោះមាន កញ្ញា ហ៊ិន ច័ន្ទនីរ័ត្ន លោក ជា វិបុល កញ្ញា ថន លក្ខិណា កញ្ញា ហេង កែវនីតា លោក ជា វណ្ណារិទ្ធិ អ្នកនាង សុខ សុម៉ាវត្តី និងមិត្តសិល្បករជាច្រើនដួងទៀត។
សម្រាប់ការបួសបំពេញកុសលផលបុណ្យនិងដើម្បីរកសេចក្ដីស្ញប់ក្នុងចិត្តរបស់ ពិធីករ យឹម ណារ៉ា ឬសាមណេរ យឹម ណារ៉ា នេះត្រូវបានមហាជនមានកោតសរសើរព្រោះលោកមិនបានប្រើប្រាស់សាសនាដើម្បីរំដោះខ្លួនគេចពីកំហុស ឬក៏ប្រើប្រាស់សាសនាដើម្បីគេចពីការថ្កោលទោសណាមួយនោះ។
សារព័ត៌មានត្រយងសូមចូលរួមអនុមោទនា សាធុ ចំពោះផលបុណ្យកុសលដែលសាមណេរ យឹម ណារ៉ា បានបួសរៀននិងបំពេញក្នុងពេលនេះផង។
ប្រភព៖ Facebook សុឹម សូលិកា, Nara Yim