អាមេរិក – ភរិយារបស់ Brooklyn Beckham នាង Nicola Peltz កូនប្រសារស្រីរបស់អតីតតារាបាល់ទាត់ Super Star អង់គ្លេស David Beckham បានបង្ហាញចិញ្ចៀនភ្ជាប់ពាក្យតម្លៃកប់ក្ដោងរបស់ខ្លួនលើបណ្ដាញសង្គមនានាពេលថ្មីៗនេះ។
យោងតាម Page Six ចិញ្ចៀនដែលមានតម្លៃថ្លៃនេះមានទំហំពេជ្រប្រមាណ៦ទៅ៨ការ៉ាត់។ តម្លៃសាច់ចិញ្ចៀនសុទ្ធប្រ៩ម៉ឺនដុល្លារ ខណៈដែលពេជ្រមានតម្លៃ២លានដុល្លារ ដូច្នេះសរុបជារួមចិញ្ចៀនលើដៃរបស់តារាស្រីហូលីវូដរបស់អាមេរិកនេះមានតម្លៃ២លាន៩ម៉ឺនដុល្លារ។ Nicola បានបង្ហាញចិញ្ចៀនរបស់ខ្លួននៅក្នុងឱកាសបង្ហាញវត្តមានលើកំរាលព្រំក្រហមកម្មវិធី 2022 Met Gala Carpet កាលពីដើមខែឧសភា។
ពិធីរៀបអាពាហ៍ពិពាហ៍របស់កូនប្រុសតារាបាល់ទាត់ល្បីលំដាប់ពិភពលោកនិងកូនស្រីសេដ្ឋីអចនទ្រព្យបានចំណាយទឹកប្រាក់ខ្ទង់ ៣,៥លានដុល្លារ នៅក្នុងភូមិគ្រឹះតម្លៃ១០០លានដុល្លាររបស់ឪពុកខាងស្រី។ ពិធីរៀបការអ្នកទាំងពីរមិនទទួលកាដូនោះឡើយប៉ុន្តែសំណូមពរឱ្យភ្ញៀវយកប្រាក់ទៅបរិច្ចាគជួយសង្គមជំនួសវិញ។
កូនប្រុស Devid Beckham កើតនៅឆ្នាំ១៩៩៩ ចំណែកភរិយារបស់គេនាង Nicola Peltz កើតនៅឆ្នាំ១៩៩៥ ជាកូនស្រី មហាសេដ្ឋី Nelson Peltz ជាអ្នកបណ្ដាក់ទុនមានភាគហ៊ុនក្នុងក្រុមហ៊ុនធំៗជាច្រើន។ Nicola ចាប់ផ្ដើមអាជីពសម្ដែងតាំងពីអាយុ១១ឆ្នាំ ខណៈដែលបច្ចុប្បន្ន Brooklyn គឺជាតារាម៉ូដែលដូចជាម្ដាយខ្លួន ថែមទាំងជាអ្នកថតរូបអាជីពផងដែរ៕
