កន្លងមកអ្នកគាំទ្រមើលឃើញថា នេនទុំ ខិតខំប្រឹងប្រែងណាស់ មិនថាអាជីពសិល្បៈឬក៏អាជីវកម្មនោះឡើយ។ យ៉ាងណាមិញការខិតខំប្រឹងប្រែងរបស់អ្នកកំលោះរូបនេះមិនបានយកទៅទិញរថយន្ត ទិញខុនដូ ដើម្បីបានប្រើប្រាស់ជីវិតហ៊ឺហារបែបអភិជនឡើយ ប៉ុន្តែយកប្រាក់នេះទៅបំពេញក្ដីស្រមៃជូនអ្នកម្ដាយ។
តារាចម្រៀងរ៉ែប នេនទុំ បានហក់លោតលេងក្នុងពិភពសិល្បៈមួយរយៈធំហើយ ថ្វីត្បិតតែមិនមានឈ្មោះបោះសំឡេងខ្លាំង ប៉ុន្តែកេរ្តិ៍ឈ្មោះរបស់តារារូបនេះចាត់ទុកថាល្អបង្គួរនិងមានទស្សនិកជនស្គាល់លោកច្រើន។ ក្រោយផ្ទុះរីករាលដាលជំងឺកូវីដ-១៩ ធ្វើឱ្យពិភពសិល្បៈ ចម្រៀង ភាពយន្តជាប់គាំង តារាៗបែកខ្ញែកគ្នារកមុខរបរថ្មីរៀងៗខ្លួនដើម្បីរកដង្ហើមរស់។ មួយរយៈចុងក្រោយគេមើលឃើញថា នេនទុំ បានប្រឹងប្រែងលក់ផលិតផលទាំងអាហារនិងសំលៀកបំពាក់នៅលើបណ្ដាញទំនាក់ទំនងសង្គម រហូតមានអ្នកខ្លះឆ្ងល់ថាតារារូបនេះប្រឹងរកលុយច្រើនដើម្បីអ្វី?
ពេលនេះរាល់ចម្ងល់ទាំងអស់របស់សាធារណជនត្រូវបានលាតត្រដាង ព្រោះការខិតខំប្រឹងប្រែងរបស់តារារូបនេះបានចេញជារូបរាងហើយគឺសាងសង់ហាង (រមណីយដ្ឋានផ្ទះអ្នកម៉ែ) ជូនអ្នកម្ដាយ ស្ថិតនៅទីតាំង ភូមិជើងវត្ត សង្កាត់វិហារលួង ក្រុងសួង ខេត្តត្បូងឃ្មុំ និងធ្វើពិធីសម្ពោធកាលពីថ្ងៃទី០៩ ខែឧសភា ឆ្នាំ២០២២ ម្សិលមិញនេះ។
រមណីយដ្ឋានផ្ទះម៉ែនេះ បានចំណាយពេលសាងសង់អស់រយៈពេល២០ខែ គឺជាកម្លាំងញើសឈាមរបស់ នេនទុំ ធ្វើជូនដល់អ្នកម្ដាយ សូម្បីតែឈ្មោះរមណីយដ្ឋានផ្ទះអ្នកម៉ែ ក៏បានសបង្ហាញឱ្យឃើញថាកូនកតញ្ញូរូបនេះស្រលាញ់និងគោរពម្ដាយខ្លួនកម្រិតណា។
នៅក្នុងថ្ងៃសម្ពោធនោះឃើញមានតារាចម្រៀង និងជាថៅកែការ៉ាស់ឡាន លោក អ៊ីណូ បានទៅចូលរួមក្នុងពិធីសម្ពោធនាក្រុងសួង ទឹកដីត្បូងឃ្មុំផងដែរ៕