កាលពីយប់មិញនេះ (១២ មេសា ២០២២) តារាចម្រៀងជើងចាស់ក្នុងផលិតកម្មហង្សមាស ពេជ្រ សោភា បានបង្ហោះសំឡេងសន្ទនា របស់ខ្លួនជាមួយនឹងតារាចម្រៀងថ្មោងថ្មីរបស់ផលិតកម្មនេះគឺ ឈាន ជាឡឺយ នៅលើបណ្ដាញទំនាក់ទំនងសង្គម Instagram ដែលពាក្យសន្ទនានោះអ្នកណាបានស្ដាប់ឮហើយក៏មិនអាចអត់ទ្រាំ មិនផ្ទុះសំណើចបានដែរ។
សារជាសំឡេងដែលអតីតគណៈកម្មការកម្មវិធី Beat the best រដូវកាលទីមួយបានបង្ហោះនោះ គឺជាប្រយោគសន្ទនាខ្លី ដែលអតីតបេក្ខជនប្រកួតកម្មវិធី Beat the best វ័យ ១៨ឆ្នាំ បានសាកសួរចម្ងល់របស់ខ្លួនទៅកាន់រៀមច្បងអ្នកនាង ពេជ្រ សោភា។ បើគ្រាន់តែជាសំនួរធម្មតានោះមិនអីនោះទេ តែការសួរបែបឆ្ងល់ពេញទំហឹងរបស់ ជាឡឺយ នោះឯង ដែលធ្វើឲ្យមហាជនផ្ទុះសំណើចដោយក្ដីអាណិតស្រឡាញ់ចំពោះអ្នកកំលោះវ័យក្មេងដ៏បរិសុទ្ធរូបនេះ។
ឈាន ជាឡឺយ បានសួរទៅកាន់ ពេជ្រ សោភាព្រោះតែឆ្ងល់ថាដំបូងឡើយគេហៅឱ្យលោកទៅច្រៀងនៅកំពង់សោមប៉ុន្តែក្រោយមកម៉េចក៏និយាយថាក្រុងព្រះសីហនុទៅវិញ ដោយក្រោយមកអ្នកនាង ពេជ្រ សោភា បានពន្យល់ប្រាប់ដល់លោកថា ព្រះសីហនុ និងកំពង់សោម គឺជាទីកន្លែងតែមួយ។
ខាងក្រោមនេះគឺជាបទសន្ទនាខ្លីរវាង ឈាន ជាឡឺយ និង ពេជ្រ សោភា៖
ជាឡឺយ៖ ជំរាបសួរ ចែភា ជំរាបសួរ ចែភាមើល ថ្ងៃមុនគេថាខ្ញុំច្រៀងនៅកំពង់សោម តែឥឡូវដាក់ព្រះសីហនុវិញ ម៉េចចឹង?
ពេជ្រ សោភា៖ កំពង់សោមនិងព្រះសីហនុតែមួយតើ ម៉េចក៏សំអឿនម្ល៉េះ
ជាឡឺយ៖ ខ្ញុំណេះខំផុសដាក់កំពង់សោម
សំឡេងសន្ទនានេះត្រូវបានអ្នកគាំទ្រជាច្រើនចូលមកខមមិន លើកសរសើរថា ឈាន ជាឡឺយ គឺជាមនុស្សត្រង់ ខណៈដែលអ្នកខ្លះទៀតក៏ចូលមកខមមិនថាអត់ទ្រាំសើចមិនបានទេនោះទេចំពោះអ្វីដែលអ្នកនាងពេជ្រសោភាបានផុសចែករំលែកនេះ។
តាមពិតទៅអ្នកនាង ពេជ្រ សោភា និងឈាន ជាឡឺយ អាចនិយាយបានថាមានភាពស្និតស្នាលគ្នាតាំងពីក្នុងកម្មវិធីប្រកួត Beat the Best ហើយថែមទាំងបានរួមការងារជាមួយគ្នាថែមទៀតផង ព្រោះបទចម្រៀងដំបូងរបស់ឈាន ជាឡឺយ ដើម្បីអបអរសាទរឆ្នាំថ្មីឆ្នាំខាល ក្នុងផលិតកម្មហង្សមាសគឺច្រៀងគូជាមួយនឹងអ្នកនាង ពេជ្រ សោភា ដែលបទនោះមានចំណងជើងថា៖ «អត់លុយទេ» ហើយបទនេះដែរក៏ទទួលបានការគាំទ្រយ៉ាងពេញទំហឹងពីហ្វេនៗរបស់អ្នកទាំងពីរខ្លាំងណាស់ដែរ៕
