អ្នកនាង គង់ ចាន់ស្រីមុំ គឺជាតារាសម្ដែងនិងពិធីករដ៏លេចធ្លោនិងជារាជិនីហ្វេសសិនមួយរូបដ៏ឆ្នើម ព្រោះមួយឈុតៗដែលអ្នកនាងតុបតែងចេញមកគឺជាការបង្កើតថ្មីបែបគំនិតច្នៃប្រឌិត អភិរក្ស បង្កប់ដោយភាពស្អាត និងទាក់ទាញរួមផ្សំក្នុងនោះផងដែរ តួយ៉ាងដូចជាឈុតគោមផ្កាយដែលអ្នកនាងបានស្លៀកពាក់និងបង្ហោះចែកចាយលើបណ្ដាញទំនាក់ទំនងសង្គមហ្វេសប៊ុកកាលពីពេលថ្មីៗនេះដូច្នោះដែរ។
ជាការពិតណាស់ក្នុងឱកាសចូលឆ្នាំថ្មីប្រពៃណីជាតិ មហាសង្ក្រាន្ត ឆ្នាំខាល ចត្វាស័ក ព.ស២៥៦៦ ដែលទើបតែកន្លងទៅនេះ មានតារាស្រីច្រើនរូបណាស់បានស្រុះដៃគ្នា តុបតែងខ្លួនជាព្រះនាងកិរីណីទេវី ជាបុត្រីទី៥ កបិលមហាព្រហ្ម ដើម្បីអបអរសាទរពិធីបុណ្យចូលឆ្នាំ។
ដោយឡែកអ្នកនាង គង់ ចាន់ស្រីមុំក៏មិនខុសគ្នាដែរ ដើម្បីអបអរសាទរពិធីបុណ្យប្រពៃណីជាតិដ៏ធំនេះ កាលពីថ្ងៃទី១៤ និងទី១៥ ខែមេសា ឆ្នាំ២០២២ អ្នកនាងបានចែករំលែករូបភាពជាច្រើនសន្លឹកនៅចំណុចស្ពាននាគរង្វង់មូលវត្តភ្នំ ដោយការតុបតែងខ្លួនរបស់អ្នកនាងលើកនេះគឺកាន់តែប្លែកខ្លាំងថែមទៀត ព្រោះប្រើប្រាស់ផលិតផលក្នុងស្រុកសុទ្ធសាធមកច្នៃជាឈុតដ៏ស្អាត។
ឈុតច្នៃប្រឌិតថ្មីរបស់អ្នកនាង គង់ ចាន់ស្រីមុំនេះជាស្នាដៃរបស់ Kolab Rosana ដោយប្រើប្រាស់ ក្រម៉ាខ្មែរគោមផ្កាយ ទង់ជ្វាលា បង្គី កញ្ច្រែង និង អង្រុតតូចៗមកផ្សំចុលគ្នាបង្កើតបានជាឈុតនេះឡើងមក បន្ថែមលើសពីនោះគឺយកអង្រុតមកធ្វើជាក្រវិលនិងមកុដយ៉ាងស្រស់ស្អាត។
ឈុតច្នៃប្រឌិតមុនៗរបស់អ្នកនាងមួយចំនួនមានលក្ខណៈសិចស៊ីពេកមិនត្រូវចិត្តមហាជនទាំងអស់នោះទេ ប៉ុន្តែសម្រាប់ឈុតច្នៃប្រឌិតដោយផលិតផលក្នុងស្រុកមួយនេះពិតជាត្រូវចិត្តមហាជនច្រើនខុសព្រោះមានតែពាក្យកោតសរសើរ លើកទឹកចិត្ត និងគាំទ្រយ៉ាងពេញទំហឹងចំពោះការបង្កើតថ្មីរបស់អ្នកនាង៕
ប្រភព៖ Facebook Kong chansreymom
អត្ថបទទាក់ទង គង់ ចាន់ស្រីមុំ៖
- មិនខ្វល់អ្នករិះគន់ឈុតប៊ីគិនីអង្កាំ អ្នកនាង គង់ ចាន់ស្រីមុំ សន្យានឹងធ្វើអ្វីកាន់តែប្លែកនិងពិសេសជាងនេះ
- ស្អាតប្លែក! មកុដ«ស៊ីរ៉ាំង» និងឈុតរ៉ូបធ្វើពី «ម៉ាស» របស់ គង់ ចាន់ស្រីមុំ គំនិតច្នៃប្រឌិតថ្មី បំផុសពីការពារសុខភាព