កូរ៉េ – អ្នកគាំទ្រមួយភាគធំ បង្ហាញអាការៈមិនសប្បាយចិត្តមួយទំហឹង ដោយសារតែការផ្លាស់ប្ដូរសម្រស់ពីស្អាត មកជាមើលលែងយល់របស់តារាសម្ដែងស្រី Chae Rim ម្ចាស់រហស្សនាមរាជិនីកំពូលសម្រស់របស់កូរ៉េ។
ក្រោយត្រលប់មកមាតុភូមិកំណើតប្រទេសកូរ៉េខាងត្បូងវិញ Chae Rim តែងតែផុសរូបភាពនិងឃ្លីបវីដេអូខ្លួននិងកូនប្រុសនៅលើបណ្ដាញទំនាក់ទំនងសង្គមជានិច្ច ដូចជានៅពេលថ្មីៗនេះនាងបានបង្ហោះរូបវីដេអូលក្ខណៈ Close Up មុខមាត់ដ៏ស្អាតក្នុងវ័យ៤៣ឆ្នាំរបស់ខ្លួន ដែលមើលទៅមិនធម្មជាតិ ចំណែកឆ្អឹងថ្ពាល់ក៏ខ្ពស់ខ្លាំងខុសធម្មតាទៀត។
អ្នកគាំទ្រដែលបានឃើញហើយគិតថា Chae Rim មើលទៅខុសប្លែកពីមុនខ្លាំងណាស់។ ពីមុនតារាស្រីរូបនេះធ្លាប់រងការវាយប្រហារយ៉ាងច្រើនពីមហាជនដោយសារតែការវះកាត់កែសម្ផស្ស។ នៅក្នុងអាជីពសិល្បៈរបស់ខ្លួនពីដំបូងៗ Chae Rim ត្រូវបានគេសរសើរព្រោះតែសម្រស់ស្អាតពីធម្មជាតិ កែវភ្នែកខ្មៅក្រឹបប្រៀបដូចនិល រហូតជាប់ជារាជិនីសម្រស់ដ៏សែនបរិសុទ្ធ ប៉ុន្តែពេលនេះនាងបានធ្វើឱ្យអ្នកគាំទ្រខកបំណងយ៉ាងខ្លាំង ព្រោះតែប្រែប្រួលរូបរាងខុសពីមុនដាច់។
រូបភាពនិងកេរ្តិ៍ឈ្មោះរបស់នាងខូចខាតអស់ដោយសារតែជីវិតឯកជនរបស់នាងផងដែរ ព្រោះនាងបានបែកបាក់អាពាហ៍ពិពាហ៍រហូតដល់ទៅពីរលើក ទីមួយជាមួយនឹងស្វាមីជាតារាចម្រៀង Lee Seung Hwan បន្ទាប់មកនាងបានទៅប្រទេសចិនហើយរៀបការជាមួយនឹងតារាសម្ដែង Gao Gi Qi ហើយសម្រាលបានកូនប្រុសម្នាក់។
ស្វាមីទីមួយតារាចម្រៀង Lee Seung Hwan 
ស្វាមីទីពីរតារាសម្ដែងចិន Gao Gi Qi
អាពាហ៍ពិពាហ៍ខុសជាតិសាសន៍នេះពិតជាពិបាកខ្លាំងណាស់ទើបមានភាពផុយស្រួយបែបនេះ។ Chae Rim បានទទួលស្គាល់ថាខ្លួនបានលែងលះ Gao Gi Qi នៅចុងឆ្នាំ២០២២ ប៉ុន្តែបានរស់នៅបែកគ្នា៣ឆ្នាំមុននឹងឈានដល់ផ្ដិតមេដៃលែងលះ។
សម្រាប់តារាស្រីកូរ៉េរូបនេះប្រជាជនកម្ពុជាមិនត្រឹមតែស្គាល់នាងនៅក្នុងភាពយន្តកូរ៉េតែប៉ុណ្ណោះទេ ប៉ុន្តែនាងក៏ធ្លាប់សម្ដែងរឿងចិនជាច្រើនរឿងដែរ ហើយរឿងដែលទស្សនិកជនកម្ពុជាស្គាល់ច្រើនបំផុតនោះគឺ «មេទ័ពត្រកូលយ៉ាង» ដែលនាងសម្ដែងជាតួឯកស្រី។ សព្វថ្ងៃ Chae Rim គឺជាស្ត្រីមេម៉ាយ និងជាអ្នកម្ដាយកូនមួយ នាងតែងតែបានចូលរួមក្នុង Event និងកម្មវិធីទូរទស្សន៍ជាច្រើនដែលផ្ដោតជាសំខាន់លើផលិតផលថែរក្សាសម្រស់៕
ប្រភព៖ Tiin
