ក្លិបបាល់ទាត់វិសាខា សមាជិកពានរង្វាន់លីគកំពូលកម្ពុជា Cambodian Premier League ប្រកាសចែកផ្លូវជាមួយលោកបង្វឹកជនជាតិកូរ៉េខាងត្បូង Lee Tae Hoon នៅល្ងាចថ្ងៃទី១២ ខែឧសភា ឆ្នាំ២០២២ ក្រោយចូលកាន់តំណែងបានជិត៧ខែ ខណៈនៅថ្ងៃជាមួយគ្នានេះដែរក្លិបបានតែតាំងលោក មាស ចាន់ណា ជាគ្រូបង្វឹកជំនួសវិញ។
មុនមកកាន់វិសាខា លោក Lee Tae Hoon ក៏ត្រូវបានក្លិបបាល់ទាត់កងយោធពលខេមរភូមិន្ទ Tiffy Army FC សម្រេចសម្រេចបញ្ចប់កិច្ចសន្យាជាមួយលោក Lee Tae-hoon មុនពេលកំណត់ បន្ទាប់ពីដឹកនាំក្រុមបង្ហាញទម្រង់លេងមិនសូវបានល្អ។
លោក Lee Tae Hoon បានដឹកនាំក្លិប HOANG ANH Gia Lai FC នៅ ក្របខ័ណ្ឌលីគទី១ របស់ប្រទេសវៀតណាម ចំនួន១រដូវកាល ២០១៩-២០២០ ក្នុងតួនាទីជានាយកបច្ចេកទេស។ គ្រូបង្វឹកសញ្ជាតិកូរ៉េខាងត្បូងរូបនេះ ជាអតីតគ្រូបង្វឹកជម្រើសជាតិកម្ពុជា ចាប់ពីឆ្នាំ២០១០-២០១២។ ក្រោយមកគ្រូបង្វឹករូបនេះ ត្រូវបានតែងតាំងដឹកនាំជម្រើសជាតិកម្ពុជា ម្ដងទៀតនៅឆ្នាំ២០១៣ ដល់២០១៦ មុននឹងមកដឹកនាំជម្រើសជាតិអាយុក្រោម១៥ឆ្នាំ ពីឆ្នាំ២០១៦ ដល់២០១៨។
ដោយឡែកក្រុមវិសាខា នៅសល់បេសកកម្ម៤ក្នុងដៃទៀត ដើម្បីប្រកួតប្រជែងយកពានទាំងក្នុងពានរង្វាន់ Cambodian League Cup 2022 ពានរង្វាន់ Cambodian Premier League 2022 ពានរង្វាន់សម្តេចតេជោ ហ៊ុន សែន រដូវកាលឆ្នាំ២០២២ និងបានរង្វាន់បាល់ទាត់កម្រិតទ្វីបអាស៊ី AFC Cup 2022៕